Read Maltese Bible with DC – IL-BIBBJA IL-KOTBA MQADDSA NAĦUM 2 Bible Online

NAĦUM 2 - Maltese Bible with DC – IL-BIBBJA IL-KOTBA MQADDSA bible

NAĦUM 2

¹Ara, fuq il-muntanji hemm ir-riġlejn ta’ min iġib l-aħbarijiet it-tajba, ta’ min is-sliem ixandar! Agħmel bil-ferħ il-festi tiegħek, Ġuda, u rodd wegħdietek, għax ma jżidx jgħaddi minnek ix-xitan Beljal, intemm għalkollox.

³Għax ġedded il-Mulej id-dielja ta’ Ġakobb, u d-dielja t’Iżrael, li l-ħallelin żarmawhom u ħassru l-friegħi tagħhom. Il-qerda ta’ Ninwè Tiela’ l-qerried għalik[5]. Mur agħmel l-għassa mal-fortizzi tiegħek, żomm taħt għajnejk it-triq, ħażżem ġenbejk, saħħaħ u żid qawwietek.

⁴Mimlija ħmura t-tarka tal-qalbiena tiegħu, liebsa s-suldati tiegħu l-iskarlatt, l-azzar tal-karrijiet in-nar itajjar huma u resqin għall-ħbit Isulu ż-żwiemel tagħhom fuq riġlejhom,

⁵taqliba waħda l-karrijiet fit-toroq, u ’l hawn u ’l hemm fil-pjazez jiġġerrew, id-dehra tagħhom qisha torċi mqabbda, iżiġġu donnhom beraq.

⁶L-aħjar suldati jiġu dlonk imsejħa, sarbut jaħbat ma’ ieħor, ilebbtu lejn is-sur, il-post tal-kenn ġa mħejji.

⁷Infetħu bwieb ix-xmajjar, imqalleb il-palazz taqliba waħda.

⁸Lil sidtu[6] ’l barra joħorġuha, u lsira jeżiljawha. Jolfqu l-qaddejja tagħha bħal tnehid il-ħamiem, u jagħtu fuq sidirhom.

⁹Ninwè qisha għadira bl-ilmijiet tagħha ħierġa maħrubin. “Ieqfu! Ieqfu!” U ħadd ma jerġa’ lura.

¹⁰“Aħtfu l-fidda! Aħtfu d-deheb! Bla tarf huwa l-ġid tagħha, minn kull tagħmir prezzjuż issibu fiha!”

¹¹Ħerba, tiġrif u qerda! Qlub mifnija u rkupptejn imriegħda, tkexkix fil-ġenbejn kollha, u wiċċ kulħadd musfar.

¹²Fejn huwa għar l-iljuni, u fejn hi l-bejta ta’ frieħ l-iljuni, fejn kien imur l-iljun[7], u jdaħħal hemm iż-żgħar bla ħadd ma jnaffru?

¹³Hu kien iqatta’ bċejjeċ għaż-żgħar tiegħu, kien jifga l-priża u jitma’ n-nisa tiegħu, jimla l-ħofra bil-prejjeż, l-għar tiegħu bil-biċċiet li kien iqatta’.

¹⁴Ara, jiena kontrik, oraklu tal-Mulej tal-eżerċti, il-karrijiet li għandek duħħan għad nagħmilhomlok; u frieħ l-iljuni tiegħek ix-xabla għad tikolhomlok; il-priża tiegħek mill-art għad neqridhielek; anqas qatt iżjed ma jinstama’ leħen il-messaġġiera tiegħek!