Read Maltese Bible with DC – IL-BIBBJA IL-KOTBA MQADDSA NUMRI 34 Bible Online

NUMRI 34 - Maltese Bible with DC – IL-BIBBJA IL-KOTBA MQADDSA bible

NUMRI 34

¹U l-Mulej kellem lil Mosè u qallu:

²“Ordna lil ulied Iżrael u għidilhom: Intom se tidħlu fl-art ta’ Kangħan, din hi l-art li se tmisskom: l-art ta’ Kangħan bil-fruntieri tagħha.

³“Il-ġenb tan-Nofsinhar jieħu mid-deżert ta’ Sin san-naħa ta’ Edom; il-fruntiera tan-Nofsinhar tibda minn tarf il-Baħar il-Mielaħ lejn il-Lvant;

⁴imbagħad tilwi għat-telgħa ta’ Għakrabbim u tgħaddi minn Sin, sa ma tasal sa Kades-barnija; minn hemm tibqa’ sejra għal Ħasar-addar, u tgħaddi minn Għasmon, u

⁵minn Għasmon iddur mal-wied tal-Eġittu u tasal sal-baħar.

⁶“Fuq il-fruntiera tal-Punent ikollkom il-Baħar il-Kbir[62]; dan ikun il-fruntiera fuq din in-naħa.

⁷“Il-fruntiera fuq in-naħa tat-Tramuntana tkun din: mill-Baħar il-Kbir tiġbdu lejn il-muntanja tal-Ħor;

⁸minn Ħor tiġbdu lejn id-daħla ta’ Ħemat, u l-fruntiera tibqa’ sejra sa Sedad,

⁹mnejn tgħaddi lejn Żifron u tibqa’ sejra sa Ħasar-għenan. Din tkunilkom il-fruntiera tat-Tramuntana.

¹⁰“Għall-fruntiera fuq in-naħa tal-Lvant tiġbdu linja minn Ħasar-għenan sa Sefam;

¹¹u din il-fruntiera tibqa’ nieżla minn Sefam sa Ribla fuq il-Lvant tal-Għajn, u tibqa’ nieżla u tmiss il-ġenb tal-baħar ta’ Kinneret

¹²in-naħa tal-Lvant, u tibqa’ nieżla mal-Ġordan sal-Baħar il-Mielaħ; din tkun l-art tagħkom b’dawn il-fruntieri madwarha.”

¹³U Mosè ordna lil ulied Iżrael u qalilhom: “Din hi l-art li intom għandkom taqsmu bejnietkom bix-xorti, li l-Mulej ordna li tingħata lid-disa’ tribujiet u nofs;

¹⁴għaliex it-tribù ta’ Ruben u t-tribù ta’ wlied Gad, skont l-għadd tal-familji tagħhom, u nofs it-tribù ta’ Manassi, ħadu sehemhom.

¹⁵Żewġ tribujiet u nofs diġà ħadu sehemhom in-naħa l-oħra tal-Ġordan biswit Ġeriko, in-naħa tal-Lvant.”

¹⁶U l-Mulej kellem lil Mosè u qallu:

¹⁷“Dawn huma l-ismijiet tan-nies li għandhom iqassmulkom l-art: Elgħażar il-qassis, u Ġożwè bin Nun;

¹⁸u tagħżlu prinċep minn kull tribù biex iqassam l-art.

¹⁹U dawn huma l-ismijiet tan-nies: mit-tribù ta’ Ġuda, Kaleb bin Ġefunni;

²⁰mit-tribù ta’ wlied Simgħon, Samwel bin Għammiħud;

²¹mit-tribù ta’ Benjamin, Elidad bin Kislon;

²²mit-tribù ta’ wlied Dan, il-prinċep Bukki bin Ġogli;

²³mit-tribù ta’ wlied Ġużeppi: mit-tribù ta’ wlied Manassi, il-prinċep Ħannijel bin Efod;

²⁴u mit-tribù ta’ Efrajm, il-prinċep Kemwel bin Siftan;

²⁵u mit-tribù ta’ wlied Żebulun, il-prinċep Elisafan bin Parnak;

²⁶u mit-tribù ta’ wlied Issakar, il-prinċep Paltijel bin Għażżan;

²⁷u mit-tribù ta’ wlied Aser, il-prinċep Aħiħud bin Selomi;

²⁸u mit-tribù ta’ wlied Neftali, il-prinċep Pedaħel bin Għammiħud.

²⁹Dawn huma n-nies li l-Mulej ordna biex iqassmu l-art ta’ Kangħan bejn ulied Iżrael.”