Read Maltese Bible with DC – IL-BIBBJA IL-KOTBA MQADDSA NUMRI 29 Bible Online

NUMRI 29 - Maltese Bible with DC – IL-BIBBJA IL-KOTBA MQADDSA bible

NUMRI 29

¹“Fis-seba’ xahar[51], fl-ewwel tax-xahar, ikollkom laqgħa mqaddsa; ma tagħmlu ebda xogħol; ikun għalikom jum iż-żarżir tat-tromba.

²Toffru sagrifiċċju tal-ħruq b’riħa tfuħ lill-Mulej; għoġol, muntun u sebat iħrief tas-sena bla difett;

³bl-offerta ta’ tlieta minn għaxra ta’ efa smid miblul fiż-żejt għall-għoġol,

⁴u tnejn minn għaxra għall-muntun, u waħda minn għaxra għal kull ħaruf mis-sebat iħrief.

⁵U bodbod għall-purifikazzjoni tal-ħtija tagħkom,

⁶minbarra s-sagrifiċċju tal-ewwel tax-xahar bl-offerta tiegħu, u s-sagrifiċċju ta’ kull jum bil-libazzjoni tiegħu maħruq lill-Mulej b’riħa tfuħ skont ir-rit tagħhom.

⁷Fl-għaxra ta’ dan is-seba’ xahar ikollkom laqgħa mqaddsa, u tgħakksu lilkom infuskom u ma tagħmlu ebda xogħol;

⁸u toffru sagrifiċċju tal-ħruq b’riħa tfuħ lill-Mulej; għoġol, muntun u sebat iħrief tas-sena bla difett,

⁹bl-offerta ta’ tlieta minn għaxra ta’ efa smid miblul fiż-żejt għall-għoġol, u tnejn minn għaxra għall-muntun,

¹⁰u waħda minn għaxra għal kull ħaruf mis-sebat iħrief;

¹¹u toffru bodbod għall-purifikazzjoni tal-ħtija, minbarra s-sagrifiċċju tal-purifikazzjoni bi tpattija, u s-sagrifiċċju ta’ kull jum, bl-offerta u l-libazzjonijiet tiegħu.

¹²“Fil-ħmistax-il jum tas-seba’ xahar ikollkom laqgħa mqaddsa, u ma tagħmlu ebda xogħol, u tagħmlu festa għal sebat ijiem lill-Mulej.

¹³U toffru sagrifiċċju tal-ħruq b’riħa tfuħ lill-Mulej; tlittax-il għoġol, żewġ imtaten u erbatax-il ħaruf tas-sena bla difett,

¹⁴bl-offerta ta’ tlieta minn għaxra minn efa smid miblul fiż-żejt għal kull għoġol mit-tlettax-il għoġol; tnejn minn għaxra għal kull muntun miż-żewġ imtaten;

¹⁵u waħda minn għaxra għal kull ħaruf mill-erbatax-il ħaruf.

¹⁶U bodbod wieħed għall-purifikazzjoni, minbarra s-sagrifiċċju ta’ kull jum bl-offerta u l-libazzjoni tiegħu.

¹⁷“Fit-tieni jum toffru tnax-il għoġol, żewġ imtaten, u erbatax-il ħaruf tas-sena bla difett,

¹⁸bl-offerta u l-libazzjonijiet tagħhom għall-għoġiela, għall-imtaten, u għall-ħrief skont l-għadd u r-rit tagħhom;

¹⁹bodbod għall-purifikazzjoni bl-offerta u l-libazzjonijiet tiegħu, minbarra s-sagrifiċċju ta’ kull jum bl-offerta u l-libazzjonijiet tiegħu.

²⁰“U fit-tielet jum toffru ħdax-il għoġol, żewġ imtaten u erbatax-il ħaruf tas-sena bla difett,

²¹bl-offerta u l-libazzjonijiet tagħhom għall-għoġiela, għall-imtaten, għall-ħrief skont l-għadd u r-rit tagħhom.

²²U bodbod għall-purifikazzjoni, minbarra s-sagrifiċċju ta’ kull jum bl-offerta u l-libazzjonijiet tagħhom.

²³“U fir-raba’ jum toffru għaxar għoġiela, żewġ imtaten u erbatax-il ħaruf tas-sena bla difett

²⁴bl-offerta u l-libazzjonijiet tagħhom għall-għoġiela, għall-imtaten u għall-ħrief skont l-għadd u r-rit tagħhom;

²⁵u bodbod għall-purifikazzjoni, minbarra s-sagrifiċċju ta’ kull jum bl-offerta u l-libazzjoni tagħhom.

²⁶“U fil-ħames jum toffru disa’ għoġiela, żewġ imtaten, erbatax-il ħaruf tas-sena bla difett

²⁷bl-offerta u l-libazzjonijiet tagħhom għall-għoġiela, għall-imtaten u għall-ħrief skont l-għadd u r-rit tagħhom;

²⁸u bodbod għall-purifikazzjoni, minbarra s-sagrifiċċju ta’ kull jum bl-offerta u l-libazzjoni tagħhom.

²⁹“U fis-sitt jum toffru tmien għoġiela, żewġ imtaten, erbatax-il ħaruf tas-sena bla difett,

³⁰bl-offerta u l-libazzjonijiet tagħhom għall-għoġiela, għall-imtaten u għall-ħrief skont l-għadd u r-rit tagħhom;

³¹u bodbod għall-purifikazzjoni, minbarra s-sagrifiċċju ta’ kull jum bl-offerta u l-libazzjoni tagħhom.

³²“U fis-seba’ jum toffru seba’ għoġiela, żewġ imtaten, erbatax-il ħaruf tas-sena bla difett,

³³bl-offerta u l-libazzjonijiet tagħhom għall-għoġiela, għall-imtaten u għall-ħrief skont l-għadd u r-rit tagħhom;

³⁴u bodbod għall-purifikazzjoni, minbarra s-sagrifiċċju ta’ kull jum bl-offerta u l-libazzjoni tagħhom.

³⁵“Fit-tmien jum tagħmlu l-laqgħa tal-aħħar; ma tagħmlu ebda xogħol.

³⁶U toffru b’riħa tfuħ lill-Mulej: għoġol, muntun, sebat iħrief tas-sena bla difett,

³⁷bl-offerta u l-libazzjoni tagħhom għall-għoġol, għall-muntun u għall-ħrief skont l-għadd u r-rit tagħhom;

³⁸u bodbod għall-purifikazzjoni, minbarra s-sagrifiċċju ta’ kull jum bl-offerta u l-libazzjoni tagħhom.

³⁹“Dawn huma s-sagrifiċċji li tagħmlu lill-Mulej fil-festi tagħkom minbarra l-wegħdi u l-għotjiet minn rajkom, li tistgħu tagħmlu, ta’ sagrifiċċji tal-ħruq, offerti, libazzjonijiet u sagrifiċċji ta’ sliem.”