Read Maltese Bible with DC – IL-BIBBJA IL-KOTBA MQADDSA MALAKIJA 1 Bible Online

MALAKIJA 1 - Maltese Bible with DC – IL-BIBBJA IL-KOTBA MQADDSA bible

MALAKIJA 1

¹Oraklu. Il-kelma tal-Mulej lil Iżrael permezz ta’ Malakija.

²“Ħabbejtkom,” jgħid il-Mulej. “Imma intom tgħidu: ‘Fiex ħabbejtna?’ Jaqaw Għesaw mhux ħu Ġakobb? Oraklu tal-Mulej. Madankollu jien lil Ġakobb ħabbejtu[1];

³imma lil Għesaw bgħadtu, u l-muntanji tiegħu għamilthomlu xagħra, u l-art li wiret ħallejthielu għax-xakalli tad-deżert.”

⁴Jekk Edom jgħid: “Aħna tfarrakna, imma dak li ġġarraf nerġgħu nibnuh,” dan jgħid il-Mulej tal-eżerċti: “Huma jibnu, u jiena nħott! U jibdew isejħulhom ‘Art il-ħażen’ u ‘Il-poplu li l-Mulej hu dejjem inkurlat għalih’.

⁵U mbagħad għajnejkom jaraw, u tgħidu: ‘Kbir il-Mulej, aktar lil hemm minn trufijiet Iżrael!’

⁶“L-iben iweġġaħ lil missieru, u l-qaddej lil sidu. Jekk mela jiena missier, fejn hu t-tweġġiħ tiegħi? U jekk jiena Sid, fejn hu l-biża’ minni? Jgħid il-Mulej tal-eżerċti lilkom, qassisin li żżebilħu ismi. Imma intom tgħidu: ‘Fiex żeblaħnieh Ismek?’

⁷Billi fuq l-artal tiegħi toffru ikel imniġġes. Imma intom tgħidu: ‘Biex niġġisnieh?’ Billi intom mingħalikom li l-mejda tal-Mulej jista’ wieħed imaqdarha.

⁸U jekk toffru vittma għamja[2], dan mhu xejn ħażin? U jekk toffru vittma magħtuba jew marida, mhu xejn ħażin dan? Mur, isa, offriha lill-gvernatur tiegħek: se jieħu gost bik. Jilqgħek tajjeb?” Jgħid il-Mulej tal-eżerċti.

⁹U issa morru itolbu lil Alla biex iħenn għalina. Jekk dan iseħħ min-naħa tagħkom, taħsbu intom li se jilqagħkom tajjeb? Jgħid il-Mulej tal-eżerċti.

¹⁰“Mhux li fostkom kien hemm xi ħadd li jsakkar il-bibien ħalli ma tkebbsux nar għal xejn fuq l-artal tiegħi! M’għandix pjaċir bikom,” jgħid il-Mulej tal-eżerċti, “u minn idejkom ma nilqax offerti.

¹¹Għax minn tlugħ ix-xemx sa nżulha kbir hu ismi fost il-ġnus, u kullimkien isir lil Ismi sagrifiċċju bl-inċens u offerta safja[3], għax kbir hu Ismi fost il-ġnus,” jgħid il-Mulej tal-eżerċti.

¹²“Imma intom tipprofanawh meta tgħidu li l-mejda tas-Sid hija mniġġsa u l-ikel ta’ fuqha hu ta’ min imaqdru.

¹³U intom tgħidu: ‘Ara, xi dwejjaq!’, u taqbdu tonfħu,” jgħid il-Mulej tal-eżerċti. Intom iġġibu vittmi misruqa u dak li hu magħtub u dak li hu marid, u dan iġġibuh bħala offerta. U jien se nilqagħha minn idejkom?” Jgħid il-Mulej tal-eżerċti.

¹⁴Misħut il-wiċċ b’ieħor li fil-merħla tiegħu għandu bhima raġel u jwiegħdu lil Alla, u mbagħad lis-Sid joffrilu b’sagrifiċċju dak li hu difettuż. “Għax jien Sultan kbir,” jgħid il-Mulej tal-eżerċti, “u ismi ta’ min jibża’ minnu fost il-ġnus.”