Read Maltese Bible with DC – IL-BIBBJA IL-KOTBA MQADDSA ĦABAKKUK 3 Bible Online

ĦABAKKUK 3 - Maltese Bible with DC – IL-BIBBJA IL-KOTBA MQADDSA bible

ĦABAKKUK 3

¹Talba tal-profeta Ħabakkuk, fuq it-ton tal-għana ta’ niket.

²Mulej, waslet f’widnejja l-fama tiegħek, mill-għemil tiegħek jiena bżajt, Mulej. Sa ftit snin oħra ġeddu, sa ftit snin oħra għarrfu!’ Fil-korla, ġib quddiem għajnejk il-ħniena.

³Alla ġej minn Teman[8], mill-muntanja Faran[9] ġej il-Qaddis. Sebħu jiksi s-smewwiet, foħritu timla l-art.

⁴Dijietu qisha dawl ix-xemx, minn idu jleħħu r-raġġi: hemmhekk tinsab moħbija l-qawwa tiegħu.

⁵Quddiemu timxi l-pesta, u wara passih jiġi d-deni,

⁶Jieqaf, u jriegħed l-art, iħares, u jkexkex il-ġnus: imbagħad il-muntanji dejjiema jitqanqlu minn posthom, l-għoljiet ta’ żmien il-qedem jitbaxxew, triqatu sa minn dejjem.

⁷It-tined ta’ Kusan rajthom jitbeżżgħu, rajt l-għerejjex t’art Midjan jirtogħdu.

⁸Jaqaw tixgħel il-korla tiegħek kontra x-xmajjar jew kontra l-baħar qilltek, meta int, Mulej, tirkeb iż-żwiemel tiegħek u l-karru tar-rebħ tiegħek?

⁹Terfa’ l-qaws tiegħek għeri, il-watar tiegħek timlieh sew bil-vleġeġ. Int tofroq l-art bix-xmajjar,

¹⁰jilmħuk il-muntanji, u jitheżżu; jitqalleb l-ilma b’saħħa kbira u jgħaddi; jgħajjat l-abbiss u jerfa’ idejh fl-għoli.

¹¹Ix-xemx u l-qamar waqfu f’posthom, ħarbu kif raw ileħħu l-vleġeġ tiegħek, u l-lanza tiegħek toħroġ dawl li jgħammex.

¹²Int b’korla fuqek tgħaddi minn nofs l-art, u tgħaffeġ b’saħna l-ġnus.

¹³Int ħriġt sabiex issalva l-poplu tiegħek, issalva l-midluk tiegħek[10]. Dar il-ħażin ġarraftha mill-quċċata, kxiftilha l-pedament sa deher il-blat.

¹⁴Infidt bix-xettru tiegħek ras il-gwerriera tiegħu, li nxteħtu fuqi b’ferħ biex jeqirduni, bħalkieku biex jibilgħu ’l min hu msejken, f’xi mkien fis-satra,

¹⁵Għaddejt biż-żwiemel tiegħek fuq il-baħar, fuq it-tqalligħ tal-ilmijiet kotrana.

¹⁶Jien smajt, u ħassejt fija rogħda kbira, għal dan il-ħoss xufftejja bdew jirtogħdu; ħassejt għadmi jitmermer, passija bdew jitriegħdu taħti. Noqgħod bil-kwiet nistenna Jum l-għawġ li għad ifeġġ għall-ġens li qed jisħaqna.

¹⁷U mqar jekk ebda nwar ma trodd it-tina, u xejn ma jagħtu d-dwieli u l-frott tas-siġar taż-żebbuġ iqarraq, u r-raba’ xejn ma jibqa’ jrodd għall-ikel, u l-merħla tgħib mill-mandra, u bhejjem ma jkunx hemm fl-istalel tagħhom,

¹⁸jien xorta waħda nifraħ fil-Mulej, nithenna f’Alla, is-salvazzjoni tiegħi!

¹⁹Il-Mulej Sidi huwa l-qawwa tiegħi; riġlejja jagħmilhomli bħal taċ-ċriev u fuq l-għoljiet jeħodni. Lill-mexxej tal-kor; bid-daqq tal-kordi.