Read Maltese Bible with DC – IL-BIBBJA IL-KOTBA MQADDSA NUMRI 33 Bible Online

NUMRI 33 - Maltese Bible with DC – IL-BIBBJA IL-KOTBA MQADDSA bible

NUMRI 33

¹Dawn huma l-postijiet[61] fejn waqfu wlied Iżrael, li ħarġu mill-Eġittu, mqassmin qatgħa qatgħa, taħt it-tmexxija ta’ Mosè u Aron.

²U Mosè kiteb il-ġrajja tat-tluq tagħhom skont kull waqfa tagħhom kif ordnalu l-Mulej. Dan hu t-tluq u l-waqfien tagħhom;

³telqu minn Ragħmses fl-ewwel xahar, fil-ħmistax tal-ewwel xahar; l-għada, wara ċ-ċelebrazzjoni tal-Għid, ulied Iżrael ħarġu b’rashom merfugħa quddiem għajnejn l-Eġizzjani;

⁴waqt li dawn kienu qegħdin jidfnu ’l uliedhom il-kbar li l-Mulej kien laqat; il-Mulej għamel ukoll ħaqq mill-allat tagħhom.

⁵Telqu wlied Iżrael minn Ragħmses, u waqqfu l-kamp f’Sukkot.

⁶Telqu minn Sukkot, u waqfu f’Etam, f’tarf id-deżert.

⁷Telqu minn Etam, daru lejn Piħaħirot, biswit Bagħal-sefon, u waqqfu l-kamp biswit Migdol.

⁸Telqu minn Piħaħirot u qasmu l-baħar għal ġod-deżert; imxew għal tlitt ijiem fid-deżert ta’ Etam; u waqqfu l-kamp f’Mara.

⁹Imbagħad telqu minn Mara u waslu Elim, fejn kien hemm tnax-il għajn tal-ilma u sebgħin siġra tat-tamar; u hemm waqqfu l-kamp.

¹⁰Telqu minn Elim, u waqqfu l-kamp ħdejn il-Baħar tal-Qasab.

¹¹U telqu minn ħdejn il-Baħar tal-Qasab, u waqfu fid-deżert ta’ Sin.

¹²Telqu mid-deżert ta’ Sin, u waqfu Dofka.

¹³U telqu minn Dofka, u waqfu Alus.

¹⁴U telqu minn Alus, u waqfu Refidim; u hawn ma kienx hawn ilma għall-poplu x’jixrob.

¹⁵U telqu minn Refidim, u waqfu fid-deżert tas-Sinaj.

¹⁶U telqu mid-deżert tas-Sinaj, u waqfu Kibrotħattawa.

¹⁷U telqu minn Kibrotħattawa, u waqfu Ħaserot.

¹⁸U telqu minn Ħaserot, u waqfu Ritma.

¹⁹U telqu minn Ritma, u waqfu Rimmon-pereż.

²⁰U telqu minn Rimmon-pereż, u waqqfu l-kamp Libna.

²¹U telqu minn Libna, u waqfu Rissa.

²²U telqu minn Rissa, u waqfu Keħelata.

²³U telqu minn Keħelata, u waqfu ħdejn il-muntanja ta’ Sefer.

²⁴U telqu minn ħdejn il-muntanja ta’ Sefer, u waqfu Ħarada.

²⁵U telqu minn Ħarada, u waqfu Makelot.

²⁶U telqu minn Makelot, u waqfu Taħat.

²⁷U telqu minn Taħat, u waqfu Teraħ.

²⁸U telqu minn Teraħ, u waqfu Mitka.

²⁹U telqu minn Mitka, u waqfu Ħasmona.

³⁰U telqu minn Ħasmona, u waqfu Moserot.

³¹U telqu minn Moserot, u waqfu Bene-ġagħkan.

³²U telqu minn Bene-ġagħkan, u waqfu Ħor-ħaggidgad.

³³U telqu minn Ħor-ħaggidgad, u waqfu Ġotbata.

³⁴U telqu minn Ġotbata, u waqfu Għabrona.

³⁵U telqu minn Għabrona, u waqfu Għesjon-geber.

³⁶U telqu minn Għesjon-geber, u waqfu fid-deżert ta’ Sin, li hu Kades.

³⁷U telqu minn Kades, u waqfu ħdejn il-muntanja tal-Ħor f’tarf l-art ta’ Edom.

³⁸Aron il-qassis tala’ fuq il-muntanja tal-Ħor skont il-kelma tal-Mulej, u miet hemm, fl-erbgħin sena mill-ħruġ ta’ wlied Iżrael mill-Eġittu, fil-ħames xahar, fl-ewwel tax-xahar.

³⁹U Aron kellu mija u tlieta u għoxrin sena meta miet fuq il-muntanja tal-Ħor.

⁴⁰U s-sultan ta’ Arad il-Kangħani, li kien jgħammar fin-Negeb, kien sama’ li waslu wlied Iżrael.

⁴¹Telqu minn ħdejn il-muntanja tal-Ħor, u waqfu Salmona.

⁴²Telqu minn Salmona, u waqfu Punun.

⁴³Telqu minn Punun, u waqfu Obot.

⁴⁴Telqu minn Obot, u waqfu Għijje-għabarim fi truf Mowab.

⁴⁵U telqu minn Għijjim, u waqfu Dibon-gad.

⁴⁶U telqu minn Dibon-gad, u waqfu Għalmon-diblatajm.

⁴⁷U telqu minn Għalmon-diblatajm u waqqfu l-kamp fuq il-muntanji ta’ Għabarim, biswit Nebu.

⁴⁸Telqu mill-muntanji ta’ Għabarim, u waqfu fil-wita ta’ Mowab, ħdejn il-Ġordan biswit Ġeriko.

⁴⁹U waqfu ħdejn il-Ġordan minn Betġesimot sa Abel-sittim, fil-wita ta’ Mowab.

⁵⁰U l-Mulej kellem lil Mosè fil-wita ta’ Mowab, ħdejn il-Ġordan, biswit Ġeriko, u qallu:

⁵¹“Kellem lil ulied Iżrael u għidilhom: Intom se taqsmu l-Ġordan għall-art ta’ Kangħan,

⁵²u tkeċċu minn quddiemkom in-nies kollha li jgħammru hemm, u teqirdu l-idoli minquxa u x-xbihat imdewba kollha tagħhom, u tħottu s-santwarji kollha fuq l-għoljiet.

⁵³Intom tirtu l-art u tgħammru fiha, għax lilkom tajtkom l-art biex tirtuha.

⁵⁴Tqassam l-art bix-xorti bejn il-familji; il-kbar ikollhom biċċa kbira, iż-żgħar biċċa żgħira, kull waħda tieħu l-art fejn tmissha x-xorti; ikollkom il-wirt tagħkom skont it-tribujiet ta’ missirijietkom.

⁵⁵Jekk intom ma tkeċċux in-nies li jgħammru fl-art minn quddiemkom, dawk li intom tħallu minnhom ikunulkom bħal xewk f’għajnejkom u niggieża f’ġenbejkom, u jkunu l-għedewwa tagħkom fl-art li intom tgħammru fiha.

⁵⁶U jiġri li dak li jien ħsibt nagħmel lilhom, nagħmlu lilkom.”