Read Maltese Bible with DC – IL-BIBBJA IL-KOTBA MQADDSA MATTEW 22 Bible Online

MATTEW 22 - Maltese Bible with DC – IL-BIBBJA IL-KOTBA MQADDSA bible

MATTEW 22

¹Ġesù raġa’ qabad ikellimhom bil-parabboli u qalilhom:

²“Is-Saltna tas-smewwiet tixbah lil wieħed sultan li għamel festa għat-tieġ ta’ ibnu.

³U bagħat għall-mistednin mal-qaddejja tiegħu biex jiġu għall-festa; imma dawk ma ridux jiġu.

⁴U reġa’ bagħat qaddejja oħra, u qalilhom, ‘Għidu lill-mistednin: Ara, il-mejda tiegħi lesta; il-barrin u l-għoġiela msemmna diġà maqtula u kollox lest; ejjew għall-festa.’

⁵Iżda dawk ma tawx kas; min mar l-għalqa, min għan-negozju tiegħu,

⁶u l-bqija qabdu lill-qaddejja tas-sultan, żebilħuhom u qatluhom.

⁷Is-sultan inkorla ħafna, u bagħat is-suldati tiegħu, qered lil dawk il-qattiela, u ħarqilhom il-belt tagħhom.

⁸Imbagħad qal lill-qaddejja tiegħu, ‘Il-festa mħejjija, imma lil dawk ma kienx ta’ min jistedinhom għaliha.

⁹Mela morru f’salib it-toroq u sejħu għall-festa lil kull min issibu.’

¹⁰Dawk il-qaddejja ħarġu fit-triqat u ġabru lil kull min sabu, ħżiena u tajba, u s-sala mtliet bin-nies għall-mejda.

¹¹Mela jidħol is-sultan ħalli jara min kien hemm fuq il-mejda, u hemmhekk lemaħ wieħed li ma kienx liebes għall-festa tat-tieġ;

¹²u qallu, ‘Ħabib, dan kif dħalt hawn m’intix liebes għall-festa?’ Dak tbikkem.

¹³Imbagħad is-sultan qal lil dawk li kienu qegħdin iservu, ‘Orbtulu riġlejh u idejh u waddbuh ’il barra fid-dlam; hemmhekk ikun hemm il-biki u t-tgħażżiż tas-snien!’

¹⁴Għax ħafna huma l-imsejħin, imma ftit il-magħżulin!”

¹⁵Imbagħad il-Fariżej marru u bdew jiftiehmu bejniethom biex jaraw kif jonsbuh b’xi kelma.

¹⁶U bagħtulu d-dixxipli tagħhom ma’ xi Erodjani u qalulu: “Mgħallem, aħna nafu li int raġel tħobb is-sewwa, u li t-triq ta’ Alla tgħallimha kif tassew hi, bla ma tħabbel rasek minn ħadd, għax int lejn wiċċ ħadd ma tħares.

¹⁷Għidilna ħaġa, mela: ‘Int x’jidhirlek? Sewwa jew le li wieħed iħallas it-taxxa lil Ċesari?”

¹⁸Imma Ġesù għaraf il-ħażen ta’ moħħhom, u qalilhom: “Għaliex tridu ġġarrbuni, ja wċuħ b’oħra?

¹⁹Uruni l-munita tat-taxxa.” Urewh dinar,

²⁰u Ġesù staqsiehom: “Ta’ min huma dan il-wiċċ u din il-kitba?”

²¹Qalulu: “Ta’ Ċesari!” Imbagħad qalilhom: “Mela agħtu lil Ċesari dak li hu ta’ Ċesari, u lil Alla dak li hu ta’ Alla.”

²²Meta semgħuh jgħid hekk baqgħu mistagħġba; imbagħad ħallewh u telqu.

²³Dak inhar resqu lejh xi Sadduċej, li jgħidu li ma hemmx qawmien mill-imwiet, u staqsewh:

²⁴“Mgħallem, Mosè qal, ‘Jekk wieħed imut u ma jħallix ulied, l-armla tiegħu jkollu jiżżewwiġha ħuh, biex dan inissel ulied għal ħuh.’

²⁵Kellna fostna sebat aħwa; il-kbir iżżewweġ, u miet bla tfal; għalhekk ħalla l-armla tiegħu għal ħuh.

²⁶It-tieni wieħed ġralu l-istess, u t-tielet ukoll, u hekk sas-seba’ wieħed.

²⁷Fl-aħħar, wara kulħadd, mietet il-mara.

²⁸Issa din, fil-qawmien tal-imwiet, mart min minnhom is-sebgħa tkun? Għax ilkoll kienu ħaduha.”

²⁹Weġibhom Ġesù: “Kemm sejrin żball, għax la tafu l-Iskrittura u lanqas il-qawwa ta’ Alla!

³⁰Għax fil-qawmien tal-imwiet in-nies la jiżżewġu u lanqas iżewġu, imma jkunu bħall-anġli ta’ Alla fis-sema.

³¹Għal dak imbagħad li hu qawmien mill-imwiet, ma qrajtux x’kien qalilkom Alla,

³²‘Jiena Alla ta’ Abraham, u Alla ta’ Iżakk, u Alla ta’ Ġakobb’? Hu mhuwiex Alla tal-mejtin, iżda tal-ħajjin!”

³³U n-nies, meta semgħu dan, baqgħu mistagħġba ħafna bit-tagħlim tiegħu.

³⁴Il-Fariżej, meta semgħu kif lis-Sadduċej kien saddilhom ħalqhom, inġabru madwaru,

³⁵u wieħed minnhom, għaref fil-Liġi, għamillu din il-mistoqsija biex iġarrbu:

³⁶“Mgħallem, liema hu l-kmandament il-kbir, fil-Liġi?”

³⁷Qallu Ġesù: “Ħobb lill-Mulej, Alla tiegħek, b’qalbek kollha, b’ruħek kollha, u b’moħħok kollu.’

³⁸Dan hu l-kmandament il-kbir u l-ewwel wieħed.

³⁹U it-tieni jixbhu: ‘Ħobb lil għajrek bħalek innifsek.’

⁴⁰Dawn iż-żewġ kmandamenti huma l-qofol tal-Liġi kollha u tal-Profeti.”

⁴¹Kif kellu l-Fariżej miġbura madwaru, Ġesù staqsiehom:

⁴²“Intom x’jidhrilkom dwar il-Messija? Bin min hu?” “Bin David,” qalulu.

⁴³Qalilhom: ‘Mela din kif inhi li David, imnebbaħ mill-Ispirtu, isejjaħlu Sidu u jgħid,

⁴⁴‘Il-Mulej qal lil Sidi: Oqgħod fuq il-lemin tiegħi, sa ma nkun qegħedt l-għedewwa tiegħek taħt riġlejk’?

⁴⁵Jekk David isejjaħlu Sidu, kif inhu ibnu?”

⁴⁶U ħadd minnhom ma kellu l-ħila jwieġeb, u minn dak inhar ’il quddiem ħadd iżjed ma ssogra jagħmillu mistoqsija oħra.