Read Maltese Bible with DC – IL-BIBBJA IL-KOTBA MQADDSA ŻAKKARIJA 10 Bible Online

ŻAKKARIJA 10 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 10

¹Itolbu x-xita mingħand il-Mulej meta tkun qorbot fl-aħħar: il-Mulej li jagħmel il-beraq, li jagħtihom il-ħalbiet tax-xita, lill-bniedem il-ħaxix tar-raba’.

²Għax allat djarhom[29] jgħidu kliem fieragħ; dawk li jħabbru kellhom dehriet qarrieqa, ifissru ħolm mhux minnu, u għalxejn ifittxu jfarrġu. Minħabba f’hekk tferrex bħal merħla l-poplu, imsieken, għax m’għandhomx ragħaj.

³“Xegħlet il-korla tiegħi għar-rgħajja, u se nikkastiga lill-kapijiet. Iva, il-Mulej tal-eżerċti jieħu ħsieb il-merħla tiegħu, li hi d-dar ta’ Ġuda, u jagħmilha bħal żiemel glorjuż tiegħu fit-taqbida.

⁴Minnha toħroġ il-ġebla tax-xewka, minnha l-puntal, minnha l-qaws tat-taqbid, minnha kull kap.

⁵Flimkien ikunu bħal gwerrier li jgħaffġu fit-tajn tat-toroq fit-taqbid, jissaraw għax il-Mulej magħhom, u r-rikkieba taż-żwiemel jitħawdu.

⁶Insaħħaħ dar Ġuda, insalva dar Ġużeppi, u nerġa’ nġibhom lura, għaliex ħennejt għalihom; u jkunu bħalkieku qatt ma ċħadthom, għax jiena l-Mulej, Alla tagħhom, u nagħtihom dak li talbuni.

⁷Imbagħad isir Efrajm bħal gwerrier qalbieni, tithenna qalbhom bħalkieku bl-inbid; uliedhom jaraw u jithennew, u qalbhom tifraħ fil-Mulej.

⁸U nsaffrilhom biex niġmagħhom, għax jiena fdejthom, u jsiru kotrana bħalma kienu.

⁹Ukoll jekk xerridthom fost il-ġnus, iżda mill-artijiet imbiegħda jibqgħu jiftakruni, u jrabbu ’l uliedhom u jerġgħu lura.

¹⁰Nerġa’ nġibhom mill-art tal-Eġittu, u niġmagħhom mill-Assirja; indaħħalhom fl-art ta’ Gilgħad u fil-Libanu u ma jinstabx wisa’ biżżejjed għalihom.

¹¹Għad jaqsmu l-baħar tal-Eġittu, u hu jraġġa’ lura ħalel il-baħar, u jitnixxfu qigħan in-Nil. Jitwaqqa’ t-tkabbir tal-Assirja, lill-Eġittu jitneħħielu x-xettru.

¹²Inqawwihom fil-Mulej, f’Ismu jkun il-ftaħir tagħhom,” oraklu tal-Mulej.