Read Maltese Bible with DC – IL-BIBBJA IL-KOTBA MQADDSA NUMRI 5 Bible Online

NUMRI 5 - Maltese Bible with DC – IL-BIBBJA IL-KOTBA MQADDSA bible

NUMRI 5

¹Il-Mulej kellem lil Mosè u qallu:

²“Għid lil ulied Iżrael biex iwarrbu mill-kamp lil kull min għandu l-ġdiem, xi nxija jew tniġġes minħabba xi mejjet.

³Warrab sew l-irġiel sew in-nisa, u oħroġhom ’il barra mill-kamp, li ma jitniġġsux il-kampijiet li jiena ngħammar fosthom.”

⁴U wlied Iżrael għamlu hekk, u bagħtuhom ’il barra mill-kamp, kif ordna l-Mulej lil Mosè: hekk għamlu wlied Iżrael.

⁵U l-Mulej kellem lil Mosè u qallu:

⁶“Għid lil ulied Iżrael: Raġel jew mara li jagħmel xi dnub ta’ bniedem u jiksirha mal-Mulej, ikun ħati.

⁷Jistqarr id-dnub li jkun għamel, iħallas għad-deni kollu u jżid miegħu mill-ħamsa waħda u jagħtiha lil min hu jkun għamel id-deni.

⁸U jekk ma jkollu dan ir-raġel l-ebda qarib bid-dritt tal-fidwa, biex jitħallas tal-ħsara, ħlas il-ħsara jingħata lill-Mulej u jkun tal-qassis, barra mill-muntun tat-tpattija, li bih ipatti għalih, u mbagħad jitlob il-maħfra.

⁹U kull offerta minn kull ħaġa qaddisa mingħand ulied Iżrael, li jġibu lill-qassis, din tkun tiegħu.

¹⁰Dak li wieħed joffri jkun tiegħu; imma dak li jingħata lill-qassis, ikun tal-qassis.”

¹¹U l-Mulej kellem lil Mosè u qallu:

¹²“Kellem lil ulied Iżrael u għidilhom: Jekk xi ħadd, li martu tiżbalja u tittradih

¹³billi xi ħaddieħor ikollu x’jaqsam magħha, u jibqa’ kollox mistur minn għajnejn żewġha, u ma kien hemm ebda xhud kontriha, għax tkun tniġġset bil-moħbi, u ma nqabditx fl-iżball;

¹⁴u mbagħad żewġha tiġih l-għira u jgħir għal martu, sew jekk tkun tassew tniġġset sew jekk le,

¹⁵għandu jġibha quddiem il-qassis. Iġib miegħu b’offerta għaliha, mill-għaxra waħda ta’ efa xgħir, bla ma jsawwab fuqha ebda żejt u anqas jixħet fuqha inċens, għax din hi offerta tal-għira, offerta ta’ tifkira, offerta biex tfakkar id-dnub.

¹⁶“Il-qassis imbagħad iressaq il-mara u jqegħedha quddiem il-Mulej.

¹⁷Jieħu mbagħad mill-ilma mqaddes f’bieqja tal-fuħħar u mit-trab tal-art tat-tinda u jħalltu mal-ilma.

¹⁸Il-qassis imbagħad iġib u jqiegħed il-mara quddiem il-Mulej, u jikxfilha rasha, u jagħtiha f’idejha l-offerta tat-tifkira, l-offerta tal-għira; u f’id il-qassis jibqa’ l-ilma morr tas-saħta.

¹⁹“Il-qassis imbagħad iġegħelha taħlef u jgħidilha: ‘Jekk int ebda raġel ma kellu x’jaqsam miegħek, u int ma tniġġistx, u ma twarrabtx minn żewġek, dan l-ilma tas-saħta ma jagħmillek xejn.

²⁰Jekk int tbegħedt minn żewġek u tniġġist, u xi raġel ieħor minbarra żewġek qagħad miegħek’;

²¹hawn il-qassis iġiegħel lill-mara taħlef dan il-ġurament ta’ saħta u jgħidilha: ‘Jagħmel minnek il-Mulej eżempju fis-saħta u l-ħalfa f’nofs il-poplu tiegħek, billi jwaqqagħlek kuxxtejk u jneffaħlek żaqqek[3].

²²Ħa jidħol dan l-ilma tas-saħta fil-ġewwieni tiegħek u jwaqqagħlek kuxxtejk u jneffaħlek żaqqek.’ U l-mara twieġeb: ‘Ammen[4]. Ammen.’

²³“Imbagħad il-qassis jikteb dawn is-saħtiet fuq folja, u jħassar il-kitba fl-ilma morr,

²⁴biex imbagħad jisqi l-mara l-ilma morr tas-saħta u l-ilma jidħol fiha.

²⁵Il-qassis jieħu minn id il-mara l-offerta tal-għira, u jxejjirha quddiem il-Mulej u jressaqha fuq l-artal.

²⁶U l-qassis jieħu biċċa mill-offerta ta’ tifkira u jaħraqha fuq l-artal; imbagħad jisqi ’l-mara l-ilma.

²⁷Jekk wara li jkun sqieha l-ilma, hija tkun tniġġset u naqset lil żewġha, jidħol fiha l-ilma tas-saħta bl-imrar tiegħu kollu, tintefaħ żaqqha u jaqgħu kuxxtejha; u l-mara tkun saħta fost il-poplu tagħha.

²⁸Imma jekk ma tkunx tniġġset, u tkun safja, ma jiġrilha xejn u jibqa’ jkollha tfal.

²⁹“Din hi l-liġi fil-każ tal-għira; sew jekk il-mara, li tkun taħt is-setgħa ta’ żewġha, titbiegħed minnu u titniġġes,

³⁰u sew jekk ir-raġel li ġietu l-għira u għer għal martu, iġibha quddiem il-Mulej, u l-qassis jagħmlilha kulma titlob din il-liġi.

³¹Hekk ir-raġel ma jieħu ebda ħtija, imma l-mara titgħabba bil-piż ta’ dnubha.”