Read Maltese Bible with DC – IL-BIBBJA IL-KOTBA MQADDSA MALAKIJA 3 Bible Online

MALAKIJA 3 - Maltese Bible with DC – IL-BIBBJA IL-KOTBA MQADDSA bible

MALAKIJA 3

¹“Araw, jiena se nibgħat il-messaġġier tiegħi[6] biex iħejji t-triq quddiemi, u minnufih jidħol fit-tempju tiegħu s-Sid li intom qegħdin tfittxu; u l-anġlu tal-patt, li intom tixtiequ, arawh, ġej!” jgħid il-Mulej tal-eżerċti.

²Imma min se jissaporti l-Jum tal-miġja tiegħu? U min hu li se jieqaf meta jidher? Għax hu bħan-nar ta’ wieħed li jsaffi u bħas-sapun tal-ħassiela.

³U joqgħod isaffi u jnaddaf il-fidda, u jnaddaf ’l ulied Levi, u jsaffihom bħad-deheb u l-fidda, u huma jsiru għall-Mulej nies li jagħmlu l-offerta bis-sewwa.

⁴U tibda togħġbu lill-Mulej l-offerta ta’ Ġuda u ta’ Ġerusalemm bħal dari, bħal fis-snin l-imgħoddija.

⁵“Imbagħad nersaq lejkom biex nagħmel il-ġustizzja, u nkun xhud ħafif kontra s-saħħara, u kontra ż-żienja, u kontra min jaħlef bil-qerq, u kontra min jaħqar il-ħaddiem fi ħlasu u l-armla u l-iltim, u kontra min iwarrab il-barrani u ma jibżax minni,” jgħid il-Mulej tal-eżerċti.

⁶“Għax jien, il-Mulej, ma tbiddiltx; u intom, ulied Ġuda, ma ntemmejtux.

⁷Sa minn żmien missirijietkom twarrabtu mill-preċetti tiegħi u ma ħaristuhomx. Erġgħu lura lejja, u jien nerġa’ lura lejkom,” jgħid il-Mulej tal-eżerċti. “Imma intom tgħidu: ‘Fuqiex nerġgħu lura?’

⁸Jista’ bniedem jisraq lil Alla? Madankollu intom qegħdin tisirquni. Imma intom tgħidu: ‘Xi sraqniek?’ Fid-dieċmi u fl-offerti.

⁹Misħutin intom għall-aħħar, għax intom qegħdin tisirquni, il-poplu kollu.

¹⁰Ġibuhom sħaħ id-dieċmi u l-offerti fit-teżor, ħa jkun hemm l-ikel f’dari. U b’hekk ejjew ġarrbuni,” jgħid il-Mulej tal-eżerċti; “taraw jekk niftaħx għalikom it-twieqi tas-sema, u jekk insawwabx fuqkom barka bl-abbundanza.

¹¹U minħabba fikom inċanfar il-ġrad wikkiel biex ma jeqridilkomx il-frott tal-art, u biex id-dielja ma twaqqgħalkomx l-għenieqed fl-għalqa,” jgħid il-Mulej tal-eżerċti.

¹²“Imbagħad il-ġnus kollha jsejħulkom hienja, għax intom tkunu art li fiha għaxqa,” jgħid il-Mulej tal-eżerċti.

¹³“Iebes għalija kliemkom,” jgħid il-Mulej. “Imma intom tgħidu, ‘X’għedna kontrik?’

¹⁴Intom tgħidu: ‘Hu għal xejn li taqdi lil Alla! U x’jiswa jekk ħarisna t-twissijiet tiegħu u jekk imxejna b’qalb imnikkta quddiem il-Mulej tal-eżerċti?

¹⁵Mela issa ħa nsejħulhom aħna hienja n-nies kburin; dawk kollha li jagħmlu l-ħażen mhux biss imurilhom kollox bir-riżq, imma wkoll meta jġarrbu ’l Alla jeħilsuha ħafif!’ ”

¹⁶Hekk qalu wieħed lil ieħor dawk li jibżgħu mill-Mulej; u l-Mulej ta widen u sama’; u nkiteb quddiemu ktieb it-tifkiriet[7] minħabba f’dawk li jibżgħu minnu u dawk li jafdaw f’Ismu.

¹⁷“U fil-jum imħejji minni,” jgħid il-Mulej tal-eżerċti, “huma jkunu għalija teżor liema bħalu, u nagħdirhom kif raġel jagħder lil ibnu li jaqdih.”

¹⁸Imbagħad mill-ġdid tagħrfu tagħżlu bejn il-ġust u l-ħażin, bejn min jaqdi ’l Alla u min ma jaqdihx.

¹⁹“Għax, ara, jiġi l-Jum, jaqbad qisu forn, u l-kburin kollha u dawk kollha li jagħmlu l-ħażen ikunu tiben, u l-jum li ġej għad jaħraqhom,” jgħid il-Mulej tal-eżerċti, “hekk li ma jħallilhom la għerq u lanqas fergħa.

²⁰Imma għalikom li tibżgħu minn ismi titla’ x-xemx tal-ġustizzja, bis-salvazzjoni fuq ġwenħajha; u intom toħorġu taqbżu qiskom għoġiela tal-mandra.

²¹U tisħqu l-ħżiena, għax huma jkunu qishom irmied taħt qigħan riġlejkom fil-jum imħejji minni,” jgħid il-Mulej tal-eżerċti.

²²“Ftakru fil-Liġi ta’ Mosè, il-qaddej tiegħi, fil-preċetti u l-kmandamenti li jiena fuq Ħoreb ordnajtlu għal Iżrael kollu.

²³“Ara, jiena nibagħtilkom ’l Elija[8] l-profeta qabel ma jasal Jum il-Mulej u Jum il-biża’.

²⁴U jdawwar qalb il-missirijiet lejn uliedhom u qalb l-ulied lejn missirijiethom, li ma niġix naħbat għall-art u nħalliha tinqered.”