Read Maltese Bible with DC – IL-BIBBJA IL-KOTBA MQADDSA ŻAKKARIJA 9 Bible Online

ŻAKKARIJA 9 - Maltese Bible with DC – IL-BIBBJA IL-KOTBA MQADDSA bible

ŻAKKARIJA 9

¹Oraklu: Il-Mulej għadda mill-art ta’ Ħadrak[21], u Damasku l-post tal-mistrieħ tiegħu; għax tal-Mulej huma bliet Aram, u kull tribù ta’ Iżrael.

²U Ħamat ukoll, li tmiss miegħu, u Tir u Sidon, għad li għerfhom kbir.

³Għaliha nfisha Tir bniet fortizza, u ġabret fidda bħat-trab, u deheb bħat-tajn tat-triqat.

⁴Ara, is-Sid għad jagħmilha priża u ġidha jwaddabhulha fil-baħar,

⁵Askalon tara dan u tibża’, titkexkex Gaża, u Għekron ukoll, għax it-tama tagħha tisfa fix-xejn. Is-sultan jgħib minn Gaża, Askalon ma tkunx mgħammra bin-nies,

⁶u nies ta’ demm imħallat jgħammru f’Asdod! U jiena neqred il-kburija tal-Filistin,

⁷demmhom inneħħilhom minn fommhom, u t-tinġis tagħhom minn bejn snienhom; isiru huma wkoll fdal lil Alla tagħna[22], u jkunu bħal familja f’Ġuda, u Għekron bħall-Ġebusin[23].

⁸U noqgħod għassa madwar Dari[24], biex ħadd ma joqgħod dieħel u ħiereġ, u ma jidħolx aktar għalihom min jaħqarhom, għax issa rajt l-hemm tagħhom.

⁹Ifraħ kemm tiflaħ, bint Sijon; għajjat bil-ferħ, bint Ġerusalemm! Ara, is-sultan tiegħek ġej għandek[25]; ġust u rebbieħ, umli u riekeb fuq ħmar, fuq felu ta’ ħmara.

¹⁰Hu jeqred il-karru minn Efrajm u ż-żiemel minn Ġerusalemm; jinqered il-qaws tal-gwerra. Hu jxandar il-paċi lill-ġnus, il-ħakma tiegħu tkun minn baħar sa baħar, u mix-xmara tal-Ewfrat sat-trufijiet.

¹¹Int ukoll, minħabba d-demm tal-patt tiegħek[26] li għamilt miegħi, nitlaqlek l-ilsiera tiegħek ħielsa mill-ħofra fejn ma hemmx ilma.

¹²U jerġgħu lura għandek, bint Sijon, l-ilsiera li qegħdin bit-tama[27]. Mil-lum stess inħabbar li għad irroddlok id-doppju.

¹³Għax il-qaws tiegħi, li hu Ġuda, hu miġbud, armajtu bil-vleġġa, li hi Efrajm. Se nvenven ’l uliedek bħal lanza, Sijon, kontra wliedek, Ġawan[28], u nagħmlek bħal sejf ta’ gwerrier.

¹⁴Imbagħad il-Mulej jidher fuqhom, u toħroġ bħal berqa l-vleġġa tiegħu. Il-Mulej Sidi jdoqq it-tromba, u jimxi ’l quddiem fit-tempesti tan-Nofsinhar.

¹⁵Il-Mulej tal-eżerċti jħarishom, u jaslu li xejn ma jqisu ċ-ċagħak tal-iżbandoli; ixejnuhom u jisħquhom taħt riġlejhom. Id-demm jixorbuh qisu nbid, u jimtlew bih bħall-kantunieri tal-artal.

¹⁶Dakinhar isalvahom il-Mulej, Alla tagħhom, jirgħa l-poplu tiegħu bħal merħla, għax bħal ġawhar prezzjuż ta’ dijadema jkunu jleqqu fuq l-art tiegħu.

¹⁷Xi tjubija u xi ġmiel ikun fiha! Il-qamħ jaħji ż-żgħażagħ, u l-inbid ġdid it-tfajliet.