Read Maltese Bible with DC – IL-BIBBJA IL-KOTBA MQADDSA ĦAGGAJ 2 Bible Online

ĦAGGAJ 2 - Maltese Bible with DC – IL-BIBBJA IL-KOTBA MQADDSA bible

ĦAGGAJ 2

¹Fit-tieni sena tas-sultan Dariju, fis-seba’ xahar, fil-wieħed u għoxrin tax-xahar, ġiet il-kelma tal-Mulej permezz ta’ Ħaggaj, il-profeta, u qallu:

²“Isa, mur kellem lil Żerubbabel bin Sijaltijel, gvernatur ta’ Ġuda, u lil Ġożwè bin Ġeħosadak, il-qassis il-kbir, u lill-bqija tal-poplu, u għidilhom:

³Min għad baqa’ fostkom li ra dan it-tempju fil-glorja li kellu qabel? U issa kif qegħdin tarawh? F’għajnejkom mhux forsi qisu xejn?

⁴Imma issa qawwi qalbek, Żerubbabel, oraklu tal-Mulej, qawwi qalbek, Ġożwè bin Ġeħosadak, il-qassis il-kbir; qawwi qalbek, poplu tal-pajjiż, oraklu tal-Mulej. Aqbdu aħdmu, għax jiena magħkom, oraklu tal-Mulej tal-eżerċti. Il-kelma li biha ntrabbatt magħkom fi ħruġkom mill-Eġittu,

⁵u l-ispirtu tiegħi, jibqgħu f’nofskom: la tibżgħux!”

⁶Għax hekk jgħid il-Mulej tal-eżerċti: “Dalwaqt, ftit ieħor biss, u jiena nheżżeż is-smewwiet u l-baħar u l-blat,

⁷u nqanqal il-ġnus kollha, u l-ġid kollu tal-popli jiġi kollu hawn, u nimla dan it-tempju bil-glorja[2],” jgħid il-Mulej tal-eżerċti.

⁸“Tiegħi l-fidda u tiegħi d-deheb, oraklu tal-Mulej tal-eżerċti.

⁹Il-glorja tal-aħħar ta’ dan it-tempju tkun akbar minn ta’ qabel,” jgħid il-Mulej tal-eżerċti, “u f’dan il-post jiena nagħti s-sliem,” oraklu tal-Mulej tal-eżerċti.

¹⁰Fid-disa’ xahar tat-tieni sena ta’ Dariju, fl-erbgħa u għoxrin tax-xahar[3], ġiet il-kelma tal-Mulej lill-profeta Ħaggaj u qallu:

¹¹“Dan jgħid il-Mulej tal-eżerċti: Mur staqsi lill-qassisin huma x’jidhrilhom skont il-liġi u għidilhom:

¹²Jekk wieħed jerfa’ djul il-libsa tiegħu biex iġorr laħam imqaddes fih, u mbagħad b’dak id-djul il-libsa jmiss il-ħobż, jew xi tisjir, jew l-inbid, jew iż-żejt, jew kull xorta ta’ ikel, dan jitqaddes?” U wieġbu l-qassisin u qalu: “Le.”

¹³Raġa’ Ħaggaj qalilhom: “Jekk wieħed jitniġġes għax ikun mess ġisem mejjet, u mbagħad imiss xi ħaġa minn dawn, din titniġġes?” U wieġbu l-qassisin u qalu: “Titniġġes.”

¹⁴U qabad Ħaggaj u qal: “Hekk hu dan il-poplu, u hekk hu dan il-ġens quddiemi, oraklu tal-Mulej, u hekk hi kull ħaġa li jagħmlu b’idejhom. U kulma joffru hemm huwa mniġġes.

¹⁵“U issa ġibu quddiem għajnejkom, mil-lum ’il quddiem: qabel ma tqiegħdet ġebla fuq ġebla fis-santwarju tal-Mulej,

¹⁶x’kontu intom? Wieħed kien jiġi għal munzell ta’ għoxrin qatta, u jsib għaxra; kien jiġi fuq il-magħsar biex jimla ħamsin bettija, u jsib għal għoxrin.

¹⁷Il-ħidma ta’ idejkom jiena kollha ħassarthielkom bir-riħ mil-Lvant u bis-sadid, u bis-silġ. Iżda ma kienx hemm li terġgħu lura lejja, oraklu tal-Mulej.

¹⁸U issa ġibu quddiem għajnejkom, mil-lum ’il quddiem, il-jum erbgħa u għoxrin tad-disa’ xahar[4], mill-jum li fih tqiegħdu s-sisien tas-santwarju tal-Mulej: ġibu quddiem għajnejkom

¹⁹jekk għadx baqa’ qamħ fil-maħżen, u jekk id-dielja u t-tina u r-rummiena u ż-żebbuġa għadhomx jagħmlu frott! Mil-lum stess jiena nibda nbierek.”

²⁰Fl-erbgħa u għoxrin tax-xahar[5] għat-tieni darba l-Mulej kellem lil Ħaggaj u qallu:

²¹“Kellem lil Żerubbabel, gvernatur ta’ Ġuda, u għidlu: Jiena se nheżżeż is-smewwiet u l-art,

²²naqleb it-tron tas-saltniet u neqred il-qawwa tas-slaten tal-ġnus, naqleb il-karru u r-rikkieb tiegħu u jaqgħu ż-żwiemel u r-rikkieba tagħhom, kull wieħed bis-sejf ta’ sieħbu.

²³F’dak il-jum[6], oraklu tal-Mulej tal-eżerċti, jien nieħu lilek, Żerubbabel bin Sijaltijel, qaddej tiegħi, oraklu tal-Mulej tal-eżerċti, u nagħmlek bħal siġill[7], għax lilek għażilt.” Oraklu tal-Mulej tal-eżerċti.