Read Maltese Bible with DC – IL-BIBBJA IL-KOTBA MQADDSA ĦABAKKUK 2 Bible Online

ĦABAKKUK 2 - Maltese Bible with DC – IL-BIBBJA IL-KOTBA MQADDSA bible

ĦABAKKUK 2

¹Se noqgħod għassa f’posti, se nibqa’ wieqaf fuq it-torri tiegħi, nistenna ħalli nara x’sejjer jgħidli, u kif se jwieġeb għall-ilmenti tiegħi.

²Imbagħad il-Mulej wieġeb: “Ikteb id-dehra,” qalli, “onqoxha fuq tavlozzi, hekk li jkun jista’ jħaffef min jaqraha.

³Għax id-dehra sseħħ meta jkun waqtha, tistenna se ma ttemm, u ma tqarraqx. Jekk hija ddum ma tasal, int stennieha, għax tiġi żgur, ma tiddawwarx ma tasal!

⁴Arah jinfena min m’hux ruħu sewwa, iżda l-ġust jgħix bil-fedeltà tiegħu[5].”

⁵Gwaj għall-bniedem qarrieq, u ma jkun qatt fis-sliem il-bniedem kburi, li jiftaħ ħalqu bħax-Xeol, u hu bħall-mewt, għaliex ma jixba’ qatt; jiġma’ għalih kull poplu, jiġbor għalih kull ġens!

⁶Tgħid huma lkoll ma jqabblulux taqbila, għanja niggieża, kliem joqgħodlu sewwa? U jgħidulu: “Ħażin għalih min jiġma’ dak li mhux tiegħu (kemm se jdum?), min jgħabbi lilu nnifsu b’ħafna djun!”

⁷Mhux f’daqqa jqum min dejnek? Ma jistenbħux dawk li jġagħluk titriegħed, u ssir il-priża tagħhom?

⁸Talli ħarbatt il-ġid ta’ bosta ġnus, il-popli l-oħra lkoll iħarbtu lilek; għad iħallsuk ta’ demm in-nies li qridt, tad-deni li ġibt int fuq il-pajjiż u fuq il-belt u fuq kull min jgħammar fiha!

⁹Ħażin għalih min għal daru jagħmel xi qligħ miksub ħażin, biex il-bejta tiegħu jqiegħed fl-għoli, u hekk ma jħallihiex tintmess mill-ħsara.

¹⁰Qerried ta’ bosta popli, b’għemilek stess waqqajt l-għajb fuq darek, u tlift lilek innifsek.

¹¹Għaliex sal-ġebla minn ġol-ħajt għad tgħajjat, u travu mbagħad iwieġeb minn mas-saqaf.

¹²Ħażin għalih min jibni belt bid-demm, italla’ belt fuq sisien il-ħażen!

¹³Jaqaw mhux mill-Mulej tal-qtajja’ ġej, li l-popli jitgħabbew bix-xogħol għan-nar[6], u l-ġnus jaħlu saħħithom għal xejn?

¹⁴Għax l-art kollha kemm hi għad tagħraf sewwa l-glorja tal-Mulej, bħalma hu miksi l-baħar bl-ilmijiet!

¹⁵Ħażin għalih min jisqi l-proxxmu tiegħu, min iferragħlu s-semm sa jġagħlu jisker, bil-ħsieb li jħares lejn għawaru!

¹⁶Int bl-għajb timtela u tixba’, u mhux bil-ġieħ. Mel’ixrob int ukoll, ħa turi ruħek bla ħtin! Għad idur lejk il-kalċi tal-id il-leminija tal-Mulej, u l-għajb jgħattilek ġieħek.

¹⁷Id-deni li għamilt lil-Libanu[7] għad jgħarraq lilek; il-qerda li ġibt inti fuq il-bhejjem għad twerwer lilek; għad iħallsuk ta’ demm in-nies li qridt, tad-deni li ġibt int fuq il-pajjiż u fuq il-belt u fuq kull min jgħammar fiha.

¹⁸Xbieha minquxa x’fejda jkun hemm fiha biex min jonqoxha joqgħod isawwarha? X’tiswa xbieha mdewba, u l-ħabbar giddieb, biex jista’ jafda fiha min jagħmilha u joqgħod jaħdem idoli mbikkmin?

¹⁹Ħażin għalih min jgħid lil biċċa għuda: “Stenbaħ min-ngħas,” jew: “Qum” lil ġebla siekta! Dan hu t-tagħlim! Arah, xogħol intarsjat bid-deheb u l-fidda, iżd’ebda nifs ta’ ħajja m’hemm ġo fih.

²⁰Iżda l-Mulej fit-tempju mqaddes tiegħu; iskot quddiemu, art, kollok kemm int.