Read Maltese Bible with DC – IL-BIBBJA IL-KOTBA MQADDSA ŻAKKARIJA 13 Bible Online

ŻAKKARIJA 13 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 13

¹“Dakinhar jiġri li tinfetaħ għajn għad-dar ta’ David[35] u għan-nies ta’ Ġerusalemm, biex jindafu mill-ħtijiet u mit-tinġis.

²“U jiġri dakinhar, oraklu tal-Mulej tal-eżerċti, li jiena neqred mill-pajjiż l-isem tal-idoli, hekk li ma jibqax iżjed tifkira tagħhom; u nneħħi wkoll mill-pajjiż il-profeti u l-ispirtu mniġġes.

³U jekk xi ħadd ikun irid jerġa’ jagħmilha ta’ profeta, missieru u ommu li nissluh jgħidulu: ‘Int ma tibqax ħaj, għax qed tgħid kliem b’ieħor f’isem il-Mulej’; u missieru u ommu li nissluh jinfduh xħin ikun jagħmilha ta’ profeta.

⁴U jiġri, iva, dakinhar li kull profeta jibda jistħi mid-dehra li jkollu waqt li jkun iħabbar, u ma jxiddx fuqu l-mantell tax-xagħar[36] biex ikun jista’ jqarraq,

⁵imma jgħid: ‘Jien m’iniex profeta! Jien ħaddiem ir-raba’, għax ġidi, sa minn żgħożiti, hi l-ħamrija!’

⁶U jekk xi ħadd jistaqsih: ‘X’inhuma dawn il-ġrieħi fuq idejk[37]?” hu jwieġeb: ‘Dawn għamluhomli fid-dar ta’ ħbiebi.’ ”

⁷“Qum, sejf, għar-ragħaj tiegħi, għar-raġel sieħeb tiegħi,” oraklu tal-Mulej tal-eżerċti. Olqot ir-ragħaj ħa tixtered il-merħla. U jien indawwar idi kontra ż-żgħar.

⁸U jiġri li, fil-pajjiż kollu, oraklu tal-Mulej, tnejn minn kull tlieta jinqerdu, imutu, u jibqa’ wieħed minn kull tlieta,

⁹U ndaħħal fin-nar lil dan it-tielet, biex insaffih bħalma jsaffu l-fidda, u nippruvah bħalma jippruvaw id-deheb. Hu jsejjaħ ismi, u jien inwieġbu, u ngħid: ‘Dan il-poplu tiegħi’, u hu jgħid: ‘Il-Mulej hu Alla tiegħi.’ ”