Read Maltese Bible with DC – IL-BIBBJA IL-KOTBA MQADDSA 1 MAKKABIN 9 Bible Online

1 MAKKABIN 9 - Maltese Bible with DC – IL-BIBBJA IL-KOTBA MQADDSA bible

1 MAKKABIN 9

¹Meta Demetriju sama’ li Nikanor bl-eżerċtu tiegħu baqa’ mejjet fil-battalja, qatagħha li jerġa’ jibgħat lil Bakkidi u lil Alċimu fl-art ta’ Ġuda bit-taqsima l-leminija tal-eżerċtu magħhom.

²Qabdu t-triq ta’ Gilgal[56] u waqqfu l-kamp f’Mesalot ħdejn Arbela; qabduha u qatlu ħafna nies.

³Fl-ewwel xahar tas-sena 152[57] waqqfu l-kamp ħdejn Ġerusalemm.

⁴Imbagħad telqu u marru Berija[58] b’għoxrin elf raġel u elfejn żiemel.

⁵Ġuda kien waqqaf il-kamp f’Elasa bi tlitt elef raġel magħżula.

⁶Malli dawn raw li l-forzi tal-eżerċtu kienu kbar ħafna qabadhom biża’ kbir ħafna u ħarbu mill-kamp, u ma baqgħux miegħu ħlief tmien mitt ruħ.

⁷Kif ra Ġuda li l-eżerċtu tiegħu sfaxxalu, u l-battalja kienet waslet biex tibda minn mument għal ieħor, ħass għafsa ta’ qalb għax ma kellux żmien biex jiġborhom.

⁸B’jiesu maqtugħ kellem lil dawk li kien fadal: “Isaw, qumu ħa naħbtu għall-għedewwa tagħna, ħa naraw għandniex il-ħila negħlbuhom.”

⁹Iżda huma ppruvaw idawruh u qalulu: “Għalissa ma nistgħu nagħmlu xejn ħlief insalvaw ħajjitna, imbagħad nerġgħu lura ma’ ħutna, u niġġildulhom; bħalissa aħna ftit wisq.”

¹⁰U Ġuda wieġeb: “Ma jkun qatt li jien nagħmel dan, li naħrab minnhom! Jekk is-siegħa tagħna waslet, ħa mmutu ta’ rġiel li aħna għal ħutna, u ma nħallu qatt li jittabba’ ġieħna!”

¹¹L-eżerċtu tal-għadu ħareġ mill-kamp u ħadu posthom kontrihom. Il-kavallerija tqassmet fi tnejn; quddiem l-eżerċtu kienu miexja l-waddaba tal-iżbandoli u l-vleġeġ, u fl-ewwel filliera kien hemm l-aqwa gwerriera. Bakkidi kien fil-ġenb tal-lemin.

¹²L-eżerċtu avanza f’żewġ taqsimiet, huma u jdoqqu t-trombi; u daqqew it-trombi wkoll in-nies ta’ Ġuda.

¹³L-art triegħdet bil-ħsejjes tal-eżerċti, u l-battalja damet sejra minn filgħodu sa filgħaxija.

¹⁴Xħin Ġuda ntebaħ li Bakkidi u l-aqwa tal-eżerċtu kienu fuq il-lemin, inġabru l-qalbenin kollha miegħu,

¹⁵u kisser il-qtajja’ tal-lemin, u għamel għal warajhom sa taħt il-muntanja[59] Ażotu.

¹⁶Dawk li kienu fuq ix-xellug, imbagħad, meta raw li n-naħa tal-lemin tħarbtet, daru minn wara għal Ġuda u n-nies li kienu miegħu;

¹⁷u l-battalja qlielet u waqgħu ħafna midrubin minn naħa u minn oħra;

¹⁸u baqa’ mejjet ukoll Ġuda, u l-bqija ħarbu.

¹⁹Ġonatan u Xmun imbagħad ħadu ’l Ġuda ħuhom u difnuh fil-qabar ta’ missirijiethom f’Modin.

²⁰U bkewh u xehru għalih l-Iżraelin kollha u għamlu l-vistu għal ħafna jiem. U bdew jgħidu:

²¹“Kif waqa’ l-qalbieni, is-salvatur ta’ Iżrael!”

²²Il-bqija ta’ kulma għamel Ġuda, il-gwerer u l-għemejjel qalbiena u l-kobor tiegħu ma nkitbux, għax kienu ħafna.

²³Ġara li wara l-mewt ta’ Ġuda r-rinnegati reġgħu refgħu rashom fl-art kollha ta’ Iżrael, u tfaċċaw mill-ġdid dawk kollha li kienu jagħmlu d-deni.

²⁴F’dak iż-żmien waqa’ għaks kbir sewwa, u l-art donnha daret għal magħhom.

²⁵Bakkidi għażel nies midgħajja u għamilhom kapijiet tal-pajjiż.

²⁶Dawn bdew ifittxu u jitkixxfu fuq il-ħbieb ta’ Ġuda u jġibuhom quddiem Bakkidi. U hu kien jivvendika ruħu minnhom u jwaqqagħhom għaż-żufjett.

²⁷Kien waqa’ għalhekk hemm kbir f’Iżrael, li qatt ma kien hemm bħalu minn meta deher profeta fosthom.

²⁸Imbagħad iltaqgħu l-ħbieb kollha ta’ Ġuda u qalu lil Ġonatan:

²⁹“Minn mindu miet ħuk Ġuda, m’hawnx bniedem bħalu biex imexxina kontra l-għedewwa u Bakkidi u kontra dawk minn ġensna li jobogħduna.

³⁰Issa, mela, ħa nagħżluk illum kap tagħna floku u mexxej tagħna biex tmexxi t-taqbid u l-battalji tagħna.”

³¹U Ġonatan dakinhar aċċetta l-kmand u laħaq flok ħuh Ġuda.

³²Malli sar jaf b’dan, Bakkidi beda jfittxu biex joqtlu.

³³Iżda Ġonatan, Xmun ħuh, u dawk kollha li kienu miegħu indunaw, ħarbu lejn id-deżert ta’ Tekugħa, u waqqfu l-kamp ħdejn il-ġiebja ta’ Asfar.

³⁴Bakkidi sar jaf b’dan f’jum is-Sibt[60], u telaq bl-eżerċtu tiegħu kollu u qasam il-Ġordan.

³⁵Ġonatan imbagħad bagħat lil ħuh Ġwanni, il-kmandant tal-kotra, biex jitlob lin-Nabatin ħbiebu, biex iħalli għandhom il-ħafna tagħmir li kellhom.

³⁶Imma minn Medeba[61] ħarġu wlied Ġambri u ħatfu lil Ġwanni b’kulma kellu, u telqu b’kollox.

³⁷Wara din il-ġrajja ħabbru lil Ġonatan u lil Xmun li wlied Ġambri kienu qegħdin jagħmlu tieġ kbir u kellhom iwasslu lill-għarusa, bint wieħed mill-kbarat ta’ Kangħan, minn Nadabat, b’kotra kbira ta’ ħaddara.

³⁸U ftakru fid-demm ta’ ħuhom Ġwanni, u telgħu u nħbew għall-irdoss ta’ għolja.

³⁹U refgħu għajnejhom, taw ħarsa madwarhom, u lemħu kortew b’ħamba kbira u tagħmira sħiħa; u l-għarus kien riesaq lejhom ma’ ħbiebu u qrabatu fost id-daqq tat-tnabar u ħafna armar.

⁴⁰U l-Lhud inxteħtu għal fuqhom mill-moħba u għamlu ħerba minnhom; u l-bqija ħarbu lejn l-għoljiet; u ħadulhom il-priża.

⁴¹U t-tieġ inbidel f’vistu u d-daqq tagħhom f’tinwiħ.

⁴²Hekk tħallsu għad-demm ta’ ħuhom, u reġgħu lura lejn l-għadajjar tal-Ġordan.

⁴³U sama’ Bakkidi u mar f’jum is-Sibt sa xatt il-Ġordan b’eżerċtu qawwi.

⁴⁴U Ġonatan qal lin-nies tiegħu: “Ħa nqumu u nitqabdu għal ħajjitna, għax illum mhux bħal-lbieraħ u lbieraħtlula.

⁴⁵Araw l-għadu ġej minn quddiemna u minn warajna, l-ilma tal-Ġordan minn naħa u minn oħra għadajjar u masġar, ma hemmx mnejn wieħed jiżgiċċa.

⁴⁶Mela issa għollu leħinkom lejn is-sema, biex jeħliskom minn idejn l-għedewwa tagħkom.”

⁴⁷U l-battalja ħadet sewwa. U Ġonatan medd idu biex jidrob lil Bakkidi, imma dan dar lura u żgiċċalu.

⁴⁸U Ġonatan u sħabu qabżu fil-Ġordan u għamu għan-naħa l-oħra, imma l-għedewwa ma qasmux il-Ġordan għal warajhom.

⁴⁹Dakinhar baqgħu mejta xi elf ruħ min-nies ta’ Bakkidi.

⁵⁰U Bakkidi raġa’ lura lejn Ġerusalemm, bena bliet iffortifikati fil-Lhudija, jiġifieri l-fortizza ta’ Ġeriko, Emmaws, Betħoron, Betel, Tamnata, Faratun, u Tefon bi swar għolja, bibien u żbarri.

⁵¹U qiegħed fihom għases biex iħabbtu lil Iżrael.

⁵²Saħħaħ ukoll il-belt ta’ Betsur u Geżer, u l-Akra, u qiegħed fihom suldati u ħażniet tal-ikel.

⁵³Ħa b’rahan ukoll it-tfal tal-kapijiet tal-pajjiż u ħalliehom fil-fortizza ta’ Ġerusalemm bl-għassa magħhom.

⁵⁴Fit-tieni xahar tas-sena 153[62] Alċimu ordna li jħottu l-ħajt tal-bitħa ta’ ġewwa tas-santwarju, u b’hekk jeqred xogħol il-profeti.

⁵⁵Imma meta kienu diġà bdew iħottu, Alċimu ħassu ħażin u x-xogħol kellu jieqaf. Fommu ntebaq, ġismu bbies, u ma setax jgħid kelma, u jagħti ordnijiet dwar daru.

⁵⁶U Alċimu miet dak in-nhar fost tbatijiet kbar.

⁵⁷Malli Bakkidi ra li miet Alċimu raġa’ lura għand is-sultan; u l-art ta’ Ġuda baqgħet mistrieħa għal sentejn.

⁵⁸F’dak iż-żmien ir-rinnegati ftiehmu lkoll u qalu: “Araw, Ġonatan u sħabu qegħdin jgħixu bi kwiethom kollhom fiduċja. Ħa nġibu lil Bakkidi; f’lejl wieħed jaqbadhom ilkoll.”

⁵⁹U marru u ftiehmu miegħu.

⁶⁰U Bakkidi qabad u telaq b’eżerċtu qawwi; bagħat ittri bil-moħbi lil sħabu fil-Lhudija biex jaqbdu lil Ġonatan u lil sħabu. Imma ma setgħux għax dawn saru jafu x’kellhom f’rashom.

⁶¹Anzi n-nies ta’ Ġonatan qabdulhom xi ħamsin raġel minn fost in-nies tal-pajjiż, li kienu l-aqwa fost ix-xewwiexa, u qatluhom.

⁶²Imbagħad Ġonatan u Xmun u sħabhom ħarbu lejn Bet-basi li hemm fid-deżert, sewwew il-ħsara li kien hemm fiha u ffortifikawha.

⁶³Meta sar jaf Bakkidi, ġabar l-eżerċtu tiegħu kollu u bagħat jgħarraf lil dawk tal-Lhudija.

⁶⁴Ġie u waqqaf il-kamp madwar Bet-basi u ħabat għaliha għal ħafna żmien u tella’ xi magni kontriha.

⁶⁵Ġonatan ħalla lil ħuh Xmun fil-belt, u hu ħareġ fil-kampanja bi ftit nies.

⁶⁶U ħabat għal Odomera u għal ħutu u għal ulied Fasiron fit-tined tagħhom. U beda jirbaħ u jissaħħaħ fil-forzi.

⁶⁷U Xmun u n-nies tiegħu ħarġu mill-belt u ħarqu l-magni.

⁶⁸U ħabtu għal Bakkidi, u kissruh, u kiddewh bl-għali, għax il-ħsieb u l-ispedizzjoni tiegħu ġew fix-xejn.

⁶⁹U għadab għall-aħħar għal dawk l-irġiel rinnegati li tawh il-parir li jiġi fil-pajjiż, u qatel ħafna minnhom. Imbagħad qatagħha li jerġa’ lura lejn pajjiżu.

⁷⁰U Ġonatan sar jaf u minnufih bagħatlu messaġġiera biex jagħmel il-paċi miegħu u jroddlu l-priġunieri.

⁷¹U Bakkidi laqa’ l-proposti u għamel skont ma qallu, u ħalef lil Ġonatan li ma jagħmillu ebda deni kemm idum ħaj.

⁷²Imbagħad tah lura l-priġunieri, li qabel kien qabad minn art Ġuda, u dar u raġa’ lura lejn pajjiżu, u qatt iżjed ma ġieħ f’rasu li jerġa’ jmur f’arthom.

⁷³B’hekk ix-xabla strieħet f’Iżrael, u Ġonatan kien joqgħod f’Mikmas, u beda jiggverna lill-poplu u jneħħi l-midgħajja minn nofs Iżrael.