Read Maltese Bible with DC – IL-BIBBJA IL-KOTBA MQADDSA NUMRI 27 Bible Online

NUMRI 27 - Maltese Bible with DC – IL-BIBBJA IL-KOTBA MQADDSA bible

NUMRI 27

¹U resqu l-bniet, ulied Selofħad bin Ħefer, bin Gilgħad, bin Makir, bin Manassi mit-tribù ta’ Manassi bin Ġużeppi, u dawn kien jisimhom: Maħla, Nogħa, Ħogla, Milka u Tirsa.

²U ppreżentaw ruħhom quddiem Mosè u quddiem Elgħażar, il-qassis, u quddiem il-kapijiet u l-ġemgħa kollha, fid-daħla tat-tinda tal-laqgħa u qalulhom:

³“Missierna miet fid-deżert, u ma kienx fost dawk li ħaduha kontra l-Mulej mal-klikka ta’ Koraħ, imma miet ħtija tiegħu; u subien ma kellux.

⁴Għala għandu jintemm isem missierna minn fost il-familja tiegħu billi ma kellu ebda tifel? Agħtina biċċa art bħal ħut missierna.”

⁵U Mosè ġieb il-każ tagħhom quddiem il-Mulej.

⁶U l-Mulej kellem lil Mosè u qallu:

⁷“Sewwa qalu l-bniet ta’ Selofħad[45]. Ħallihom jirtu bħal ħut missierhom; u l-wirt ta’ missierhom għaddih lilhom.

⁸U kellem lil ulied Iżrael u għidilhom: ‘Meta jmut xi ħadd bla ma jħalli wlied subien, għaddu l-wirt tiegħu lil uliedu bniet.

⁹U jekk ma jkollux bniet, agħtu wirtu lil ħutu.

¹⁰U jekk ma jkollux ħutu, agħtu wirtu lil ħut missieru.

¹¹U jekk missieru ma jkollux ħutu, agħtu wirtu lill-eqreb wieħed li jiġi minnu fil-familja tiegħu, u jirtu hu.’ ” U din tkun il-liġi u d-dritt kif ordna l-Mulej lil Mosè.

¹²U l-Mulej qal lil Mosè: “Itla’ fuq il-muntanja tal-Għabarin u ħares lejn l-art li se nagħti lil ulied Iżrael.

¹³U malli taraha, int ukoll tinġabar ma’ niesek bħalma nġabar ħuk Aron,

¹⁴talli ksirtuli kliemi fid-deżert ta’ Sin, meta l-ġemgħa ħaditha miegħi, u ma ħaristulix qdusiti quddiemhom ħdejn l-ilma.” Dan hu l-ilma ta’ Meriba f’Kades fid-deżert ta’ Sin.

¹⁵U Mosè kellem lill-Mulej u qallu:

¹⁶“Ħa jqiegħed il-Mulej, Alla tal-erwieħ tal-ħajjin kollha[46], bniedem fuq il-ġemgħa;

¹⁷bniedem li joħroġ u jidħol quddiemhom, u li joħroġhom u jdaħħalhom, biex ma tkunx il-ġemgħa tal-Mulej bħal merħla bla ragħaj.”

¹⁸U l-Mulej qal lil Mosè: “Ħu lil Ġożwè bin Nun, bniedem ta’ spirtu, u qiegħed idek fuqu.

¹⁹“Imbagħad ġibu quddiem Elgħażar il-qassis, u quddiem il-ġemgħa kollha, u agħtih il-kmand quddiemhom.

²⁰U agħtih sehem mill-awtorità tiegħek, biex tisma’ minnu l-ġemgħa kollha ta’ wlied Iżrael.

²¹U hu jersaq quddiem Elgħażar il-qassis, u dan jistħarreġ f’ismu xi jgħid il-ġudizzju tal-Urim[47] quddiem il-Mulej; għall-kelma tiegħu joħorġu, u għall-kelma tiegħu jidħlu, hu u l-ulied kollha ta’ Iżrael miegħu, il-ġemgħa kollha.”

²²U Mosè għamel kulma ordnalu l-Mulej. U ħa lil Ġożwè u ġiebu quddiem Elgħażar il-qassis, u quddiem il-ġemgħa kollha.

²³U qiegħed idejh fuqu u tah il-kmand skont ma qallu l-Mulej permezz ta’ Mosè.