Read Maltese Bible with DC – IL-BIBBJA IL-KOTBA MQADDSA 1 MAKKABIN 4 Bible Online

1 MAKKABIN 4 - Maltese Bible with DC – IL-BIBBJA IL-KOTBA MQADDSA bible

1 MAKKABIN 4

¹Gorġja ħa miegħu ħamest elef fanterija u elf kavallier magħżula, u l-istakkament telaq billejl

²biex jintefgħu fuq il-kamp tal-Lhud u jaħbtu għalihom għal għarrieda: xi nies mill-Akra kienu juruhom it-triq.

³Ġuda, malli sama’, telaq bil-qalbiena tiegħu biex jaħbat għall-eżerċtu tas-sultan, li kien ħdejn Emmaws,

⁴waqt li l-istakkament kien għadu ’l bogħod mill-kamp.

⁵U Gorġja wasal fil-kamp ta’ Ġuda u ma sab lil ħadd, u telaq ifittixhom fuq l-għoljiet, għax qal: “Ħarbu minn quddiemna.”

⁶Mas-sebħ deher Ġuda fil-wita bi tlitt elef raġel, imma ma kellhomx tarkiet u xwabel kemm kienu jridu.

⁷U raw il-kamp tal-Ġentili qawwi u ffortifikat b’parapett madwaru u bil-kavallerija dawramejt miegħu, kollha nies imħarrġa fil-ġlied.

⁸Ġuda mbagħad kellem lill-irġiel li kellu miegħu: “La tibżgħux mill-kotra tagħhom, u la tinħasdux meta jaħbtu għalikom.

⁹Ftakru kif kienu meħlusa missirijietna fil-Baħar l-Aħmar, meta l-Fargħun għamel għal warajhom bl-eżerċtu tiegħu.

¹⁰U issa ngħollu leħenna lejn is-sema! Għandu mnejn iħenn għalina u jiftakar fil-Patt ma’ missirijietna u jfarrak dan l-eżerċtu llum quddiemna.

¹¹U l-Ġentili kollha jkunu jafu li hawn min jifdi u jsalva lil Iżrael.”

¹²Meta l-barranin refgħu għajnejhom u rawhom resqin għal fuqhom,

¹³ħarġu mill-kamp għall-battalja. In-nies ta’ Ġuda daqqew it-trombi,

¹⁴u bdew jitqabdu, u l-Ġentili tkissru u ħarbu lejn il-wita;

¹⁵u dawk li kienu fuq wara nqerdu bix-xabla. U baqgħu sejrin warajhom sa Geżer u sal-witat tal-Idumija, Ażotu u Ġamnija[24]; u nqerdu minnhom xi tlitt elef raġel.

¹⁶Meta Ġuda raġa’ lura bl-eżerċtu tiegħu mill-ġiri warajhom

¹⁷qal lill-poplu: “Tfittxux il-priża, għax hemm battalja oħra lesta għalina.

¹⁸Gorġja bl-eżerċtu tiegħu fuq l-għoljiet hu qribna. Mela issa żommu sħiħ kontra l-għedewwa tagħna u ġġildulhom, u wara dan ħudu l-priża b’moħħkom mistrieħ.”

¹⁹Kien għadu jitkellem meta dehret qatgħa suldati jitkixxfu minn fuq l-għolja.

²⁰U raw li sħabhom kienu ħarbu, u l-kamp mogħti n-nar, għax id-duħħan li raw kien biżżejjed biex jurihom x’kien ġara.

²¹Malli raw dan qabadhom biża’ kbir, u xħin intebħu bl-eżerċtu ta’ Ġuda fil-wita lest għal taqbida

²²ħarbu lkoll lejn art il-Filistin[25].

²³Imbagħad Ġuda raġa’ lura għall-priża fil-kamp, u ħadu ħafna deheb u fidda, drapp ta’ lwien vjola, qroll u ġid kbir.

²⁴Huma u rieġgħa lura bdew ikantaw u jfaħħru s-sema “għax hu tajjeb u l-ħniena tiegħu għal dejjem.”

²⁵Kienet rebħa kbira għal Iżrael dakinhar.

²⁶Dawk il-barranin li rnexxielhom isalvaw, marru għand Lisja u għarrfuh b’kulma kien ġara.

²⁷Malli sama’ b’dan tħawwad u qata’ qalbu, għaliex ma ġarax f’Iżrael dak li kien jixtieq, u ma seħħx dak li kien ordna hu s-sultan.

²⁸Fis-sena ta’ wara ġabar sittin elf raġel magħżula u ħamest elef kavallier biex jaħbat għalihom.

²⁹U telaq għall-Idumija u waqqaf il-kamp f’Betsur[26]; u Ġuda ħareġ għalihom b’għaxart elef ruħ.

³⁰Kif ra l-qawwa tal-eżerċtu beda jitlob u jgħid: “Imbierek int, is-Salvatur ta’ Iżrael, li ġibt fix-xejn l-attakk tal-ġgant permezz ta’ David, il-qaddej tiegħek, u rħejt l-eżerċtu tal-Filistin f’idejn Ġonatan bin Sawl u t-tarkier tiegħu.

³¹Hekk erħi lil dan l-eżerċtu f’idejn Iżrael, il-poplu tiegħek, ħa jitħawdu bil-forzi u l-kavallerija tagħhom kollha.

³²Imliehom bil-biża’ u neħħilhom il-fiduċja li għandhom fil-forza tagħhom, ħa jitriegħdu bit-telfa tagħhom.

³³Middhom fl-art bix-xabla ta’ dawk li jħobbuk, biex jgħannu tifħirek dawk kollha li jagħrfu ismek.”

³⁴U ħabtu għal xulxin, u mill-eżerċtu ta’ Lisja waqgħu madwar ħamest elef raġel, u mietu quddiemhom.

³⁵Malli Lisja ra l-eżerċtu tiegħu maħrub, u għaraf il-kuraġġ tal-eżerċtu ta’ Ġuda, u kif dawn kienu lesti li jgħixu jew imutu bl-unur, raġa’ lura lejn Antjokja. Hemmhekk hu qabbad merċenarji oħra bil-ħsieb li jerġa’ jmur il-Lhudija b’eżerċtu akbar minn ta’ qabel.

³⁶Ġuda u ħutu qalu: “Araw, l-għedewwa tagħna tkissru, ħa nitilgħu nnaddfu t-tempju u nerġgħu nikkonsagrawh.”

³⁷U nġabar l-eżerċtu kollu u telgħu fuq l-għolja ta’ Sijon.

³⁸U raw it-tempju ħerba waħda, l-artal imniġġes, il-bwieb maħruqa, il-ħaxix iħaddar fil-btieħi qisu f’masġar jew fuq xi għolja, u l-kmamar imġarrfa.

³⁹U ċarrtu ħwejjiġhom, bkew biki kbir, u tefgħu l-irmied fuq rashom,

⁴⁰u nxteħtu wiċċhom fl-art; imbagħad mas-sinjal tat-trombi bdew jgħajtu lejn is-sema.

⁴¹Ġuda ta l-ordni lit-truppi biex jaħbtu għal dawk li kienu fl-Akra, sa ma jnaddfu t-tempju.

⁴²Imbagħad Ġuda għażel qassisin bla difett li jħobbu l-Liġi,

⁴³u naddaf it-tempju, u warrbu l-ġebel ipprofanat f’post imniġġes.

⁴⁴Imbagħad bdew jaħsbu x’se jagħmlu bl-artal imniġġes tas-sagrifiċċji tal-ħruq.

⁴⁵Ġiehom il-ħsieb għaqli li jħottuh, biex ma jibqax ta’ għajb għalihom, billi kienu niġġsuh il-Ġentili. Ġarrfu l-artal

⁴⁶u poġġew il-ġebel fuq l-għolja tat-tempju, f’post xieraq, sa ma jiġi profeta jgħidilhom x’jagħmlu bih.

⁴⁷U ħadu ġebel mhux minġur skont il-Liġi, u bnew artal ġdid bħal dak ta’ qabel

⁴⁸u rrestawraw is-santwarju u l-inħawi ta’ ġewwa tat-tempju, u l-btieħi kkonsagrawhom.

⁴⁹U għamlu tagħmir ġdid ikkonsagrat u qiegħdu l-imnara, u l-artal tal-inċens, u l-mejda tal-ħobż tal-preżenza fis-santwarju.

⁵⁰Ħarqu l-inċens fuq l-artal u xegħlu l-imsiebaħ tal-imnara u dawn bdew jiddu fis-santwarju.

⁵¹U poġġew il-ħobż fuq il-mejda, u dendlu l-purtieri. Hekk temmew ix-xogħol kollu li kienu ndaħlu għalih.

⁵²U bakkru mas-sebħ tal-ħamsa u għoxrin[27] tad-disa’ xahar, ix-xahar ta’ Kaslew, tas-sena 148.

⁵³U offrew sagrifiċċju skont ma titlob il-Liġi fuq l-artal il-ġdid tas-sagrifiċċju tal-ħruq, li kienu għamlu.

⁵⁴Sewwasew fl-istess żmien u fl-istess jum li fih il-Ġentili kienu niġġsuh, l-artal kien ikkonsagrat bil-kant u d-daqq taċ-ċetri, l-arpi u ċ-ċnieċel.

⁵⁵U l-poplu kollu nxteħet wiċċu fl-art u taw qima u bdew ibierku s-sema li tahom ir-risq.

⁵⁶U ċċelebraw il-festa tal-konsagrazzjoni mill-ġdid tal-artal għal tmint ijiem, u offrew ferħana sagrifiċċji tal-ħruq, sagrifiċċji tas-sliem u sagrifiċċji ta’ radd il-ħajr.

⁵⁷U żejnu l-faċċata tat-tempju b’kuruni tad-deheb u tarki żgħar; ġeddew il-bibien u l-kmamar u qegħdulhom il-bibien.

⁵⁸Kien hemm ferħ kbir fost il-poplu għax tħassar l-għajb tal-Ġentili.

⁵⁹Ġuda u ħutu mal-ġemgħa kollha ta’ Iżrael qatgħuha li jiem il-konsagrazzjoni tal-artal ikunu ċċelebrati f’waqthom bil-ferħ u l-hena kull sena, għal tmint ijiem mill-ħamsa u għoxrin ta’ Kislew ’il quddiem[28].

⁶⁰Dak iż-żmien bnew madwar l-għolja ta’ Sijon ħitan għolja u torrijiet qawwijin, biex ma jerġgħux jiġu l-Ġentili jitfgħuha taħt is-saqajn bħal qabel.

⁶¹Ġuda mbagħad ħalla l-għases biex iħarsuha; iffortifika wkoll Betsur, biex il-poplu jkollu fortizza biswit l-Idumija.