Read Maltese Bible with DC – IL-BIBBJA IL-KOTBA MQADDSA MATTEW 1 Bible Online

MATTEW 1 - Maltese Bible with DC – IL-BIBBJA IL-KOTBA MQADDSA bible

MATTEW 1

¹Ktieb in-nisel ta’ Ġesù Kristu, bin David, bin Abraham.

²Abraham nissel lil Iżakk, Iżakk nissel lil Ġakobb, Ġakobb nissel lil Ġuda u lil ħutu,

³Ġuda nissel lil Fares u lil Żaraħ minn Tamar, Fares nissel lil Ħesron, Ħesron nissel lil Aram,

⁴Aram nissel lil Għamminadab, Għamminadab nissel lil Naħson, Naħson nissel lil Salmon,

⁵Salmon nissel lil Bogħaż minn Raħab, Bogħaż nissel lil Għobed minn Rut, Għobed nissel lil Ġesse,

⁶Ġesse nissel lil David, is-sultan. David nissel lil Salamun mill-mara ta’ Urija,

⁷Salamun nissel lil Robogħam, Robogħam nissel lil Abija, Abija nissel lil Asa,

⁸Asa nissel lil Ġosafat, Ġosafat nissel lil Ġoram, Ġoram nissel lil Għużżija,

⁹Għużżija nissel lil Ġotam, Ġotam nissel lil Aħaż, Aħaż nissel lil Ħeżekija,

¹⁰Ħeżekija nissel lil Manassi, Manassi nissel lil Amon, Amon nissel lil Ġosija,

¹¹Ġosija nissel lil Ġekonija u lil ħutu; kien żmien l-eżilju f’Babilonja.

¹²Wara l-eżilju f’Babilonja, Ġekonija nissel lil Salatjel, Salatjel nissel lil Żorobabel,

¹³Żorobabel nissel lil Abiħud, Abiħud nissel lil Eljakim, Eljakim nissel lil Ażor,

¹⁴Ażor nissel lil Sadok, Sadok nissel lil Akim, Akim nissel lil Eliħud,

¹⁵Eliħud nissel lil Elgħażar, Elgħażar nissel lil Mattan, Mattan nissel lil Ġakobb,

¹⁶Ġakobb nissel lil Ġużeppi, ir-raġel ta’ Marija, li minnha twieled Ġesù li jsejħulu l-Messija[1].

¹⁷Mela n-nisel kollu kien, minn Abraham sa David, erbatax-il nisel, minn David sa l-eżilju ta’ Babilonja, erbatax-il nisel; u mill-eżilju ta’ Babilonja sal-Messija, erbatax-il nisel.

¹⁸It-tnissil ta’ Ġesù l-Messija sar hekk: ommu Marija, wara li tgħarrset ma’ Ġużeppi, qabel ma marru joqogħdu flimkien, saret omm bil-ħidma tal-Ispirtu s-Santu.

¹⁹Żewġha Ġużeppi, li kien raġel ġust u ma riedx ixandarha quddiem kulħadd, għamel il-ħsieb li jibgħatha bil-moħbi tan-nies.

²⁰Meta kien għadu qiegħed jaħsibha, deherlu anġlu tal-Mulej[2] fil-ħolm u qallu: “Ġużeppi, bin David, xejn la tibża’ tieħu għandek lil martek Marija, għax dak li tnissel fiha ġej mill-Ispirtu s-Santu.

²¹Hi se jkollha iben, u inti ssemmih Ġesù[3], għax hu jsalva l-poplu tiegħu minn dnubiethom.”

²²Dan kollu ġara biex iseħħ dak li kien qal il-Mulej permezz tal-profeta, meta qal:

²³‘Ara, ix-xebba tnissel u jkollha iben, u jsemmuh Għimmanu-El, li bi lsienna jfisser ‘Alla magħna.’

²⁴Ġużeppi, meta qam, għamel kif ordnalu l-anġlu tal-Mulej, u ħa lil martu għandu.

²⁵Imma baqa’ ma għarafhiex[4] sa ma kellha iben, u semmieh Ġesù.