Read Maltese Bible with DC – IL-BIBBJA IL-KOTBA MQADDSA MATTEW 12 Bible Online

MATTEW 12 - Maltese Bible with DC – IL-BIBBJA IL-KOTBA MQADDSA bible

MATTEW 12

¹Darba waħda, is-Sibt, Ġesù kien għaddej minn għalqa miżrugħa. Issa lid-dixxipli tiegħu ħadhom il-ġuħ; u bdew jaqtgħu s-sbul u jikluh.

²Imma rawhom il-Fariżej, u qalulu: “Ara, id-dixxipli tiegħek jagħmlu dak li ma jiswiex nhar ta’ Sibt.”

³U hu qalilhom: “Ma qrajtux x’għamel David meta kien bil-ġuħ, hu u dawk li kienu miegħu?

⁴Ma qrajtux kif daħal fid-dar ta’ Alla u kiel il-ħobż tal-preżenza[51] ta’ quddiem il-Mulej, li la hu u lanqas dawk li kienu miegħu ma kienu jistgħu jieklu minnu, imma l-qassisin biss?

⁵Jew ma qrajtux fil-Liġi li nhar ta’ Sibt il-qassisin fit-tempju jiksru s-Sibt bla ma jonqsu?

⁶Ngħidilkom li hawnhekk hawn min hu aqwa mit-tempju.

⁷Li kieku kontu tafu xi jfissru l-kelmiet, ‘Ħniena rrid, u mhux sagrifiċċju’, ma kontux tikkundannaw lil min hu bla ħtija.

⁸Għax Bin il-bniedem huwa Sid is-Sibt.”

⁹Telaq minn hemm u baqa’ sejjer fis-sinagoga tagħhom.

¹⁰U hemmhekk kien hemm raġel li kellu idu niexfa. Huma, biex ikollhom fuqiex jixluh, staqsewh: “Jiswa li wieħed ifejjaq nhar ta’ Sibt?”

¹¹Iżda hu qalilhom: “Min minnkom ikollu nagħġa u taqagħlu f’ħofra s-Sibt, ma jmurx jaqbad u jtellagħha?

¹²Imma kemm jiswa bniedem aktar minn nagħġa? Mela jiswa nhar ta’ Sibt tagħmel il-ġid.”

¹³Imbagħad qal lir-raġel: ‘Midd idek.’ Dak medd idu, u reġgħet ġietu qawwija u sħiħa bħall-oħra.

¹⁴U l-Fariżej ħarġu u bdew jiftiehmu bejniethom kontra tiegħu, kif se jeqirduh.

¹⁵Ġesù sar jaf b’dan u telaq minn hemm. Ħafna nies marru warajh u fejjaqhom kollha,

¹⁶u ordnalhom bis-sħiħ biex ma jurux min kien,

¹⁷biex hekk iseħħ dak li kien ingħad permezz tal-profeta Isaija, meta qal,

¹⁸‘Ara l-Qaddej tiegħi li jiena ħtart, l-Għażiż tiegħi li bih ruħi tgħaxxqet! Jiena nqiegħed l-Ispirtu tiegħi fuqu U hu jxandar il-ġustizzja lill-ġnus.

¹⁹Ma jiksirha ma’ ħadd, ma jgħollix leħnu u ħadd ma jisma’ leħnu fil-pjazez.

²⁰Qasba mġelġla ma jiksirhiex, u musbieħ inemnem ma jitfihx, sa ma jwassal il-ġustizzja għar-rebħa,

²¹u f’ismu jittamaw il-ġnus.’

²²Imbagħad ġabulu quddiemu wieħed agħma u mbikkem maħkum mix-xitan, u hu fejqu, hekk li l-imbikkem qabad jitkellem u jara.

²³In-nies kollha stagħġbu u bdew jgħidu: “Dan Bin David, tgħid?”

²⁴Imma l-Fariżej, meta semgħu hekk qalu: “Dan mhux ħlief bis-saħħa ta’ Begħelżebul[52], il-Prinċep tax-xjaten, li qiegħed ikeċċi x-xjaten.”

²⁵Iżda hu għaraf ħsibijiethom u qalilhom: “Kull saltna maqsuma fiha nfisha ssir ħerba, u kull belt jew familja maqsuma fiha nfisha ma tistax iżżomm wieqfa.

²⁶Mela jekk ix-Xitan ikeċċi x-Xitan, iġib firda fih innifsu; għalhekk kif se żżomm wieqfa s-saltna tiegħu?

²⁷U jekk jiena qiegħed inkeċċi x-xjaten bis-saħħa ta’ Begħelżebul, uliedkom bis-saħħa ta’ min qegħdin ikeċċuhom? Għalhekk huma stess ikunu l-imħallfin tagħkom.

²⁸Iżda jekk jien qiegħed inkeċċi x-xjaten bl-Ispirtu ta’ Alla, dan ifisser li waslitilkom is-Saltna ta’ Alla.

²⁹Jew kif jista’ wieħed jidħol fid-dar ta’ bniedem b’saħħtu u jaħtaflu ġidu jekk qabel ma jkunx rabtu? U hekk imbagħad id-dar jaħtafhielu żgur.

³⁰Min mhuwiex miegħi, huwa kontra tiegħi; u min ma jiġborx miegħi, ixerred.

³¹Għalhekk ngħidilkom li d-dnubiet kollha u d-dagħa kollu jinħafrilhom lill-bnedmin, imma d-dnub ta’ min jieqaf lill-Ispirtu s-Santu ma jinħafirx.

³²U jekk xi ħadd jgħid xi ħaġa kontra Bin il-bniedem tinħafirlu; iżda min jitkellem kontra l-Ispirtu s-Santu ma jkollux maħfra, la f’din id-dinja u lanqas f’li ġejja.”

³³“Intom tgħidu li siġra hi tajba jekk tagħmel frott tajjeb, u tgħidu li hi ħażina jekk tagħmel frott ħażin; għax is-siġra mill-frott tagħha tingħaraf.

³⁴Ja nisel il-lifgħat, kif tistgħu titkellmu tajjeb meta intom ħżiena? Għax mill-milja tal-qalb jitkellem il-fomm.

³⁵Il-bniedem tajjeb joħroġ ħwejjeġ tajba mill-ħażna tat-tajjeb tiegħu; imma l-bniedem ħażin joħroġ ħwejjeġ ħżiena mill-ħażna tal-ħażen tiegħu.

³⁶U ngħidilkom li l-bnedmin f’jum il-ħaqq għad iridu jagħtu kont ta’ kull kelma fiergħa li jkunu qalu,

³⁷għax minn kliemek tkun iġġustifikat, u minn kliemek tkun ikkundannat.”

³⁸Imbagħad xi wħud mill-kittieba u l-Fariżej qabdu u qalulu: “Mgħallem, xtaqna kieku naraw sinjal mingħandek!”

³⁹Iżda hu weġibhom: “Sinjal iridu nisel ħażin u infidil! Imma ebda sinjal ma jingħatalu ħlief dak tal-profeta Ġona.

⁴⁰Għax kif Ġona għamel tlitt ijiem u tlitt iljieli f’żaqq il-ħuta, hekk ukoll Bin il-bniedem għad jagħmel tlitt ijiem u tlitt iljieli fil-qalba tal-art.

⁴¹F’jum il-ħaqq, in-nies ta’ Ninwè għad iqumu kontra dan in-nisel u jikkundannawh, għax huma nidmu wara l-predikazzjoni ta’ Ġona; u araw hawn minn hu aqwa minn Ġona hawnhekk!

⁴²F’jum il-ħaqq, is-sultana tan-Nofsinhar[53] għad tqum u teħodha kontra dan in-nisel u tikkundannah, għax hi ġiet mit-truf tal-art biex tisma’ l-għerf ta’ Salamun; u araw hawn min hu aqwa minn Salamun hawnhekk!

⁴³“Meta spirtu ħażin joħroġ mill-bniedem, huwa jmur jiġġerra f’art niexfa jfittex il-mistrieħ, u ma jsibu mkien.

⁴⁴Imbagħad jgħid, ‘Mela nerġa’ lura lejn dari mnejn ħriġt.’ U, xħin jiġi, isibha battala u miknusa, kollox f’postu.

⁴⁵Imbagħad imur iġib miegħu seba’ spirti oħra agħar minnu, u jidħlu joqogħdu hemm ġew. U fl-aħħar dak il-bniedem isib ruħu f’qagħda agħar minn ta’ qabel. Hekk għad jiġrilu dan in-nisel ħażin.”

⁴⁶Kif kien għadu qiegħed ikellem lin-nies, ġew ommu u ħutu[54], waqfu barra u fittxew li jkellmuh.

⁴⁷Xi ħadd qallu[55]: “Ara, ommok u ħutek qegħdin barra jfittxu li jkellmuk.”

⁴⁸Iżda hu wieġeb lil dak li kellmu, u qallu: “Min hi ommi? U min huma ħuti?”

⁴⁹Imbagħad medd idu lejn id-dixxipli tiegħu u qal: “Dawn, araw, huma ommi u ħuti.

⁵⁰Għax kull min jagħmel ir-rieda ta’ Missieri li hu fis-smewwiet, dak huwa ħija, u oħti, u ommi.”