Read Maltese Bible with DC – IL-BIBBJA IL-KOTBA MQADDSA NUMRI 6 Bible Online

NUMRI 6 - Maltese Bible with DC – IL-BIBBJA IL-KOTBA MQADDSA bible

NUMRI 6

¹U l-Mulej kellem lil Mosè u qallu:

²“Kellem lil ulied Iżrael u għidilhom: Meta xi ħadd, raġel jew mara, jidħol għall-wegħda ta’ nażir[5], billi jagħti ruħu lill-Mulej,

³għandu jiċċaħħad mill-inbid u xorb qawwi; ma jixrobx ħall tal-inbid jew ħall ta’ xorb qawwi; anqas ma għandu jixrob l-għasir tal-għeneb, anqas jiekol għeneb frisk jew imqadded.

⁴“Kemm iddum il-wegħda ta’ nażir, ma jiekol xejn minn dak li jsir mid-dielja, jew li għandu mill-inbid, ibda mill-għeneb qares sal-qxur tiegħu.

⁵“Kemm iddum il-wegħda ebda xafra ma għandha tgħaddi minn fuq rasu, sakemm ma jintemmux il-jiem tal-konsagrazzjoni tiegħu lill-Mulej; iżomm ruħu qaddis lill-Mulej, u jħalli dliel xagħru jikbru.

⁶Ma jersaq lejn ebda mejjet, sakemm ikun ikkonsagrat lill-Mulej.

⁷Ma jitniġġisx la f’mewt missieru, la f’mewt ommu, la f’mewt ħuh jew oħtu, għax ikollu fuq rasu l-wegħda ta’ nażir.

⁸Sakemm iddum il-wegħda ta’ nażir, hu jkun ikkonsagrat lill-Mulej.

⁹“Jekk xi ħadd jaqa’ mejjet ħdejh, u jmiss miegħu, u jniġġislu rasu ta’ nażir, hu għandu jqaxxar rasu f’jum il-purifikazzjoni tiegħu, iqaxxarha fis-seba’ jum.

¹⁰Fit-tmien jum, imbagħad, iġib żewġ gamimiet jew żewġt ifrieħ tal-ħamiem għand il-qassis ħdejn il-bieb tat-tinda tal-laqgħa;

¹¹u l-qassis joffri wieħed għall-ħtija, u l-ieħor b’sagrifiċċju tal-ħruq, u jpattilu għall-ħtija li jkun għamel minħabba l-mejjet, u dak in-nhar jikkonsagralu rasu mill-ġdid.

¹²Jerġa’ jikkonsagra ruħu lill-Mulej, u jtenni jiem il-wegħda, u jġib ħaruf tas-sena b’sagrifiċċju għar-riparazzjoni; iż-żmien ta’ qabel ma jgħoddx, għax ikun kiser il-wegħda.

¹³“Din hi l-liġi tan-nażir: Dak in-nhar li jintemm iż-żmien tal-konsagrazzjoni tiegħu, jersaq lejn bieb it-tinda tal-laqgħa,

¹⁴u jġib miegħu b’offerta lill-Mulej: ħaruf tas-sena bla difett bħala sagrifiċċju tal-ħruq, u ħarufa tas-sena bla difett bħala sagrifiċċju tal-purifikazzjoni, u muntun bla difett għas-sagrifiċċju tas-sliem;

¹⁵iġib ukoll qoffa ħobż ażżmu, qoffa ħobż miblul fiż-żejt, u ftajjar ażżmi midluka biż-żejt, bl-offerta tal-qmuħ u l-libazzjonijiet tagħhom.

¹⁶U l-qassis iressaqhom quddiem il-Mulej, u joffri s-sagrifiċċju tal-purifikazzjoni u s-sagrifiċċju tal-ħruq.

¹⁷U hu joffri l-muntun b’sagrifiċċju tas-sliem lill-Mulej flimkien mal-qoffa tal-ażżmu, u l-qassis joffri l-qmuħ u l-libazzjonijiet.

¹⁸In-nażir imbagħad iqaxxar ir-ras ikkonsagrata tiegħu ħdejn il-bieb tat-tinda tal-laqgħa, jieħu x-xagħar ta’ rasu kkonsagrat, u jixħtu fin-nar li jkun hemm jaqbad taħt il-vittma tas-sagrifiċċju tas-sliem.

¹⁹U l-qassis jieħu l-ispalla tal-muntun, meta tkun misjura, ftira ażżma mill-qoffa, u oħra ażżma rqiqa u jqegħedhom f’idejn in-nażir, wara li jkun qarweż xagħru kkonsagrat.

²⁰Imbagħad il-qassis ixejjirhom u joffrihom lill-Mulej; is-sider u s-sieq li jkunu offruti huma ħwejjeġ qaddisa li jmissu lill-qassis. Imbagħad in-nażir ikun jista’ jixrob l-inbid.

²¹“Din hi l-liġi għan-nażir li jkun għamel il-wegħda. L-offerta tiegħu lill-Mulej tkun skont il-wegħda ta’ nażir, barra l-offerta li jkun jista’ jagħmel minn rajh. Għandu jagħmel skont il-liġi tal-konsagrazzjoni tiegħu bħala nażir, u skont il-wegħda li jkun għamel.”

²²Il-Mulej kellem lil Mosè u qallu:

²³“Kellem lil Aron u ’l uliedu u għidilhom: ‘Meta tbierku ’l ulied Iżrael, hekk għandkom tgħidulhom:

²⁴Ibierkek il-Mulej u jħarsek!

²⁵Jixħet il-Mulej id-dija ta’ wiċċu fuqek, u jurik il-ħniena!

²⁶Iħares lejk il-Mulej bi mħabba, u jagħtik is-sliem[6]!’

²⁷Hekk huma jsejħu ismi fuq ulied Iżrael, u jiena nberikhom.”