Read Maltese Bible with DC – IL-BIBBJA IL-KOTBA MQADDSA ŻAKKARIJA 5 Bible Online

ŻAKKARIJA 5 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 5

¹U rġajt erfajt għajnejja, u ara, nilmaħ ktieb itir[13]!

²“X’inti tara?” qalli. “Qed nara ktieb itir,” weġibtu, “it-tul tiegħu hu ta’ għoxrin driegħ, u l-wisa’ għaxra.”

³Imbagħad qalli: “Din hi s-saħta ħierġa fuq wiċċ il-pajjiż kollu; għaliex skont ma hemm fiha, kull ħalliel għad jinqered minn hawn; skont ma hemm fiha, kull min jaħlef falz għad jinqered minn hawn.

⁴Kont jien li ħriġt din is-saħta, oraklu tal-Mulej tal-eżerċti, u hi se tidħol f’dar il-ħalliel u f’dar min jaħlef b’ismi fil-falz, u tibqa’ ġo daru, u ttemm lilha u l-injam tagħha u l-ġebel tagħha.”

⁵Imbagħad l-anġlu li kien ikellimni resaq u qalli: “Issa erfa’ ħarstek u ara x’inhi dil-ħaġa li riesqa.”

⁶“X’inhi?” staqsejtu. U hu weġibni: “Din li ħierġa hija efa[14],” qalli, “dan hu l-ħażen tagħhom fil-pajjiż kollu.”

⁷U ara, jintrefa’ l-għatu taċ-ċomb, u ġol-efa kien hemm mara bilqiegħda.

⁸“Din hija l-ħażen,” qalli, u xeħetha lura ġol-efa, u raġa’ għattieh bl-għatu taċ-ċomb.

⁹Imbagħad erfajt għajnejja u ħarist, u ara, kien hemm żewġ nisa resqin, bir-riħ fi ġwenħajhom, ġwenħajhom kienu bħal ġwenħajn iċ-ċikonja, u refgħu l-efa bejn l-art u s-sema.

¹⁰Jiena mbagħad staqsejt lill-anġlu li kien ikellimni: “Dawn fejn se jeħduha l-efa?”

¹¹“Biex jibnulha dar fl-art ta’ Singħar,” qalli, “u meta jlestuha, iqegħduha hemm, fil-bini tagħha.”