Read Maltese Bible with DC – IL-BIBBJA IL-KOTBA MQADDSA SOFONIJA 1 Bible Online

SOFONIJA 1 - Maltese Bible with DC – IL-BIBBJA IL-KOTBA MQADDSA bible

SOFONIJA 1

¹Il-kelma tal-Mulej li ġiet lil Sofonija bin Kusi, bin Gedalija, bin Amarija, bin Ħeżekija, fi żmien Ġosija bin Amon, sultan ta’ Ġuda.

²“Se niknes kollox minn fuq wiċċ l-art,” oraklu tal-Mulej,

³“bnedmin u bhejjem neqred, neqred it-tjur tas-sema u l-ħut tal-baħar, u n-nies il-ħżiena nġibhom fix-xejn; inqaċċat il-bniedem minn fuq wiċċ l-art,” oraklu tal-Mulej.

⁴“Idi tilħaq lil Ġuda, u lin-nies kollha ta’ Ġerusalemm. U minn dal-post inqaċċat kulma għad hawn minn Bagħal, sal-istess isem tal-qassisin tiegħu;

⁵u ’l dawk li fuq il-bjut jaduraw lill-eżerċtu tas-smewwiet[1]; lil dawk li jaduraw, iva, lill-Mulej, imma jaħilfu bl-isem ta’ Milkom[2];

⁶lil dawk li ma baqgħux wara l-Mulej, lil dawk li xejn ma jfittxu lill-Mulej, xejn ma jqisuh.”

⁷Il-Mulej Sidi, żommu s-skiet quddiemu, għaliex Jum il-Mulej jinsab fil-qrib. Għax il-Mulej ġa ħejja s-sagrifiċċju, u ġa qaddishom il-mistiedna tiegħu[3].

⁸U f’jum is-sagrifiċċju tal-Mulej, jiġri li “Nikkastiga l-kapijiet u wlied is-slaten, dawk kollha lebsin bħall-barranin[4].

⁹Dakinhar, iva, jien nikkastiga ’l kull min jaqbeż l-għatba[5], u ’l min id-dar ta’ sidu bil-vjolenza u l-qerq jimlieha.”

¹⁰“U jiġri dakinhar,” oraklu tal-Mulej, “illi minn Bieb il-Ħut tinstema’ għajta, u tasal karba mill-Kwartier il-Ġdid, u ħoss tal-għaġeb jiġi mill-għoljiet.

¹¹Okorbu, nies li tgħammru fil-Maktes[6], għax ġens in-neguzjanti kollu nqered, u kollha tqaċċtu dawk li jiżnu l-fidda!

¹²U jiġri f’dak iż-żmien, f’Ġerusalemm, nagħmel tfittxija kif imiss bid-dawl, u nikkastiga n-nies li, inkallati fit-tartru maħmuġ tagħhom, joqogħdu jgħidu f’qalbhom: ‘Ma jagħmel il-Mulej la ġid, lanqas deni!’

¹³Ġidhom għad jisirquhulhom, djarhom isiru ħerba; jibnu djar, iżda ma jgħammrux fihom; iħawlu dwieli, u nbid ma jeħdux minnhom.”

¹⁴Il-Jum il-kbir tal-Mulej fil-qrib! Fil-qrib, u riesaq b’ħeffa liema bħalha! Jum il-Mulej l-għajta tiegħu twerwrek, tintrafa’ mbagħad bħal għajta ta’ gwerrier.

¹⁵Hu jum ta’ korla dak il-Jum, jum ta’ dwejjaq u niket, jum ta’ qerda u diqa, jum ta’ dlam u swied, jum imsaħħab u ta’ ċpar magħqud;

¹⁶il-jum għad-daqq tat-tromba u għall-għajjat tal-gwerra kontra l-ibliet fortizzi u s-swar għoljin.

¹⁷U jiena nibgħat dwejjaq fuq in-nies, u jterrqu qishom għomja, għax ħtew kontra l-Mulej. Demmhom bħat-trab jixxerred, u l-iġsma tagħhom jintremew bħaż-żibel.

¹⁸La l-fidda tagħhom lanqas dehebhom ma jkun jista’ jeħlishom f’jum il-korla tal-Mulej. Fin-nar imħeġġeġ ta’ qilltu tintemm l-art kollha, għax qerda jagħmel, u tassew tal-għaġeb, minn kull min jgħammar fl-art.