Read Maltese Bible with DC – IL-BIBBJA IL-KOTBA MQADDSA NUMRI 28 Bible Online

NUMRI 28 - Maltese Bible with DC – IL-BIBBJA IL-KOTBA MQADDSA bible

NUMRI 28

¹U l-Mulej kellem lil Mosè u qallu:

²“Ordna lil ulied Iżrael u għidilhom: Qisu li toffruli f’waqtha l-offerta li tmissni, l-ikel li għandkom taħarqu quddiemi b’riħa tfuħ.

³“U għidilhom: Dan hu s-sagrifiċċju tal-ħruq li għandkom toffru lill-Mulej: ħrief tas-sena u bla difett, tnejn kuljum b’sagrifiċċju tal-ħruq għal dejjem;

⁴ħaruf wieħed toffrih filgħodu u l-ieħor toffrih filgħaxija, bejn dawl u dlam;

⁵offerta ta’ waħda minn għaxra ta’ efa smid miblul fi kwart ta’ ħinn żejt misħuq.

⁶Dan hu s-sagrifiċċju tal-ħruq ta’ dejjem li kien offrut fuq il-muntanja Sinaj b’riħa tfuħ maħruq lill-Mulej.

⁷Issawwab fuqu kwart ta’ ħinn għal kull ħaruf, u ssawwab lill-Mulej l-inbid safi fil-post imqaddes.

⁸U t-tieni ħaruf toffrih filgħaxija bejn inżul ix-xemx u d-dlam bl-offerta u l-libazzjoni tiegħu, b’riħa tfuħ lill-Mulej.

⁹“Fil-jum tas-Sibt toffru żewġt iħrief tas-sena bla difett u tnejn minn għaxra ta’ efa smid miblula fiż-żejt bl-offerta u l-libazzjoni tiegħu.

¹⁰Dan ikun is-sagrifiċċju tal-ħruq kull nhar ta’ Sibt, barra mis-sagrifiċċju tal-ħruq ta’ kull jum bil-libazzjoni tiegħu.

¹¹“Kull l-ewwel tax-xahar[48] toffru sagrifiċċju tal-ħruq quddiem il-Mulej: żewġ għoġiela, muntun, sebat iħrief tas-sena, bla difett,

¹²u offerta ta’ tlieta minn għaxra smid miblul fiż-żejt għal kull għoġol, u offerta ta’ tnejn minn għaxra smid miblul fiż-żejt għal kull muntun;

¹³u waħda minn għaxra ta’ smid miblul fiż-żejt għal kull ħaruf; sagrifiċċju b’riħa tfuħ maħruq lill-Mulej.

¹⁴Il-libazzjonijiet tagħhom ikunu ta’ nofs ħinn għal kull għoġol, u waħda minn tlieta ta’ ħinn għal kull muntun, u waħda minn erbgħa ta’ ħinn ta’ nbid għal kull ħaruf. Dan hu s-sagrifiċċju ta’ kull xahar, f’kull l-ewwel tax-xahar, fix-xhur kollha tas-sena.

¹⁵Joffru wkoll bodbod għall-purifikazzjoni lill-Mulej, barra s-sagrifiċċju tal-ħruq bil-libazzjoni tiegħu.

¹⁶“Fl-ewwel xahar[49], fl-erbatax tax-xahar, ikun l-Għid tal-Mulej.

¹⁷Fil-ħmistax ta’ dan ix-xahar issir festa, u għal sebat ijiem jittiekel ħobż bla ħmira.

¹⁸L-ewwel jum ikollkom laqgħa mqaddsa; ma tagħmlu ebda xogħol.

¹⁹U toffru b’sagrifiċċju tal-ħruq lill-Mulej: żewġ għoġiela, muntun u sebat iħrief tas-sena; u tqisu li jkunu bla difett.

²⁰U l-offerta tagħhom tkun smid miblul fiż-żejt, tlieta minn għaxra ta’ efa għall-għoġol, u tnejn minn għaxra għall-muntun,

²¹u waħda minn għaxra għal kull wieħed mis-sebat iħrief,

²²u bodbod għall-purifikazzjoni għall-maħfra tagħkom.

²³U dawn toffruhom minbarra s-sagrifiċċju ta’ filgħodu ta’ kull jum, sagrifiċċju tal-ħruq għal dejjem.

²⁴Hekk tagħmlu kull jum għal sebat ijiem: taħarqu ikel b’riħa tfuħ lill-Mulej, minbarra s-sagrifiċċju tal-ħruq ta’ kull jum bil-libazzjoni tiegħu.

²⁵U jkollkom laqgħa mqaddsa fis-seba’ jum u ma tagħmlu ebda xogħol.

²⁶“U f’jum il-bikri[50], meta tagħmlu offerta ġdida lill-Mulej fil-festa tal-ġimgħat, ikollkom laqgħa mqaddsa, u ma tagħmlu ebda xogħol.

²⁷U toffru sagrifiċċju li jogħġob lill-Mulej, żewġ għoġiela, muntun u sebat iħrief tas-sena.

²⁸U offerta tas-smid mibdul fiż-żejt, tlieta minn għaxra ta’ efa għal kull għoġol, tnejn minn għaxra għall-muntun,

²⁹u waħda minn għaxra għal kull ħaruf mis-sebat iħrief.

³⁰U bodbod għall-maħfra tagħkom,

³¹minbarra s-sagrifiċċju ta’ kull jum bl-offerta tiegħu u bil-libazzjoni tagħhom, u qisu li jkunu bla difett.