Read Maltese Bible with DC – IL-BIBBJA IL-KOTBA MQADDSA ŻAKKARIJA 1 Bible Online

ŻAKKARIJA 1 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 1

¹Fit-tmien xahar tat-tieni sena[1] ta’ Dariju, il-kelma tal-Mulej ġiet lill-profeta Żakkarija bin Barakija, bin Għiddu, u qallu:

²“Il-Mulej saħan bil-kbir għal missirijietkom.

³Mela mur għidilhom: Hekk jgħid il-Mulej tal-eżerċti: Erġgħu duru lejja, oraklu tal-Mulej tal-eżerċti, u jiena nerġa’ ndur lejkom, jgħid il-Mulej tal-eżerċti.

⁴Tkunux bħal missirijietkom, li l-profeti tal-imgħoddi kienu sejħulhom u qalulhom: ‘Hekk jgħid il-Mulej tal-eżerċti: Mhux li kontu dduru lejja mit-triqat il-ħżiena tagħkom u mill-għemejjel il-ħżiena tagħkom!’ Iżda huma ma semgħux, u widen ma tawnix, oraklu tal-Mulej.

⁵Fejn huma issa missirijietkom? U jaqaw il-profeti tagħkom għal dejjem se jgħixu?

⁶Iżda kliemi u l-ordnijiet tiegħi, li jien kont ordnajt lill-qaddejja tiegħi l-profeti, jaqaw lil missirijietkom ma laħquhomx? Għalhekk huma sogħob bihom u qalu: Il-Mulej tal-eżerċti qatagħha li jġib ruħu magħna skont it-triqat u l-għemejjel tagħna; u hekk għamel!”

⁷Fl-erbgħa u għoxrin jum[2] tal-ħdax-il xahar, li hu x-xahar ta’ Xebat, fit-tieni sena ta’ Dariju, il-kelma tal-Mulej waslet lill-profeta Żakkarija bin Barakija, bin Għiddu; waslitlu hekk:

⁸Kelli dehra billejl, u ara, kien hemm raġel riekeb fuq żiemel aħmar. Kien wieqaf qalb ix-xtieli tar-riħan li kienu fil-wied, u warajh kien hemm żwiemel ħomor, qastnin u bojod.

⁹U jien għedt: “Dawn x’inhuma, sidi?” U qalli l-anġlu li kien kellimni: “Jiena nurik dawn x’inhuma.”

¹⁰Imbagħad ir-raġel li kien wieqaf qalb ix-xtieli tar-riħan wieġeb u qal: “Dawn huma dawk li l-Mulej bagħathom biex jiġġerrew ’l hawn u ’l hemm fuq l-art.”

¹¹U huma qabdu u qalu lill-anġlu tal-Mulej li kien wieqaf qalb ix-xtieli tar-riħan: “Aħna morna niġġerrew mal-art, u ara, l-art kollha kwieta u siekta.”

¹²U l-anġlu tal-Mulej qabad u qal: “Mulej tal-eżerċti, kemm se ddum ma tħenn għal Ġerusalemm u għall-ibliet ta’ Ġuda li għalihom ilek inkurlat sebgħin sena sħaħ[3]?”

¹³U l-Mulej wieġeb bil-ħlewwa u bi kliem ta’ faraġ lill-anġlu li kien tkellem miegħi.

¹⁴Imbagħad l-anġlu li kien tkellem miegħi qalli: “Mur xandar u għid: ‘Dan jgħid il-Mulej tal-eżerċti: Jiena għajjur fuq li għajjur għal Ġerusalemm u għal Sijon;

¹⁵iżda mgħaddab għall-aħħar għall-ġnus li, bla ma ħabblu rashom minn xejn, mexxew il-ħsara ’l quddiem, imqar meta jien kont inkurlat ftit.’

¹⁶Mela hekk jgħid il-Mulej: “Fil-ħniena tiegħi nerġa’ ndur lejn Ġerusalemm; it-tempju tiegħi jerġa’ jinbena fiha, oraklu tal-Mulej tal-eżerċti, u l-ħabel tal-kejl ikun mifrux fuq Ġerusalemm!”

¹⁷Żid xandar u għid: “Dan jgħid il-Mulej tal-eżerċti: L-ibliet tiegħi għad jerġgħu jfuru bil-ġid. U l-Mulej jerġa’ jħenn għal Sijon u mill-ġdid jaħtar lil Ġerusalemm!”