Read Maltese Bible with DC – IL-BIBBJA IL-KOTBA MQADDSA 2 MAKKABIN 8 Bible Online

2 MAKKABIN 8 - Maltese Bible with DC – IL-BIBBJA IL-KOTBA MQADDSA bible

2 MAKKABIN 8

¹Ġuda l-Makkabi u dawk li kienu miegħu daħlu bil-moħbi fl-irħula u bdew isejħu lil nieshom; u sejħu lil dawk li baqgħu fidili għall-Ġudaiżmu sa ma ġemgħu sitt elef ruħ.

²U talbu lill-Mulej li jħares fuq il-poplu maħqur minn kulħadd; li jkollu ħniena mit-tempju mkasbar minn nies midgħajja;

³li jitħassar il-belt imħarbta u li kienet għoddha ġġarrfet; li jagħti widen għad-demm li qiegħed jitlob vendetta quddiemu;

⁴li jiftakar ukoll fil-qerda kiefra tat-trabi bla ħtija, u fid-dagħa li sar kontra ismu; u li juri l-mibegħda tiegħu kontra l-ħażen.

⁵Il-Makkabi f’ras it-truppi tiegħu ħadd mill-Ġentili ma sata’ jiqaflu, għax għadab il-Mulej inbidel fi ħniena.

⁶Kien jinxteħet fuq bliet u rħula għal għarrieda u jagħtihom in-nar; jaħtaf f’idejh l-aħjar postijiet u jħarrab mhux ftit mill-għedewwa;

⁷u għal dawn l-ispedizzjonijiet l-aħjar li kien isib kien il-lejl. Il-fama tal-ħila tiegħu xterdet ma’ kullimkien.

⁸Meta Filippu[44] ra li dal-bniedem ftit ftit kien miexi ’l quddiem, u li kien qiegħed jitqawwa dejjem iżjed minħabba r-rebħiet tiegħu, kiteb lil Tolemew, il-gvernatur taċ-Ċelesirja u l-Feniċja, biex jieħdu ħsieb l-interessi tas-sultan.

⁹Dan minnufih għażel lil Nikanor bin Patroklu, wieħed mill-ħbieb ewlenin tas-sultan, u bagħtu b’mhux anqas minn għoxrin elf suldat minn kull ġens biex jeqred in-nisel kollu tal-Lhud. Bagħatlu wkoll miegħu l-ġeneral Gorġja, bniedem ta’ esperjenza kbira fis-sengħa tal-gwerra.

¹⁰Nikanor kellu f’rasu li jiġbor elfejn talent mill-bejgħ tal-ilsiera Lhud billi s-sultan kellu jagħti t-tribut lir-Rumani.

¹¹Għalhekk bagħat jistieden lill-ibliet tax-xtajta biex jixtru l-ilsiera Lhud u wegħedhom li jagħtihom disgħin wieħed għal kull talent, bla ma qagħad iġib quddiem għajnejh il-ġudizzju li kien hemm lest għalih mingħand Alla li jista’ kollox.

¹²Malli Ġuda sar jaf bl-avvanzata ta’ Nikanor, għarraf lin-nies tiegħu bil-wasla tal-eżerċtu.

¹³Il-beżżiegħa u dawk li ma kinux jafdaw fil-ġustizzja ta’ Alla ħarbu u tbiegħdu mill-post.

¹⁴L-oħrajn biegħu kulma kien baqgħalhom, u fl-istess ħin talbu lill-Mulej biex jeħles lil dawk li dak ix-xellerat ta’ Nikanor kien diġà biegħ qabel ma bdew jissieltu.

¹⁵Jekk ma jismagħhomx minħabba fihom infushom, għallinqas jismagħhom f’ġieħ il-patt ma’ missirijiethom u f’ġieħ l-isem il-qaddis u kbir tiegħu li minnu ħadu isimhom.

¹⁶Ġuda l-Makkabi, imbagħad, ġabar madwaru n-nies tiegħu, sitt elef ruħ b’kollox, u ħeġġiġhom biex ma jibżgħux quddiem l-għedewwa, u lanqas ma jaqtgħu qalbhom quddiem il-kotra tal-ġnus, li inġustament kienu riesqa għal fuqhom, imma għandhom jissieltu ta’ rġiel

¹⁷u jżommu quddiem għajnejhom il-vjolazzjoni sagrilega li għamlu kontra l-post imqaddes, u ż-żebliħ tal-belt imħarbta, u t-tneħħija tad-drawwiet ta’ missirijiethom.

¹⁸“Huma jafdaw fl-armi u fil-qlubija tagħhom,” qalilhom, “imma aħna nafdaw f’Alla li jista’ kollox, li jista’ jeqred b’nifs wieħed lil dawn li ġejjin għalina u d-dinja kollha.”

¹⁹Fakkarhom f’kemm-il darba Alla għen lil missirijiethom, kif fi żmien Sanħerib kienu nqerdu mija u ħamsa u tmenin elf raġel,

²⁰u fit-taqbida li saret fil-Babilonja kontra l-Galatin, meta l-Lhud, tmint elef ruħ b’kollox, bl-għajnuna ta’ erbat elef Maċedoni, marru għat-taqbida; u meta l-Maċedonin sabu ruħhom fit-tiġrib, it-tmint elef, bl-għajnuna tas-sema, qerdu mija u għoxrin elf mill-għadu, u qabdulhom priża kbira.

²¹B’dan il-kliem qawwielhom qalbhom u ħejjiehom biex imutu għal-liġijiet u għal art twelidhom; imbagħad qassam l-eżerċtu f’erba’ taqsimiet,

²²u qiegħed lil ħutu, Xmun, Ġużeppi, Ġonatan, kapijiet fuqhom, wieħed għal kull taqsima b’elf u ħames mitt ruħ kull waħda.

²³Imbagħad qal lil Elgħażar jaqra l-Ktieb Imqaddes u tahom il-kelma tal-qaddis: “Bl-għajnuna ta’ Alla”, u hu stess mar f’ras l-ewwel taqsima u ħabat għal Nikanor.

²⁴Bl-għajnuna ta’ Dak li jista’ kollox li kien magħhom qatlu aktar minn disat elef ruħ, darbu u qattgħu bċejjeċ il-biċċa l-kbira tal-eżerċtu ta’ Nikanor, u ġagħluhom jaħarbu lkoll.

²⁵Qabdu f’idejhom il-flus ta’ dawk li kienu ġew biex jixtruhom; u għamlu għal warajhom għal triq twila, imma kellhom jerġgħu lura minħabba li kien daħal il-ħin,

²⁶u ma baqgħux jitbiegħdu aktar għal warajhom għax kien lejlet is-Sibt.

²⁷Imbagħad ġabru l-armi u neżżgħu l-għedewwa milli kellhom fuqhom, iċċelebraw is-Sibt, ibierku u jfaħħru lill-Mulej kemm jifilħu talli salvahom dakinhar u beda juri l-ħniena magħhom.

²⁸Meta għadda s-Sibt qassmu biċċa mill-priża lill-midrubin, lir-romol u lill-iltiema, u l-bqija qassmuh bejniethom u bejn uliedhom.

²⁹Meta temmew dan kollu, talbu lkoll flimkien lill-Mulej ħanin li jitħabbeb mill-ġdid għalkollox mal-qaddejja tiegħu.

³⁰Tqabdu wkoll mat-truppi ta’ Timotju u Bakkidi, u minnhom qerdu aktar minn għoxrin elf ruħ; u mbagħad ħatfu f’idejhom fortizzi fl-għoli u qassmu priża kbira bejniethom: u taw sehem daqs tagħhom lill-midrubin, lill-iltiema, lir-romol u lix-xjuħ ukoll.

³¹Imbagħad ġabru l-armi tal-għedewwa, qiegħdu kollox bil-galbu f’postijiet żguri, u ħadu l-bqija tal-priża Ġerusalemm.

³²Qatlu wkoll lill-fizzjal tal-għases ta’ madwar Timotju, bniedem mill-agħar, li għamel ħsara kbira lil-Lhud.

³³Imbagħad, meta kienu qegħdin jagħmlu l-festa tar-rebħa f’art twelidhom, ħarqu ħajjin lil dawk li kienu taw in-nar lill-bibien imqaddsa, u magħhom lil Kallisteni, li lkoll kienu ħarbu f’daqsxejn ta’ dar; u hekk dan ukoll ħa l-ħlas li kien ħaqqu għall-ħażen tiegħu.

³⁴Nikanor, dak il-midneb fuq li midneb, li kien ġieb miegħu elf neguzjant biex jixtru l-Lhud,

³⁵ġabuh fix-xejn bl-għajnuna tal-Mulej dawk stess li hu ma kien iqishom xejn. Kellu jneħħi minn fuqu l-ilbies għani u sabiħ, u jaħrab waħdu minn qalb ir-raba’, bħallikieku kien xi lsir maħrub; u kellu xorti li wasal Antjokja wara li ma kien irnexxielu xejn ħlief li jeqred l-eżerċtu tiegħu.

³⁶Hekk dak li kien wiegħed li jħallas it-tribut lir-Rumani minn fuq l-ilsiera minn Ġerusalemm, issa beda jxerridha li l-Lhud kellhom min jaqbeż għalihom, u ħadd ma kien jista’ għalihom, għax huma kienu jħarsu l-liġijiet li kien tahom Alla stess.