Read Maltese Bible with DC – IL-BIBBJA IL-KOTBA MQADDSA NUMRI 32 Bible Online

NUMRI 32 - Maltese Bible with DC – IL-BIBBJA IL-KOTBA MQADDSA bible

NUMRI 32

¹Ulied Ruben u wlied Gad kellhom kotra kbira sewwa ta’ mrieħel, u raw li l-art ta’ Ġagħżer u l-art ta’ Gilgħad[57] kienu artijiet tajba għall-imrieħel.

²U wlied Gad u wlied Ruben marru jkellmu lil Mosè u Elgħażar il-qassis, u l-kapijiet tal-ġemgħa, u qalulhom:

³“Għatarot, Dibon[58], Ġagħżer, Nimra, Ħesbon, Elgħali, Xebam, Nebu u Begħon,

⁴artijiet li l-Mulej ħarbathom quddiem il-ġemgħa ta’ Iżrael, huma artijiet tajba għall-imrieħel, u aħna l-qaddejja tiegħek għandna l-imrieħel.”

⁵U qalu: “Jekk jogħġbok, agħti lilna, il-qaddejja tiegħek, din l-art biex tkun tagħna u tgħaddiniex ’l hemm mill-Ġordan.”

⁶U Mosè wieġeb lil ulied Gad u wlied Ruben: “Tajjeb! Imbagħad ħutkom imorru jitqabdu u intom tibqgħu hawn?

⁷Għala tridu taqtgħu qalb ulied Iżrael biex ma jgħaddux għall-art li tahom il-Mulej?

⁸Hekk għamlu missirijietkom meta jien bgħatthom minn Kades-barnija biex jaraw l-art.

⁹U telgħu sal-wied ta’ Eskol, u raw l-art, u qatgħu qalb ulied Iżrael, biex ma jidħlux fl-art li tahom il-Mulej.

¹⁰U xegħlet il-korla tal-Mulej dakinhar, u ħalef u qal:

¹¹‘L-irġiel, li telgħu mill-Eġittu minn għoxrin sena ’l fuq, ma jarawx l-art li jien ħlift li nagħti lil Abraham, ’l Iżakk u ’l Ġakobb, għax ma mxewx warajja b’qalbhom kollha,

¹²minbarra Kaleb bin Ġefunni l-Kenażi, u Ġożwè bin Nun, għax dawn imxew wara l-Mulej b’qalbhom kollha.’

¹³U l-korla tal-Mulej xegħlet għal Iżrael, u ħalliehom jiġġerrew fid-deżert għal erbgħin sena, sakemm inqerdet il-ġenerazzjoni li għamlet din il-ħsara quddiem il-Mulej.

¹⁴U issa qomtu intom flok missirijietkom, friegħi ta’ nies midinba, biex tkomplu żżidu s-saħna tal-qilla tal-Mulej kontra Iżrael.

¹⁵Għaliex jekk terġgħu lura minn warajh, hu jibqa’ jżommu fid-deżert, u intom tħarbtu dan il-poplu kollu.”

¹⁶Imma huma resqu lejh u qalulu: “Nibnu hawn imqawel għall-imrieħel tagħna u bliet għat-tfal tagħna.

¹⁷U aħna mbagħad naqbdu l-armi, u nimxu qalbiena quddiem ulied Iżrael sa ma ndaħħluhom f’arthom; u t-tfal tagħna jibqgħu fl-ibliet bis-swar minħabba n-nies li jgħammru f’dik l-art.

¹⁸Ma nerġgħux lura lejn djarna qabel ma wlied Iżrael ikunu ħadu f’idejhom kulħadd sehmu.

¹⁹Għaliex ma rridux nieħdu sehem magħhom ’l hemm mill-Ġordan, meta diġà għandna sehem għalina ’l hawn mill-Ġordan in-naħa tal-Lvant.”

²⁰U Mosè weġibhom: “Jekk intom tagħmlu hekk, jekk tarmaw ruħkom u timxu quddiem il-Mulej[59] għat-taqbid,

²¹u kull gwerrier minn fostkom jaqsam il-Ġordan quddiem il-Mulej, u jibqa’ hemm sakemm ikeċċi l-għedewwa tiegħu minn quddiemu,

²²u l-pajjiż kollu jċedi quddiem il-Mulej, imbagħad intom tkunu tistgħu terġgħu lura, u tinħallu mill-obbligi tagħkom quddiem il-Mulej u wlied Iżrael, u din l-art tkun tagħkom quddiem il-Mulej.

²³U jekk ma tagħmlux hekk, tidinbu quddiem il-Mulej, u kunu afu li l-kastig ta’ dnubkom għad jilħaqkom.

²⁴Ibnu għalikom bliet għat-tfal tagħkom u mqawel għall-imrieħel tagħkom, u żommu l-wegħda li ħarġet minn fommkom.”

²⁵U wlied Gad u wlied Ruben wieġbu lil Mosè u qalulu: “Il-qaddejja tiegħek jagħmlu kif jordna sidi.

²⁶It-tfal tagħna, in-nisa tagħna, l-imrieħel u l-bhejjem tagħna jibqgħu hawn fl-ibliet ta’ Gilgħad.

²⁷U l-qaddejja tiegħek, kull min jista’ jaqbad l-armi, jitilqu għat-taqbid quddiem il-Mulej, bħalma ordna sidi.”

²⁸U Mosè wissa dwarhom lil Elgħażar il-qassis, u lil Ġożwè bin Nun, u l-kapijiet tal-familji tat-tribujiet ta’ wlied Iżrael.

²⁹U Mosè qalilhom: “Jekk ulied Gad u wlied Ruben, ilkoll armati għat-taqbid, jaqsmu l-Ġordan magħkom quddiem il-Mulej, u intom tirbħu l-art, agħtuhom l-art ta’ Gilgħad, u din tkun tagħhom.

³⁰Imma jekk ma jaqsmux armati għat-taqbid, ikollhom joqogħdu magħkom f’art Kangħan.”

³¹U wlied Gad u wlied Ruben wieġbu u qalu: “Aħna nagħmlu kulma ordna l-Mulej lill-qaddejja tiegħek.

³²Aħna naqsmu armati quddiem il-Mulej għal art Kangħan, imma jibqa’ għalina s-sehem tagħna ’l hawn mill-Ġordan.”

³³U Mosè ta lil ulied nofs it-tribù ta’ Manassi, ulied Ġużeppi, is-saltna ta’ Siħon, is-sultan tal-Amurrin, u s-saltna ta’ Għog, is-sultan ta’ Basan; l-art kollha bl-ibliet u l-inħawi tagħhom.

³⁴U wlied Gad bnew Dibon, Għatarot, Għarogħer,

³⁵Għatrot-Sofan, Ġagħżer, Ġogba,

³⁶Bet-nimra, u Bet-ħaran, bliet bis-swar u mqawel għall-imrieħel.

³⁷U wlied Ruben bnew Ħebson u Elgħali, Kirjatajm,

³⁸Nebu u Bagħal-megħon, b’isimhom mibdul[60], u Xibma; u l-ibliet li bnew tawhom isimhom.

³⁹U wlied Makir bin Manassi, telqu lejn Gilgħad, ħaduha f’idejhom u keċċew l-Amurrin li kienu fiha.

⁴⁰U Mosè ta l-art ta’ Gilgħad lil Makir bin Manassi, u bdew jgħammru fiha.

⁴¹U Ġajir bin Manassi telaq u ħa l-irħula tagħhom u semmiehom Ħawwot-ġajir.

⁴²U Noba telaq u ħa lil Kenat u l-inħawi tagħha u semmieha Noba b’ismu.