Read Maltese Bible with DC – IL-BIBBJA IL-KOTBA MQADDSA NAĦUM 1 Bible Online

NAĦUM 1 - Maltese Bible with DC – IL-BIBBJA IL-KOTBA MQADDSA bible

NAĦUM 1

¹Oraklu dwar Ninwè. Ktieb id-dehra ta’ Naħum minn Elkos.

²Il-Mulej hu Alla għajjur[1] u jaf jitħallas, il-Mulej jitħallas u jixgħel bil-korla, il-Mulej jitħallas mill-avversarji tiegħu isorr il-korla għall-għedewwa tiegħu.

³Il-Mulej tqil biex jagħdab, għalkemm kbir fil-qawwa. Il-Mulej ma jaħfirhiex lill-ħati. Triqtu tinsab fir-riefnu u fit-tempesta, is-sħab hu t-trab tal-passi tiegħu.

⁴Hu jċanfar l-ibħra u jinxfu, u x-xmajjar kollha jbattal. Basan jidbiel quddiemu mal-Karmel, fil-Libanu tisfar il-ħdura kollha.

⁵Quddiemu taqbad rogħda lill-muntanji, l-għoljiet idubu. Quddiemu l-art titqanqal u d-dinja u kull min jgħammar fiha.

⁶Quddiem qilltu[2] min se jieqaf? Min jista’ jżomm bil-korla mkebbsa tiegħu? L-għadab tiegħu bħan-nirien jitferrex, imqar il-blat jitfarrak trab quddiemu.

⁷Twajjeb, iva, il-Mulej, fortizza f’jum l-għawġ: hu jieħu ħsieb dawk li fih jistkennu.

⁸Iżda b’għargħar ta’ ilma, hu jġib fix-xejn lil min iqum kontrih, u jiġri sa fid-dlam wara l-għedewwa.

⁹X’intom taħsbu ġo moħħkom kontra l-Mulej? Se jagħmel qerda sħiħa; kull min iqum kontrih ma jqumx darbtejn.

¹⁰U bħal meta faxx xewk jagħtuh in-nar, hekk in-nar jikolhom bħat-tiben niexef.

¹¹Minnek[3] kien ħareġ dak li niseġ id-deni kontra l-Mulej, ix-xitan Beljal.

¹²Hekk jgħid il-Mulej: “Għad li qawwija, u kotrana ħafna, iżd’huma jkunu maħsuda, u jgħibu. U għad li jien għakkistek, iżda ma ngħakksikx iktar.

¹³Minn fuqek issa nkisser il-madmad tiegħu u nqaċċat l-irbit tiegħek.”

¹⁴Dan hu illi l-Mulej ordna għalik[4]: “Ma jkunx hemm aktar nisel li jġib ismek, minn dar allatek jien għad neqred kull xbieha mnaqqxa, u kull xbieha mdewba; inħaffer qabrek, għax int kollok għajb.”