Read Maltese Bible with DC – IL-BIBBJA IL-KOTBA MQADDSA MIKEA 2 Bible Online

MIKEA 2 - Maltese Bible with DC – IL-BIBBJA IL-KOTBA MQADDSA bible

MIKEA 2

¹Ħażin għalihom dawk li jfasslu l-ħsara, dawk li jsawru d-deni fuq soddithom! U jagħmluh mas-sebħ filgħodu, għax idejhom għandhom is-setgħa.

²Jekk jitlebilbu għall-għelieqi, jisirquhom[3]; jekk għad-djar, jaħtfuhom; jagħmlu l-vjolenza fuq raġel u daru, fuq is-sid u ġidu.

³Għalhekk dan jgħid il-Mulej: “Ara, kontra din ir-razza ta’ nies qed infassal ħsibijiet ta’ ħsara, li ma teħilsux għonqkom minnha, u ma tibqgħux timxu raskom merfugħa, għax ikun żmien ħażin.”

⁴Dakinhar tiġu f’ilsien in-nies, jgħannulkom għanja tal-biki u jgħidulkom: “Aħna misruqin serqa għall-aħħar: sehem il-poplu tiegħu qiegħed jitqies bil-ħbula, m’hemm ħadd biex iroddhulu lura; ir-raba’ tagħna sar sehem min seraqna.”

⁵Għalhekk għalikom ma jkunx hemm min jixħet il-ħabel tal-qjies bix-xorti[4] fil-ġemgħa tal-Mulej.

⁶“Ixxerrdux xnigħat!” ixandru huma; “Aħbarijiet bħal dawn m’għandhomx jixxandru! Ebda għajb mhu se jaqa’ fuqna.”

⁷Jaqaw id-dar ta’ Ġakobb misħuta? Jaqaw il-Mulej tilef sabru? Dawn huma għemejjel tiegħu? Kliemu mhuwiex kliem ta’ ġid ma’ min jimxi dritt?”

⁸Intom li qomtu bħala għedewwa għall-poplu tiegħi, lill-bniedem fis-sliem tneżżgħuh mill-mantar tiegħu, lil min ikun għaddej b’rasu mistrieħa, bħallikieku priża tal-gwerra.

⁹In-nisa tal-poplu tiegħi tgerrxuhom minn djarhom fejn ikunu għal qalbhom. Lil uliedhom tneħħulhom il-ġieħ li jien tajthom[5] għal dejjem.

¹⁰“Qumu u morru, għidulhom, dan mhux post il-mistrieħ!” Għal kull ħaġa ta’ xejn tieħdu rahan bla qjies[6].

¹¹Jekk jgħaddi bniedem fieragħ, kollu gideb u qerq, u jgħid: “Inħabbarlek inbid u xorb,” dan isir il-profeta ta’ dan il-poplu.

¹²Niġbrok, Ġakobb, kollok kemm int[7], niġbor il-fdal ta’ Iżrael, nqegħedhom flimkien bħal nagħaġ f’maqjel, bħal merħla f’nofs ta’ mergħa, geġwiġija ta’ nies, bla ma jibżgħu minn ħadd.

¹³Jitla’ quddiemhom dak li jiftaħ it-triq, jiftaħ it-triq, jgħaddu mill-bieb u joħorġu minnu, u jgħaddi s-sultan tagħhom quddiemhom, il-Mulej fir-ras tagħhom.