Read Maltese Bible with DC – IL-BIBBJA IL-KOTBA MQADDSA NAĦUM 3 Bible Online

NAĦUM 3 - Maltese Bible with DC – IL-BIBBJA IL-KOTBA MQADDSA bible

NAĦUM 3

¹Ħażin għal belt id-dmija, kollha qerq, mimlija ħtif, u s-serq ma jaqta’ xejn.

²Ħoss il-frosta, ħoss it-tkarwit tar-roti, żwiemel ilebbtu ħfief, karrijiet jaqbżu,

³rikkieba jħebbu għall-għedewwa tagħhom, ix-xabla tleħħ fid-dija, il-lanza tilma, kotra ta’ midrubin, għadd kbir ta’ maqtulin, iġsma bla tarf, kulħadd imfixkel jaqa’ fil-mejtin!

⁴Ħtija taż-żina kbir tal-mara żienja, sbuħitha ġmiel li jsaħħar: li jassret bosta ġnus biż-żina tagħha, u qerdet popli sħaħ bis-seħer tagħha.

⁵Ara, jiena kontrik, oraklu tal-Mulej tal-eżerċti, jiena ntellagħlek djulek sa fuq wiċċek[8], nikxef quddiem il-ġnus il-għera tiegħek f’wiċċ is-saltniet għawarek għad inberraħ;

⁶inwaddab il-ħmieġ fuqek, u ġieħek inwaqqagħlek, u nagħmel wirja minnek.

⁷U jiġri mbagħad li min iħares lejk jitwarrab minnek, u jgħid: “Ninwè meqruda! Min se jitħassarha? Mnejn infittxilha, min iħenn għaliha?”

⁸Jaqaw inti aħjar minn No-amon[9], li kienet f’xatt ix-xmara? Madwarha kellha l-baħar, u bħal imramma tagħha kien il-baħar, b’sur tagħha l-ilmijiet,

⁹l-Etjopja l-qawwa tagħha, u hekk l-Eġittu, qawwa bla tarf; b’għajnuna kellha ’l Put u n-nies tal-Libja.

¹⁰Iżd’hija wkoll inġarret lejn l-eżilju, marret itturufnata; u wliedha ż-żgħar ukoll sefgħu mbiċċra fi ftuħ kull triq; għan-nobbli tagħha tefgħu x-xorti, u rabtu l-kbarat tagħha lkoll bil-ktajjen.

¹¹Għad inti wkoll tintilef minn sensik, u tkun mifnija għad inti wkoll tfittex xi kenn mill-għadu.

¹²Sarulek il-fortizzi kollha tiegħek siġar tat-tin, mimlija frott tal-bikri, malli tħarrku, jaqa’ f’ħalq min jieklu.

¹³Arah, il-poplu tiegħek; int nisa għandek fik! Infetħu beraħ bibien artek quddiem l-għedewwa tiegħek; l-istaneg tiegħek mikulin min-nar.

¹⁴Aħseb biex taħżen l-ilma għall-assedju, mur saħħaħ il-fortizzi, agħġen it-tajn, agħġen it-tafal, aqbad f’idejk il-forma tal-madum.

¹⁵Hemmhekk in-nar għad jieklok u s-sejf jeqirdek, jieklok bħall-ġradijiet. Tista’ toktor bħall-ġrad; tista’ titkattar daqs l-urieżaq!

¹⁶Kabbart l-għadd tan-neguzjanti tiegħek aktar minn dak tal-kwiekeb tas-smewwiet; imma l-ġrad joħroġ mill-fosdqa u jittajjar.

¹⁷L-għassiesa bħall-urieżaq, l-uffiċjali tiegħek bħal sħab ta’ ġradijiet, li jinżlu jgħammru fuq is-swar f’jum kiesaħ. Titla’ x-xemx u l-ġrad itir u jaħrab, ma jkun magħruf minn ħadd ’il fejn imur. Fejn huma?

¹⁸Mela raqdu r-rgħajja tiegħek, sultan tal-Assirja? Il-kbarat tiegħek marret għajnhom bihom, xtered fuq il-muntanji l-poplu tiegħek, m’hemm ħadd li jerġa’ jiġbru.

¹⁹Anqas għall-ħsara tiegħek m’hemm fejqan, il-ġerħa tiegħek ma tistax tagħlaqlek. Dawk kollha li jisimgħu bl-aħbar tiegħek jinfexxu jċapċpu jdejhom kontra tiegħek. Għax min hu dak li ma ħassux għaddej minn fuqu bla waqfien id-deni tiegħek?