Read Maltese Bible with DC – IL-BIBBJA IL-KOTBA MQADDSA MIKEA 1 Bible Online

MIKEA 1 - Maltese Bible with DC – IL-BIBBJA IL-KOTBA MQADDSA bible

MIKEA 1

¹Il-kelma tal-Mulej li ġiet lil Mikea, minn Moreset, fi żmien Ġotam, Aħaż u Ħeżekija, slaten ta’ Ġuda, li kellu dehriet dwar Samarija u Ġerusalemm.

²Isimgħu, popli kollha, agħti widen, art u kulma fik: Sidi l-Mulej ikun xhud kontrikom, is-Sid mit-tempju mqaddes tiegħu!

³Għax, ara, il-Mulej ħiereġ mill-għamara tiegħu, se jinżel u jirfes fuq l-għoljiet tal-art;

⁴il-muntanji jdubu taħtu, u l-widien jinħallu, bħax-xema’ quddiem in-nar, bħall-ilma mitluq għan-niżla.

⁵Dan kollu minħabba d-dnub ta’ Ġakobb, u minħabba l-ħtija ta’ dar Iżrael. X’inhu d-dnub ta’ Ġakobb? Mhux Samarija? U x’inhi l-ħtija ta’ dar Ġuda? Mhux Ġerusalemm?

⁶Lil Samarija nagħmilha borġ ġebel fir-raba’, għalqa fejn ixettlu d-dwieli; il-ġebel tagħha narmih fil-wied, u nikxfilha s-sisien tagħha.

⁷L-istatwi tagħha kollha jitfarrku, il-qligħ tagħha kollu jinbala’ fin-nar, l-idoli tagħha kollha neqridhomlha; għax minn qligħ in-nisa żienja[1] ġabrithom, u kiri tan-nisa żienja jerġgħu jsiru.

⁸Fuq hekk nibki u nolfoq, immur imnażża’ u għeri, noqgħod nibki bħax-xakalli, u nnewwaħ bħan-ngħama.

⁹Għax il-ġerħa tagħha m’hemmx fejqan għaliha, u messet ukoll lil Ġuda, laħqet sal-bieb tal-poplu tiegħi, sa lil Ġerusalemm.

¹⁰Tgħiduhiex f’Gatt; tibku xejn; f’Bet-legħafra tmiegħku fit-trab!

¹¹Għaddi ’l hemm, int li tgħammar f’Safir; dawk li jgħammru f’Sanan ma ħarġux mill-belt. Bet-esel inqabdet sa mis-sisien tagħha, sa mill-post qawwi tagħha.

¹²Qiegħda tnin bix-xewqa għall-ġid dik li tgħammar f’Marot; imma mingħand il-Mulej niżlet il-ħsara f’bieb Ġerusalemm.

¹³Orbot iż-żiemel ġerrej fil-karru, int li tgħammar f’Lakis; int il-bidu tad-dnub għal bint Sijon, għax fik instabu d-dnubiet ta’ Iżrael.

¹⁴Għalhekk ikollok tagħti r-rigali tat-tluq lil Moreset-gat. Bet-akżib tkun gidba għas-slaten ta’ Iżrael.

¹⁵Għad nerġa’ nġib fuqek ’il min jirbħek, int li tgħammar f’Maresa; sa Għadullam għad tasal, il-glorja ta’ Iżrael.

¹⁶Tfartas u tqarweż[2], għal ulied l-għaxqa tiegħek, il-qargħa tiegħek daqs ta’ ajkla, għax ittieħdu fl-eżilju ’l bogħod minnek!