Read Maltese Bible with DC – IL-BIBBJA IL-KOTBA MQADDSA ŻAKKARIJA 6 Bible Online

ŻAKKARIJA 6 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 6

¹U għal darb’oħra rfajt għajnejja u ħarist; u ara, kien hemm erba’ karrijiet[15] ħerġin minn bejn iż-żewġ muntanji tal-bronż.

²Mal-karru ta’ quddiem kien hemm żwiemel ħomor, mat-tieni karru żwiemel suwed,

³mat-tielet karru żwiemel bojod, u żwiemel imnaqqxa u fuq tagħhom mar-raba’ karru.”

⁴U jiena qbadt u għedt lill-anġlu li kien ikellimni: “Dawn x’inhuma, sidi?”

⁵Weġibni l-anġlu u qalli: “Dawn huma l-erbat irjieħ tas-sema ħerġin minn quddiem Sid l-art kollha.

⁶Iż-żwiemel is-suwed sejrin lejn art it-Tramuntana; il-bojod sejrin wara dawn lejn art il-Punent; u l-imnaqqxin sejrin lejn art in-Nofsinhar.”

⁷U dawk fuq tagħhom ħarġu ħfief biex ifittxu jmorru ħa jiġġerrew mal-art. U qalilhom: “Morru ġġerrew mal-art.” U huma ġġerrew mal-art.

⁸Imbagħad sejjaħli u kellimni: “Ara,” qalli, “dawk li sejrin lejn art it-Tramuntana se jserrħu l-ispirtu tal-Mulej fuq art it-Tramuntana.”

⁹U waslitli l-kelma tal-Mulej u qalli:

¹⁰“Ħu l-offerti tal-itturufnati mingħand Ħeldaj u Tobija u Ġedajja, u mur int illum stess, mur għand Ġosija bin Sefanija, li ġie wkoll minn Babilonja.

¹¹U ħu fidda u deheb, agħmel kuruna u qegħedha fuq ras Ġożwè bin Ġeħosadak, il-qassis il-kbir.

¹²Kellmu u għidlu: ‘Hekk jgħid il-Mulej tal-eżerċti: “Ara l-bniedem li ismu hu r-Rimja[16]; mill-post fejn qiegħed hu għad jinbet u jibni s-santwarju tal-Mulej.

¹³Ikun hu li jibni s-santwarju tal-Mulej, u hu jieħu fuqu l-glorja ta’ sultan, u joqgħod jaħkem fuq it-tron tiegħu. U fuq il-lemin tiegħu jkun hemm qassis, u bejniethom it-tnejn ikun hemm ftehim ta’ sliem.”

¹⁴U l-kuruna tkun għal Ħeldaj, għal Tobija, għal Ġedajja, u għal Ġosija bin Sefanija, bħala tifkira fis-santwarju tal-Mulej.

¹⁵U l-imbegħdin jiġu u jibnu s-santwarju tal-Mulej. U intom tagħrfu li kien il-Mulej tal-eżerċti li bagħatni għandkom. U dan jiġri jekk intom tisimgħu u tagħtu widen għal-leħen tal-Mulej, Alla tagħkom.”