Read Maltese Bible with DC – IL-BIBBJA IL-KOTBA MQADDSA MALAKIJA 2 Bible Online

MALAKIJA 2 - Maltese Bible with DC – IL-BIBBJA IL-KOTBA MQADDSA bible

MALAKIJA 2

¹“U issa għalikom, qassisin, huwa dan il-kmandament:

²Jekk intom ma tisimgħux, u jekk ma tfittxux minn qalbkom li ssebbħu lil ismi,” jgħid il-Mulej tal-eżerċti, “jiena nibgħat fuqkom is-saħta, u nisħet il-barkiet tagħkom. Anzi ġa sħetthomlkom, għax intom dan ma tfittxuhx minn qalbkom.

³Ara, jien se naqlgħalkom dirgħajkom barra u nwaddab il-ħmieġ ma’ wiċċkom, il-ħmieġ tal-festi tagħkom, u lilkom narmikom miegħu.

⁴Imbagħad tagħrfu li kont jien li bgħatthulkom dan il-kmandament, biex jibqa’ l-patt tiegħi ma’ Levi,” jgħid il-Mulej tal-eżerċti.

⁵“Il-patt tiegħi miegħu kien dan: il-ħajja u s-sliem, u jien tajthomlu; il-biża’ minni, u hu beża’ minni, u kien kollu mistħija quddiem ismi.

⁶Kellu f’fommu tagħlim is-sewwa, u ebda ħażen ma nstablu fuq xufftejh; bis-sliem u r-reqqa mexa miegħi, u ħafna bnedmin reġġagħhom lura minn ħżunithom.

⁷“Għax xufftejn il-qassis għandhom iħarsu l-għerf, u n-nies minn fommu jfittxu t-tagħlim, għax hu l-messaġġier tal-Mulej tal-eżerċti.

⁸Imma intom twarrabtu mit-triq; ġagħaltu ’l ħafna jitfixklu bit-tagħlim tagħkom; ħassartu l-patt ta’ Levi,” jgħid il-Mulej tal-eżerċti.

⁹“Għalhekk jien ukoll tlaqtkom għaż-żebliħ u għat-tmaqdir tal-poplu kollu, bħalma intom ma żammejtux triqati, u ħaristu lejn l-uċuħ fit-tagħlim tagħkom.”

¹⁰Mhux Missier wieħed għandna lkoll kemm aħna? Mhux Alla wieħed ħalaqna? Mela għaliex nimxu bil-qerq bejnietna u nonqsu mill-ġieħ lejn il-patt ta’ missirijietna?

¹¹Ġuda mexa bil-qerq, sar ħaġa mistkerrha f’Iżrael u f’Ġerusalemm, għax Ġuda naqas mill-ġieħ lejn is-santwarju għażiż għall-Mulej, u żżewweġ ma’ bint ta’ alla stranġier[4].

¹²Jalla l-Mulej, bħala xhieda u tweġiba, jaħsad il-bniedem li jagħmel dan mit-tined ta’ Ġakobb u minn dawk li jġibu offerti lill-Mulej tal-eżerċti!

¹³Terġa’ dan ukoll tagħmlu: intom tiksu l-artal tal-Mulej bid-dmugħ u bil-biki u bit-tnehid, għax m’għadux aktar jagħti wiċċ lill-offerta tagħkom u jilqagħha bil-qalb minn idejkom.

¹⁴U intom tgħidu: “Għaliex?” Għax bejnek u bejn il-mara ta’ żgħożitek hemm xhud il-Mulej; u int qarraqt biha, għad li hi s-sieħba tiegħek u l-mara li magħha ntrabatt.

¹⁵U ma għamilhiex l-istess Alla, li jkollha ġisem u ruħ? U xi jrid dan il-wieħed? Nisel skont Alla! Ħarsu rwieħkom, mela, u qisu li ħadd ma jqarraq bil-mara ta’ żgħożitu.

¹⁶“Għax jiena d-divorzju nobogħdu[5],” jgħid il-Mulej, Alla ta’ Iżrael, “u lil min jiksi lbiesu bil-ħażen,” jgħid il-Mulej tal-eżerċti. “Mela ħarsu rwieħkom, u tkunux qarrieqa!”

¹⁷Dejjaqtuh il-Mulej bid-diskorsi tagħkom! Imma intom tgħidu: “Biex dejjaqnieh?” Billi tgħidu: “Dawk kollha li jagħmlu l-ħażen huma tajbin f’għajnejn il-Mulej, u hu fihom isib l-għaxqa”, jew tgħidu: “Fejn hu Alla tal-ġustizzja?”