Read Maltese Bible with DC – IL-BIBBJA IL-KOTBA MQADDSA ĦABAKKUK 1 Bible Online

ĦABAKKUK 1 - Maltese Bible with DC – IL-BIBBJA IL-KOTBA MQADDSA bible

ĦABAKKUK 1

¹L-Oraklu li kellu f’dehra l-profeta Ħabakkuk

²Mulej, kemm se ndum nokrob għall-għajnuna u int ma tismax! Jew ngħajjat: “Vjolenza!” u int ma ssalvax!

³Għaliex turini l-ħażen, u inti toqgħod tħares lejn il-ħtija? Quddiemi qerda u vjolenza, hemm it-tilwim, u l-ġlied dejjem jiżdied.

⁴U b’hekk il-liġi sfat mingħajr saħħa, qatt iżjed ma jsir ħaqq. Għax il-ħażin idur madwar il-ġust, għalhekk il-ħaqq li jsir ikun mgħawweġ.

⁵Itfgħu ħarstkom fuq il-ġnus, araw, stagħġbu, tbikkmu bl-għaġeb: għaliex fi żmienkom stess għad issir ħaġa li, jekk tingħad, ma temmnuhiex.

⁶Għax, ara, jiena nqajjem il-Kaldin[1], il-ġens qalil li jaħbat għal kulħadd, u jaqsam l-art fil-wisa’ kollu tagħha, jaħtaf imkejjen mgħammra mhumiex tiegħu.

⁷Hu ġens li jwerwer, ta’ min jibża’ minnu; il-ħaqq u l-qerda skont kif jidhirlu hu.

⁸Iż-żwiemel tiegħu eħfef mil-ljupardi, eħrex mil-lpup ta’ filgħaxija. Ilebbtu r-rikkieba tiegħu, ġejjin mill-bogħod ir-rikkieba tiegħu, itiru b’ħeffa t’ajkla tfittex l-ikel.

⁹Ilkoll kemm huma ġejjin għall-vjolenza, il-biża’ ta’ dehrithom jasal qabilhom; il-priġunieri jiġimgħuhom daqs ir-ramel.

¹⁰Dal-ġens iwaqqa’ s-slaten għaż-żufjett, jidħak bil-prinċpijiet, jiddieħak b’kull fortizza, u jtalla’ gzuz ta’ terrapien u lilha jieħu!

¹¹Imbagħad jonfoħ bħar-riħ u jibqa’ għaddej, dal-ħati li qawwietu alla tiegħu[2]!

¹²Jaqaw m’intix minn dejjem int, Mulej? M’intix Alla l-Qaddis tiegħi, li ma tmutx? Mulej, dan minnek sar, biex tagħmel ħaqq, u sħiħ daqs blata ridtu jkun, b’kastig!

¹³Int għajnejk safja wisq biex tara l-ħażen, inti ma tiflaħx tħares lejn id-deni; l-għala nies mill-agħar tħobb tagħti kashom, iżżomm is-skiet meta min hu ħażin jibla’ lil min hu aktar minnu ġust?

¹⁴Int tagħmel il-bnedmin bħall-ħut tal-baħar[3], bħall-bhejjem ta’ fuq l-art, bla sid għalihom.

¹⁵Huwa jtellagħhom kollha bis-sunnara, u, wara li jressaqhom bix-xbiek tiegħu, jiġborhom kollha bil-konz tiegħu: u b’hekk jithenna u jifraħ.

¹⁶Għalhekk lix-xbiek joffrilu sagrifiċċju[4], jaħraq l-inċens quddiem il-konz tiegħu; għax bihom sehmu joktor u iklu jkun aktar utiq.

¹⁷Se jibqa’ jferragħ ix-xibka tiegħu u joqtol il-ġnus bla waqfien?