Read Maltese Bible with DC – IL-BIBBJA IL-KOTBA MQADDSA ŻAKKARIJA 11 Bible Online

ŻAKKARIJA 11 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 11

¹Iftaħ bwiebek, Libanu, biex in-nar jibla’ ċ-ċedri tiegħek.

²Okrob, ċipress, għax iċ-ċedru ntemm, għax inqerdu l-qalbenin. Okrob, ballut ta’ Basan, għax tqaċċat il-masġar folt!

³Isma’ l-krib tar-rgħajja, għax safa fix-xejn dak li bih kienu jiftaħru; isma’ l-għajjat tal-ljuni, għax ġmiel il-Ġordan safa fix-xejn.

⁴Dan qal il-Mulej, Alla tiegħi: “Irgħa l-merħla lesta għall-qatla[30],

⁵li dawk li jixtruha joqtluha bla ma ħadd jgħidilhom xejn, u dawk li jbigħuha jgħidu: ‘Imbierek il-Mulej, stagħnejt!’; u li r-rgħajja tagħha ħniena ma tiġihomx minnha.

⁶Għax jien ma tiġinix iżjed ħniena minn dawk li jgħammru f’dan il-pajjiż, oraklu tal-Mulej. U, ara, jiena se nitlaq il-bnedmin kull wieħed f’idejn ir-ragħaj tiegħu, u f’idejn is-sultan tiegħu; huma jfarrku l-art, u jiena ma neħles ’il ħadd minn taħt idejhom.”

⁷U qgħadt jien nirgħa l-merħla lesta għall-qatla, għas-sensala tan-nagħaġ; u ħadt żewġt ibsaten, wieħed semmejtu ‘Ħlewwa’ u l-ieħor semmejtu ‘Rabta’, u qgħadt nirgħa l-merħla.

⁸U f’xahar wieħed ġibt fix-xejn it-tliet rgħajja. Imma n-nagħaġ dejquni, u huma wkoll saru ma jaħmlunix.

⁹Imbagħad għedt: “Ma nibqax iżjed ragħaj tagħkom! Ħa jmut min għandu jmut! Ħa jintemm min għandu jintemm! U dawk li jkun għad fadal jieklu laħam xulxin!”

¹⁰U ħadt il-bastun li kont semmejt ‘Ħlewwa’, u qsamtu, biex nikser il-patt li kont għamilt mal-ġnus kollha.

¹¹U hekk il-patt dakinhar inkiser; u mbagħad ir-rgħajja tal-merħla, li kienu qegħdin iħarsu lejja, għarfu li dik kienet il-kelma tal-Mulej.

¹²Għalhekk għedtilhom: “Jekk dan jidhrilkom li hu sewwa, agħtuni ħlasi; jekk le, tagħtuni xejn.” U wiżnuli bħala ħlasi tletin xekel tal-fidda[31].

¹³Imbagħad qalli l-Mulej: “Itfgħu fit-teżor, il-prezz sabiħ li bih stmawni.” U jien ħadt it-tletin xekel tal-fidda u tfajthom fit-teżor fit-tempju tal-Mulej.

¹⁴Imbagħad qsamt it-tieni bastun li kont semmejt ‘Rabta’, biex nikser ir-rabta ta’ aħwa bejn Ġuda u Iżrael.

¹⁵U qalli l-Mulej: “Ħu l-għodda ta’ ragħaj bla għaqal.

¹⁶Għax, ara, se nqajjem fil-pajjiż ragħaj li ma jħabbilx rasu minn dawk li se jinqerdu, dawk li jkunu neqsin ma jfittixhomx, lill-miġruħa ma jdewwihomx, lil dawk li huma f’saħħithom ma jweżinhomx, imma jiekol il-laħam ta’ dawk li huma msemmna u jqaċċtilhom sad-dwiefer tagħhom.

¹⁷Gwaj għalih ir-ragħaj bla għaqal, li jitlaq il-merħla weħidha! Ħa jolqotlu s-sejf lil driegħu u ’l għajnu l-leminija! Ħa jinxiflu sewwa driegħu, u dalma kbira tilħqu f’għajnu l-leminija!”