Read Maltese Bible with DC – IL-BIBBJA IL-KOTBA MQADDSA NUMRI 30 Bible Online

NUMRI 30 - Maltese Bible with DC – IL-BIBBJA IL-KOTBA MQADDSA bible

NUMRI 30

¹U Mosè qal lil ulied Iżrael kulma ordnalu l-Mulej.

²U Mosè kellem lill-prinċpijiet tat-tribujiet ta’ wlied Iżrael u qalilhom: “Dan hu li ordna l-Mulej.

³Jekk xi ħadd jagħmel wegħda lill-Mulej, jew jintrabat b’ġurament[52], m’għandux jonqos minn kelmtu, imma jagħmel skont ma jkun ħareġ minn fommu.

⁴U l-mara li tkun għamlet wegħda u ntrabtet meta kienet għadha xebba f’dar missierha,

⁵u missierha jisma’ bil-wegħda u bl-obbligu li bih tkun intrabtet, u ma jgħidilha xejn, il-wegħdi u l-obbligi li bihom tkun intrabtet jibqgħu sħaħ.

⁶Imma jekk missierha jisma’[53] bil-wegħdi u l-obbligi li bihom tkun intrabtet, u jħassarhom, dawn ma jkunux jiswew aktar, u l-Mulej jaħfrilha għax missierha jkun ħassrilha.

⁷Jekk tiżżewweġ bil-wegħdi fuqha jew b’xi kelma bla ħsieb, li biha tkun intrabtet,

⁸u jisma’ żewġha u ma jgħidilha xejn, il-wegħdi u l-obbligi li bihom tkun intrabtet jibqgħu sħaħ.

⁹Imma meta jisma’ żewġha u jħassrilha l-wegħda li jkollha fuqha u l-kelma bla ħsieb, il-Mulej jaħfrilha.

¹⁰Il-wegħda tal-armla u tal-mara mifruda minn żewġha, l-obbligi kollha li jkunu ntrabtu bihom jibqgħu sħaħ.

¹¹“U jekk mara f’dar żewġha tagħmel xi wegħda jew tintrabat b’xi obbligu b’ġurament,

¹²u jisma’ żewġha u ma jgħid xejn, u ma jħassarhomlhiex, il-wegħda u l-obbligu li tkun intrabtet bihom jibqgħu sħaħ.

¹³Imma jekk żewġha, meta jisma’ b’kull kelma li tkun ħarġet minn fommha, iħassrilha l-wegħdi u l-obbligi li tkun intrabtet bihom, dawn ma jiswewx aktar. Il-Mulej jaħfrilha, għax żewġha jkun ħassarhomlha.

¹⁴“Kull wegħda u kull obbligu b’ġurament li titgħakkes b’xi ħaġa, żewġha jista’ jwettaqhom u żewġha jista’ jħassarhom.

¹⁵Imma jekk żewġha ma jgħidilha xejn minn jum għal ieħor, ikun wettaq il-wegħdi kollha tagħha jew l-obbligi kollha li bihom tkun intrabtet; iwettaqhom għax ma jkun qalilha xejn, meta sama’ bihom.

¹⁶U jekk iħassarhom wara li jkun sama’ bihom, jitgħabba hu bil-ħtija tagħha.”

¹⁷Dawn huma l-kmandamenti li ordnalkom il-Mulej permezz ta’ Mosè bejn ir-raġel u martu, bejn il-missier u bintu, xebba f’dar missierha.