Read Maltese Bible with DC – IL-BIBBJA IL-KOTBA MQADDSA 2 MAKKABIN 4 Bible Online

2 MAKKABIN 4 - Maltese Bible with DC – IL-BIBBJA IL-KOTBA MQADDSA bible

2 MAKKABIN 4

¹Xmun, li semmejna aktar ’il fuq, li kien ittradixxa t-teżor u art twelidu, beda jqassas kontra Onija, u jgħid li kien hu li xewwex kontra Eljodoru, u l-ħtija tal-ħsara li ġrat.

²U kellu l-ħila wkoll isejjaħ xewwiex kontra l-gvern lill-benefattur tal-belt, id-difensur ta’ nies pajjiżu, u l-ħabrieki għal-liġijiet.

³U din il-mibegħda tant kibret li wieħed midħla ta’ Xmun wasal biex joqtol.

⁴Meta Onija ra l-ħsara li jista’ jġib dan il-ġlied u kif Apollonju bin Menestew, il-gvernatur taċ-Ċelesirja u l-Feniċja, kien qiegħed jgħin il-ħżunija ta’ Xmun,

⁵mar għand is-sultan, mhux biex jixli nies pajjiżu, imma bil-ħsieb li jġib ’il quddiem il-ġid tal-kotra tal-poplu kollu u ta’ kull wieħed minnhom.

⁶Huwa ra li jekk ma jindaħalx is-sultan, ma jistax ikun hemm paċi fl-amministrazzjoni u li Xmun iħalli l-ġenn tiegħu.

⁷Wara li miet Selewku[21] s-saltna ħadha Antijoku, jgħidulu Epifani. Ġason, ħu Onija, daħħalha f’rasu li jaħtaf il-post ta’ qassis il-kbir:

⁸ressaq petizzjoni quddiem is-sultan u wiegħdu tliet mija u sittin talent tal-fidda u tmenin talent ieħor minn dħul ieħor.

⁹Barra dan wiegħdu wkoll li joħroġ mija u ħamsin talent ieħor jekk jagħtih is-setgħa li jibni ġinnasju u stadju[22] fejn jitħarrġu ż-żgħażagħ[23], u li n-nies ta’ Ġerusalemm jinkitbu bħala ċittadini ta’ Antjokja.

¹⁰Is-sultan qallu iva. Malli ħa l-kariga f’idejh minnufih beda jdawwar lil niesu għad-drawwiet tal-Griegi.

¹¹Neħħa l-privileġġi li s-slaten kienu taw lil-Lhud bis-saħħa ta’ Ġwanni, missier Ewpolemu, li kien intbagħat ambaxxatur biex jagħmel patt ta’ alleanza u ħbiberija mar-Rumani; ħassar il-liġijiet ċivili u daħħal drawwiet kontra l-Liġi.

¹²Minn rajh bena ġinnasju taħt l-Akra[24] u darra l-aħjar fost iż-żgħażagħ jilbsu l-kappell tal-atleti Griegi.

¹³B’hekk l-Elleniżmu laħaq il-quċċata tiegħu u saret bidla sħiħa għad-drawwiet tal-barranin bis-saħħa tal-ħażen bla qjies ta’ Ġason, li ma kienx jixraqlu jkun il-qassis il-kbir.

¹⁴Il-qassisin ma baqgħux aktar ħsiebhom fis-servizz tal-artal, imma, bla ma kienu jqisu xejn it-tempju u bla ma jħabblu rashom bis-sagrifiċċji, mas-sinjal għal-logħba tad-disk kienu jmorru jiġru lejn il-palestra biex jieħdu sehem fil-logħob ikkundannat mil-Liġi.

¹⁵L-unuri li wirtu mingħand missirijiethom ma qisuhomx aktar, imma kienu jgħożżu l-unuri tal-Griegi fuq kollox.

¹⁶U sewwasew minħabba dawn il-ħwejjeġ sabu ruħhom f’għawġ mill-akbar, billi dawk stess li huma fittxew li jgħixu bħalhom u jixbhuhom f’kollox, saru l-għedewwa u t-tiranni tagħhom.

¹⁷Għax il-ksur tal-liġijiet ta’ Alla ma tgħaddihx ħafif, u dan jurih iż-żmien li jiġi wara.

¹⁸Meta kien hemm il-logħob tas-sarâr ta’ kull ħames snin fil-belt ta’ Tir quddiem is-sultan,

¹⁹dak l-imniġġes ta’ Ġason bagħat minn Ġerusalemm xi nies, ċittadini ta’ Antjokja, biex jaraw il-logħob u jieħdu magħhom tliet mitt drakma tal-fidda għas-sagrifiċċju lil Erkole. Imma dawk li ħaduhom dehrilhom li ma kienx xieraq li jintefqu għas-sagrifiċċju imma li jmorru għal xi nefqa oħra.

²⁰Ġara għalhekk li dawn il-flus li min bagħathom ried li jmorru għas-sagrifiċċju lil Erkole, marru għat-tagħmir tal-ġfien tal-gwerra[25] bis-saħħa ta’ dawk li kienu ħaduhom.

²¹Is-sultan Antijoku kien bagħat lil Apollonju bin Menestew l-Eġittu għall-intronizzazzjoni tas-sultan Tolemew Filometor[26], u b’hekk sar jaf li dan ma kienx jaqbel mal-politika tiegħu. Għalhekk ħaseb għal rasu u telaq lejn Ġaffa u minn hemm tela’ Ġerusalemm.

²²Ġason u n-nies tal-belt laqgħuh bil-kbir, u daħħluh bid-dawl tat-torċi u b’għajjat ta’ ferħ. Minn hemm telaq bl-eżerċtu għall-Feniċja.

²³Wara tliet snin Ġason bagħat lil Menelaw[27], ħu Xmun, li semmejna qabel, biex iwassal il-flus lis-sultan u jfakkru fi ħwejjeġ urġenti.

²⁴Dan indiehes mas-sultan u ġieb ruħu miegħu bħallikieku kien xi persuna setgħana, u hekk kiseb għalih innifsu l-post ta’ qassis il-kbir, billi żied fuq Ġason tliet mitt talent tal-fidda.

²⁵Malli ħa f’idejh l-ittri tal-ħatra tiegħu minn idejn is-sultan, raġa’ lura. Ma kellu xejn li jistħoqqlu l-post ta’ qassis il-kbir ħlief il-qilla ta’ tirann bla qalb u l-qalb ta’ bhima selvaġġa.

²⁶U Ġason, li qabel kien qala’ ’l barra lil ħuh, issa sab ruħu maqlugħ ’il barra minn ħaddieħor, u kellu jitlaq maħrub lejn art l-Għammonin.

²⁷Menelaw ħa l-ħakma f’idejh, imma ma ħallas xejn mill-flus li kien wiegħed lis-sultan,

²⁸minkejja li Sostratu, il-kmandant tal-Akra, l-inkarigat biex jiġbor it-taxxi, kien jitlobhomlu ta’ spiss. Għalhekk it-tnejn li kienu ssejħu quddiem is-sultan.

²⁹Menelaw ħalla deputat floku, bħala l-qassis il-kbir, lil ħuh Lisimaku; u Sostratu ħalla lil Krateti kmandant taċ-Ċiprijotti.

³⁰Wara li sar dan kollu, in-nies ta’ Tarsu u ta’ Mallu[28] rvillaw, għax dawn l-ibliet ngħataw b’rigal lil Antijokidi, konkubina tas-sultan.

³¹Is-sultan telaq jgħaġġel biex jirranġa u ħalla deputat floku lil Androniku, wieħed mill-ogħla kbarat.

³²Menelaw ħaseb li ġieħ il-waqt, u seraq xi tagħmir tad-deheb mit-tempju u tah rigal lil Androniku; tagħmir ieħor irnexxielu jbigħu f’Tir u l-ibliet ta’ madwarha.

³³Onija, malli sar jaf bi żgur, bagħat iċanfru u mar f’post tal-kenn ħdejn Dafni qrib Antjokja.

³⁴Menelaw, imbagħad, mar għand Androniku, u ħeġġu biex imidd idejh fuq Onija. Dan mar għand Onija, u wara li qarraq bih rebaħ il-fiduċja tiegħu, ħadlu b’idejh, ħaliflu, u pperswadih joħroġ, għalkemm imħasseb, mill-kenn tiegħu. Minnufih qatlu, bla ma qies xejn il-ġustizzja.

³⁵Mhux biss il-Lhud, imma wkoll ħafna oħrajn mill-ġnus l-oħra, ħaduha bi kbira u għelew bis-sħiħ għall-qtil inġust ta’ dan il-bniedem.

³⁶Malli s-sultan raġa’ lura mill-inħawi taċ-Ċiliċja, il-Lhud li kienu fil-belt[29], flimkien ma’ xi Griegi li kienu wkoll tkexkxu bid-delitt, marru għandu biex jipprotestaw għall-qtil ta’ Onija.

³⁷Antijoku ħadha fih, ħass għalih u tħassru u bkieh minħabba l-għaqal u l-imġiba mill-aħjar tal-mejjet.

³⁸Xegħel bil-qilla, u minnufih neħħa l-porpra minn fuq Androniku, ċarratlu lbiesu u ġagħalhom idawruh mal-belt kollha, u hemm stess fejn kien qarraq b’Onija, lil dan il-qattiel neħħieh mid-dinja. Hekk il-Mulej raddlu l-kastig li kien jixraqlu.

³⁹Fil-belt[30], Lisimaku, bi ftehim ma’ Menelaw, kien għamel ħafna serq mit-tempju. Kienu diġà ġarrew ħafna dehbijiet meta xterdet ix-xniegħa; imma l-poplu qam kontra Lisimaku.

⁴⁰Kif kienet il-kotra mqanqla u mixgħula bil-korla, Lisimaku rama xi tlitt elef raġel taħt il-kmand ta’ Arawnu, bniedem imdaħħal fiż-żmien u xejn anqas fil-ġenn, u beda jaħbat għalihom inġustament.

⁴¹Malli ntebħu bil-ħbit ta’ Lisimaku, xi wħud qabdu l-ġebel, oħrajn il-bsaten bl-għekiesi, oħrajn it-trab milli kien hemm miġmugħ, u bdew iwaddbuh bl-addoċċ fuq in-nies ta’ Lisimaku.

⁴²B’dan il-mod darbu ’l ħafna minnhom, oħrajn waqqgħuhom mal-art u mbagħad ħarrbuhom ilkoll, u l-ħalliel tat-tempju wkoll qatluh ħdejn il-kamra tat-teżor.

⁴³U minħabba dawn il-ġrajjiet saret kawża kontra Menelaw.

⁴⁴Meta s-sultan ġie Tir, tlieta min-nies mibgħuta mill-Kunsill[31] ressqu l-akkuża quddiemu.

⁴⁵Menelaw, meta ra li kien għoddu mitluf, wiegħed kemxa flus sewwa lil Tolemew bin Dorimeni, biex idawwar lejh is-sultan.

⁴⁶Tolemew, imbagħad, ħa s-sultan taħt il-kolonnat, taparsi għall-arja, u dawwarlu fehemtu.

⁴⁷U dan ħeles mill-akkuża lil Menelaw, li kien ġieb dik il-ħsara kollha; u dawk l-imsejkna, li, ukoll kieku ddefendew il-kawża tagħhom imqar quddiem l-Iskiti[32], kienu joħorġu bla ħtija, qatagħhielhom għall-mewt.

⁴⁸U hekk minnufih tħallsu b’piena inġusta dawk li qabżu għall-belt, għall-poplu u għat-tagħmir sagru.

⁴⁹U n-nies ta’ Tir stess tant ħaduha bi kbira, li tawhom difna bl-aqwa ġieħ.

⁵⁰Menelaw, bis-saħħa tar-regħba ta’ min kellu s-setgħa, baqa’ fil-ħakma, dejjem iżid fi ħżunitu u jnassas kontra nies pajjiżu stess.