Read Maltese Bible with DC – IL-BIBBJA IL-KOTBA MQADDSA MIKEA 6 Bible Online

MIKEA 6 - Maltese Bible with DC – IL-BIBBJA IL-KOTBA MQADDSA bible

MIKEA 6

¹Isimgħu, mela, dan li jgħid il-Mulej! Qum, iddefendi ruħek quddiem il-muntanji, ħalli l-għoljiet jisimgħu leħnek!

²Isimgħu, muntanji, it-tilwima tal-Mulej, iftħu widnejkom, sisien l-art, għax din hi tilwima tal-Mulej mal-poplu tiegħu, ma’ Iżrael għandu xi jgħid:

³“X’għamiltlek jiena, poplu tiegħi? Fiex dejjaqtek? Weġibni.

⁴Għax jien tellajtek mill-art tal-Eġittu, fdejtek minn dar il-jasar; jien bgħatt quddiemek ’il Mosè, lil Aron u ’l Mirjam.

⁵Ftakar, iva, poplu tiegħi: biex kien ħareġ Balak, sultan ta’ Mowab, u x’wieġbu Balgħam bin Begħor? Ftakar ma’ xiex iltqajt minn Sittim sa Gilgal[17], ħalli b’hekk tagħraf l-għemejjel sewwa tal-Mulej.”

⁶“Biex se nersaq quddiem il-Mulej, u nitbaxxa quddiem Alla l-Għoli? Se nersaq quddiemu b’sagrifiċċji tal-ħruq u b’għoġiela ta’ sena?

⁷Il-Mulej se jogħġbuh l-eluf ta’ mtaten, u l-għaxriet ta’ eluf ta’ widien ta’ żejt? Se noffrilu ’l ibni l-kbir[18] b’sagrifiċċju għad-dnub tiegħi? Se nagħtih l-ewwel wild tiegħi, il-frott ta’ ħdani għal ħtijieti?”

⁸Bniedem, huwa wriek x’inhu tajjeb u x’jistenna minnek il-Mulej: li tagħmel dak li hu ġust, li tħobb u tkun ħanin, u li tkun umli fl-imġiba tiegħek ma’ Alla tiegħek.”

⁹Leħen il-Mulej isejjaħ il-belt[19], jiswa li wieħed jibża’ minn ismek! “Isimgħu tribujiet u ġemgħa tal-belt!

¹⁰Se ninsa jiena dar il-ħażin, li jiġma’ fiha t-teżori tal-ħażen, u s-saħta tal-efa mnaqqsa?

¹¹U l-miżien ħażin, u l-borża bil-bċejjeċ foloz tal-użin, nista’ jien inqishom b’tajba?

¹²L-għonja tagħha m’ għandhomx ħlief moħqrija u n-nies tagħha kollhom kliem b’ieħor, u lsienhom qerq ġo fommhom.

¹³Jien ukoll, mela, inneħħilek saħħtek bis-swat, u nagħmlek ħerba għal ħtijietek.

¹⁴Tibda tiekol bla ma tixba’, titħalla bl-istonku tiegħek vojt, twarrab xi ħaġa u ma tfaddal xejn, u dak li tfaddal nitlaqhulek għax-xabla.

¹⁵Tiżra’ u ma taħsadx, tisħaq iż-żebbuġ, u ma tindilikx biż-żejt, tagħsar l-għeneb, u ma tixrobx inbid.

¹⁶Int ħarist il-liġijiet ta’ Għomri[20] u d-drawwiet kollha tad-dar ta’ Aħab, u mxejt fit-triqat li fasslu huma, biex nagħmel minnek ħerba, u ’l niesek jiddieħku bihom, u int titgħabba biż-żebliħ tal-ġnus.”