Read Maltese Bible with DC – IL-BIBBJA IL-KOTBA MQADDSA MATTEW 14 Bible Online

MATTEW 14 - Maltese Bible with DC – IL-BIBBJA IL-KOTBA MQADDSA bible

MATTEW 14

¹Kien dik il-ħabta li Erodi t-tetrarka sama’ bil-fama ta’ Ġesù,

²u lill-qaddejja tiegħu qalilhom: “Dan Ġwanni l-Battista! Iva, hu, qam mill-imwiet! U minħabba f’hekk il-qawwa tal-mirakli qiegħda taħdem fih!”

³Għax Erodi kien arresta lil Ġwanni, u qaflu l-ħabs u ħallieh hemm minħabba Erodja, mart ħuh Filippu.

⁴Għax Ġwanni kien jgħidlu: “Inti lil dik ma tistax iżżommha.”

⁵Ried kieku joqtlu, imma kien jibża’ min-nies, għax kienu jżommuh bi profeta.

⁶Mela wasal jum li fih Erodi għalaq sninu, u bint Erodja ħarġet fin-nofs tiżfen, u għoġbot lil Erodi;

⁷għalhekk wegħedha taħt ġurament li jagħtiha kulma titolbu.

⁸U hi, mogħwija minn ommha, qaltlu: “Agħtini issa stess ras Ġwanni l-Battista fuq platt.”

⁹Is-sultan tnikket, iżda minħabba l-ġurament li ħa u l-mistednin tiegħu ordna li tingħatalha.

¹⁰U bagħat jaqta’ ras Ġwanni fil-ħabs.

¹¹U ġiebu rasu fuq platt u tawha lit-tfajla, u din ħaditha lil ommha.

¹²Imbagħad id-dixxipli tiegħu ġew, ħadu l-ġisem tiegħu u difnuh, u marru jagħtu l-aħbar lil Ġesù.

¹³Meta sama’ l-aħbar, Ġesù telaq minn hemm bid-dgħajsa u mar waħdu f’post imwarrab. Imma n-nies semgħu fejn mar, u telqu warajh bil-mixi mill-ibliet.

¹⁴Xħin niżel l-art mid-dgħajsa ra kotra kbira ta’ nies u tħassarhom, u fejqilhom il-morda tagħhom.

¹⁵Xħin sar filgħaxija d-dixxipli tiegħu resqu lejh u qalulu: “Dan post imwarrab, u l-ħin għamel sewwa. Ibgħathom lin-nies, ħa jmorru fl-irħula jixtru x’jieklu.”

¹⁶Imma Ġesù qalilhom: “Ma għandhomx għalfejn imorru; agħtuhom intom x’jieklu.”

¹⁷U huma qalulu: “Hawn ma għandniex ħlief ħames ħobżiet u żewġ ħutiet.”

¹⁸“Ġibuhomli hawn,” qalilhom.

¹⁹Imbagħad ordna lin-nies biex joqogħdu bilqiegħda fuq il-ħaxix; ħa l-ħames ħobżiet u ż-żewġ ħutiet, rafa’ għajnejh lejn is-sema, bierek, qasam il-ħobżiet u tahom lid-dixxipli, u d-dixxipli newluhom lin-nies.

²⁰U kulħadd kiel u xaba’, u ġabru l-bċejjeċ li kien fadal u mlew bihom tnax-il qoffa.

²¹U kienu madwar ħamest elef raġel dawk li kielu, barra n-nisa u t-tfal.

²²U minnufih ġiegħel lid-dixxipli jitilgħu fuq id-dgħajsa u jmorru qablu x-xatt l-ieħor, sakemm jibgħat lin-nies.

²³Wara li bagħat lin-nies, tela’ waħdu fuq l-għoljiet biex jitlob. Xħin sar filgħaxija kien għadu hemm fuq, waħdu;

²⁴id-dgħajsa kienet diġà f’nofs il-baħar titħabat mal-mewġ, għax kellhom ir-riħ kontra tagħhom.

²⁵Fir-raba’ sahra[60] tal-lejl mar lejn in-naħa tagħhom miexi fuq il-baħar.

²⁶Huma rawh miexi fuq il-baħar u twerwru. “Dan xi fantażma!” qalu; u qabdu jgħajtu bil-biża’.

²⁷Iżda hu minnufih kellimhom u qalilhom: “Agħmlu l-qalb, jiena hu, tibżgħu xejn!”

²⁸Wieġeb Pietru u qallu: “Mulej, jekk huwa int, ordnali niġi ħdejk fuq l-ilma.”

²⁹“Ejja,” qallu Ġesù. Pietru niżel mid-dgħajsa, u qabad jimxi fuq l-ilma u jersaq lejn Ġesù.

³⁰Iżda meta ra li r-riħ kien qawwi, baża’, ħabat jegħreq, u beda jgħajjat u jgħid: “Salvani, Mulej!”

³¹Malajr Ġesù medd idu u qabdu: “Bniedem ta’ fidi żgħira,” qallu, “għaliex iddubitajt?”

³²Meta mbagħad it-tnejn telgħu fid-dgħajsa, ir-riħ waqaf.

³³Dawk li kienu fid-dgħajsa nxteħtu jqimuh u qalulu: “Tassew, int Bin Alla!”

³⁴Qasmu għan-naħa l-oħra u marru fl-art ta’ Ġennesaret[61].

³⁵In-nies ta’ hemm għarfuh, u xerrdu l-aħbar ma’ dawk l-inħawi kollha. Bdew iressqulu quddiemu l-morda kollha

³⁶u jitolbuh iħallihom imissulu mqar tarf il-libsa; u dawk kollha li messewh fiequ.