Read Maltese Bible with DC – IL-BIBBJA IL-KOTBA MQADDSA ŻAKKARIJA 3 Bible Online

ŻAKKARIJA 3 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 3

¹Imbagħad urieni ’l Ġożwè, il-qassis il-kbir, wieqaf quddiem l-anġlu tal-Mulej, u x-Xitan bilwieqfa n-naħa tal-lemin tiegħu biex jixlih.

²U l-anġlu tal-Mulej qal lix-Xitan: “Jalla l-Mulej irażżnek, Xitan! Irażżnek il-Mulej li ħatar ’il Ġerusalemm! Jaqaw dan mhux qisu ħatba mkebbsa meħuda min-nar?”

³Issa Ġożwè, waqt li kien bilwieqfa quddiem l-anġlu, kien liebes ħwejjeġ maħmuġa[8].

⁴U l-anġlu qabad u kellem lil dawk li kienu bilwieqfa quddiemu u qalilhom: “Neħħulu l-ħwejjeġ maħmuġa minn fuqu.” U lilu qallu: “Ara, neħħejtlek ħżunitek minn fuqek; ħa jlibbsuk issa lbies prezzjuż.”

⁵U kompla jgħidilhom: “Qegħdulu turbant nadif fuq rasu.” U huma qegħdulu turbant nadif fuq rasu u xiddewlu l-ilbies. L-anġlu tal-Mulej kien hemm bilwieqfa.

⁶U l-anġlu tal-Mulej wissa lil Ġożwè u qallu:

⁷“Hekk jgħid il-Mulej tal-eżerċti: ‘Jekk int timxi fi triqati, u jekk tħares il-preċetti tiegħi, hekk ukoll tmexxi lil dari, u jkollok il-btieħi tiegħi taħt il-ħarsien tiegħek; u jiena nagħtik li tgħaddi fost dawk li huma weqfin hawn.

⁸“Issa isma’, Ġożwè, qassis il-kbir, int u sħabek li qegħdin quddiemek, għax huma awgurju għall-ġejjieni[9]. Għax ara, se nġib il-qaddej tiegħi, ir-Rimja.

⁹Għax ara, il-ġebla li jien qegħedt quddiem Ġożwè; fuq din il-ġebla waħda ta’ seba’ għajnejn[10], ara, se nonqox it-tinqix tagħha[11], oraklu tal-Mulej tal-eżerċti, u f’jum wieħed inneħħi l-ħażen ta’ din l-art.

¹⁰F’dak il-jum, oraklu tal-Mulej tal-eżerċti, intom tistiednu ’l xulxin taħt id-dielja u taħt it-tina tagħhom.”