Read Maltese Bible with DC – IL-BIBBJA IL-KOTBA MQADDSA ŻAKKARIJA 4 Bible Online

ŻAKKARIJA 4 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 4

¹U l-anġlu li kien ikellimni raġa’ qajjimni bħal meta bniedem jistenbaħ min-ngħas tiegħu.

²U qalli: “X’inti tara?” “Ara,” għedtlu jien, “qed nilmaħ imnara kollha kemm hi tad-deheb, u bieqja fuq il-quċċata tagħha, u seba’ msiebaħ fuqha, b’seba’ żennuniet għall-imsiebaħ ta’ fuqha;

³u wkoll żewġ siġriet taż-żebbuġ maġenbha, waħda fuq il-lemin tal-imnara u l-oħra fuq ix-xellug tagħha.”

⁴U qbadt ngħid lill-anġlu li kien ikellimni: “Dawn x’inhuma, sidi,” għedtlu.

⁵U l-anġlu li kien ikellimni qabad u qalli: “Ma tafx x’inhuma dawn?” “Le, sidi,” għedtlu jien.

⁶Imbagħad weġibni u qalli: “Din hi l-kelma tal-Mulej dwar Żerubbabel: La bil-ħila u lanqas bil-qawwa, imma bl-ispirtu tiegħi, qal il-Mulej tal-eżerċti.

⁷Int x’int, muntanja kbira? Quddiem Żerubbabel issir wita! U huwa joħroġ il-ġebla ta’ fuq nett fost l-għajjat ta’ ‘Xi ġmiel! Xi ġmiel!’ ”

⁸U waslitli l-kelma tal-Mulej, hekk:

⁹“Idejn Żerubbabel qiegħdu s-sisien ta’ dan it-tempju, u idejh iwassluh sat-tmiem. U intom tagħrfu li l-Mulej tal-eżerċti bagħatni għandkom.

¹⁰Għax dawk li maqdru l-jum tal-ħwejjeġ ta’ xejn, għad jifirħu xħin jaraw iċ-ċomb tal-qjies f’id Żerubbabel. “Dawn is-sebgħa huma għajnejn il-Mulej, li jiġru mal-art kollha.”

¹¹U jien staqsejtu: “X’inhuma dawn iż-żewġ siġriet taż-żebbuġ li hawn fuq il-lemin u fuq ix-xellug tal-imnara?”

¹²“U x’inhuma,” tennejt nistaqsih, “iż-żewġ friegħi taż-żebbuġ li hemm maġenb iż-żewġ kanen tad-deheb li minnhom qed jitferragħ iż-żejt?”

¹³Weġibni u qalli “Ma tafx x’inhuma dawk?” “Le, sidi,” għedtlu.

¹⁴“Dawn,” qalli, “huma ż-żewġ Midlukin biż-żejt[12] li hemm wieqfa quddiem Sid l-art kollha.”