Read Maltese Bible with DC – IL-BIBBJA IL-KOTBA MQADDSA ŻAKKARIJA 7 Bible Online

ŻAKKARIJA 7 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 7

¹U ġara li fir-raba’ sena tas-sultan Dariju, fir-raba’ jum tad-disa’ xahar[17], li hu Kislew, il-kelma tal-Mulej waslet lil Żakkarija.

²U Betel-sareser[18], uffiċjal għoli tas-sultan, bagħat in-nies tiegħu biex jitolbu bil-ħniena quddiem il-Mulej,

³u jkellmu lill-qassisin tat-tempju tal-Mulej tal-eżerċti u lill-profeti u jgħidulhom: “Għandi jiena nibki fil-ħames xahar u nsum kif x’issa għamilt għal ħafna snin?

⁴Imbagħad waslitli l-kelma tal-Mulej tal-eżerċti u qalli:

⁵“Kellem lill-poplu tal-pajjiż u lill-qassisin, u għidilhom: Meta matul dawn is-sebgħin sena somtu u tnehidtu fil-ħames u fis-seba’ xahar[19], is-sawm minħabba fija somtuh?

⁶Huwa meta tieklu u tixorbu, mhux għalikom tkunu qegħdin tieklu u tixorbu?

⁷Mhux dan il-kliem li l-Mulej kien xandar permezz tal-profeti tal-imgħoddi, meta Ġerusalemm kienet mgħammra bin-nies u miexja bir-riżq, u l-bliet tagħha ta’ madwarha u l-art tan-Negeb u dik tal-wita kienu mgħammrin?”

⁸U l-kelma tal-Mulej waslet lil Żakkarija, hekk:

⁹“Hekk jgħid il-Mulej tal-eżerċti: Agħmlu l-ħaqq fis-sewwa; uru tjieba u ħniena bħal aħwa lil xulxin;

¹⁰taħqrux l-armla u l-iltim, il-barrani u l-fqir; tbejtux fi qlubkom deni għal xulxin.”

¹¹Iżda huma ma ridux jagħtu widen, tawni daharhom, saddew widnejhom li ma jmorrux jisimgħu,

¹²u webbsu qalbhom daqs id-djamant biex ma jobdux il-liġi u l-kliem tal-Mulej tal-eżerċti li kien bagħat bl-ispirtu tiegħu permezz tal-profeti tal-imgħoddi. Imbagħad tkebbset korla kbira min-naħa tal-Mulej tal-eżerċti.

¹³“U ġara li, bħalma hu sejjaħ u huma ma semgħux, hekk ukoll għad isejħu u jiena ma nismax,” jgħid il-Mulej tal-eżerċti;

¹⁴“u jiena xerridthom fost il-ġnus kollha li ma kinux jafu bihom. U l-art saret ħerba warajhom, bla ħadd ma jgħaddi minnha u jerġa’. Art l-hena għamluha ħerba.”