Read Maltese Bible with DC – IL-BIBBJA IL-KOTBA MQADDSA MATTEW 2 Bible Online

MATTEW 2 - Maltese Bible with DC – IL-BIBBJA IL-KOTBA MQADDSA bible

MATTEW 2

¹Meta twieled Ġesù f’Betlehem[5] tal-Lhudija, fi żmien is-sultan Erodi, xi maġi[6] mil-lvant ġew Ġerusalemm jistaqsu:

²“Fejn hu dak li twieled sultan tal-Lhud? Għax rajna l-kewkba tiegħu tielgħa[7], u ġejna nqimuh.”

³Is-sultan Erodi sama’ bihom, u tħawwad hu u Ġerusalemm kollha miegħu.

⁴Ġabar flimkien il-qassisin il-kbar u l-kittieba kollha tal-poplu, u ried jaf mingħandhom fejn kellu jitwieled il-Messija.

⁵U huma qalulu: “F’Betlehem tal-Lhudija, għax hekk inkiteb mill-profeta:

⁶‘U int, Betlehem, art ta’ Ġuda, le, m’intix l-iżgħar fost il-bliet il-kbar ta’ Ġuda, għax minnek joħroġ mexxej li jirgħa l-poplu tiegħi Iżrael.’

⁷Erodi mbagħad sejjaħ lill-maġi bil-moħbi, u tkixxef bir-reqqa kollha mingħandhom iż-żmien li fih dehritilhom il-kewkba;

⁸bagħathom Betlehem u qalilhom: “Morru, staqsu sewwa għat-tifel, u meta ssibuh ejjew għiduli, ħalli jien ukoll niġi nqimu.”

⁹Dawk, wara li semgħu lis-sultan, telqu, u ara, il-kewkba li kienu raw tielgħa[8] bdiet miexja quddiemhom sakemm waslet u waqfet fuq il-post fejn kien hemm it-tifel.

¹⁰Kif raw il-kewkba mtlew b’ferħ kbir tassew.

¹¹Meta mbagħad daħlu d-dar u raw lit-tifel ma’ ommu Marija, inxteħtu fl-art iqimuh; fetħu t-teżori tagħhom u offrewlu rigali deheb, inċens u mirra[9].

¹²Imbagħad, billi kienu mwissijin f’ħolma biex ma jerġgħux imorru għand Erodi, telqu lura lejn arthom minn triq oħra.

¹³Meta telqu, deher anġlu tal-Mulej f’ħolma lil Ġużeppi u qallu: “Qum, ħu miegħek lit-tifel u ’l ommu, u aħrab lejn l-Eġittu. Ibqa’ hemm sa ma ngħidlek jien, għax Erodi se jfittex lit-tifel biex joqtlu.”

¹⁴Ġużeppi qam, ħa miegħu lit-tifel u ’l ommu billejl u telaq lejn l-Eġittu,

¹⁵u baqa’ hemmhekk sal-mewt ta’ Erodi, biex hekk iseħħ dak li kien qal il-Mulej permezz tal-profeta, meta qal, ‘Mill-Eġittu sejjaħt lil ibni.’

¹⁶Erodi mbagħad, meta ra li l-maġi kienu daħku bih, inkorla bis-sħiħ, u bagħat joqtol f’Betlehem u fl-inħawi kollha tagħha lit-tfal subien kollha ta’ minn sentejn ’l isfel, skont iż-żmien li sar jaf mingħand il-maġi.

¹⁷Imbagħad seħħ dak li kien ingħad permezz tal-profeta Ġeremija, meta qal,

¹⁸‘F’Rama nstama’ leħen, biki u lfiq kbir: Rakel [10] tibki lil uliedha u ma tridx min ifarraġha, għax ma għadhomx iżjed.’

¹⁹Meta miet Erodi, deher l-anġlu tal-Mulej f’ħolma lil Ġużeppi fl-Eġittu

²⁰u qallu: “Qum, ħu miegħek lit-tifel u ’l ommu, u erġa’ lura lejn l-art ta’ Iżrael, għax mietu dawk li kienu jfittxu l-ħajja tat-tifel.”

²¹Ġużeppi qam, ħa miegħu lit-tifel u ’l ommu, u mar fl-art ta’ Iżrael.

²²Imma billi sama’ li fil-Lhudija kien qiegħed isaltan Arkelaws[11] flok Erodi missieru, baża’ jmur hemm. Fuq twissija li kellu fil-ħolm, telaq lejn l-inħawi tal-Galilija,

²³u mar joqgħod f’belt jisimha Nazaret, biex hekk iseħħ dak li kien ingħad permezz tal-profeti, ‘Ikun jissejjaħ Nażri.’