Read Maltese Bible with DC – IL-BIBBJA IL-KOTBA MQADDSA MATTEW 24 Bible Online

MATTEW 24 - Maltese Bible with DC – IL-BIBBJA IL-KOTBA MQADDSA bible

MATTEW 24

¹Ġesù ħareġ mit-tempju. Huwa u sejjer, id-dixxipli tiegħu resqu lejh u wrewh il-bini tat-tempju.

²Iżda hu qalilhom: “Qegħdin tarawh dan kollu? Tassew, ngħidilkom, hawnhekk ma tibqax ġebla fuq oħra li ma tiġġarrafx!”

³Kif kien qiegħed fuq l-Għolja taż-Żebbuġ, id-dixxipli resqu jistaqsuh rasu u rashom: “Għidilna, dan meta għad jiġri? U x’se jkun is-sinjal tal-miġja tiegħek u ta’ tmiem id-dinja?”

⁴U Ġesù weġibhom: “Araw li ħadd ma jqarraq bikom.

⁵Għax għad jiġu ħafna f’ismi u jgħidu ‘Jien hu l-Messija,’ u jqarrqu b’ħafna nies.

⁶Għad tisimgħu min jitkellem fuq gwerer u xnigħat ta’ gwerer. Iftħu għajnejkom u titħawdu xejn, għax dan jeħtieġ li jiġri, imma għadu mhuwiex it-tmiem.

⁷Għax għad iqum ġens kontra ġens u saltna kontra saltna, ikun hawn ġuħ kbir, u l-art titheżheż f’ħafna bnadi.

⁸Dan kollu jkun il-bidu ta’ tbatija kbira.

⁹Imbagħad jagħtukom f’idejn min iħabbatkom u joqtolkom; u l-ġnus kollha jsiru jobogħdukom minħabba f’ismi.

¹⁰U jkun hemm ħafna li jitfixklu, li jittradixxu lil xulxin u jinbagħdu bejniethom.

¹¹Iqumu bosta profeti foloz u jqarrqu b’ħafna nies.

¹²Joktor il-ħażen, u għalhekk l-imħabba tibred f’ħafna.

¹³Imma min jibqa’ jżomm sħiħ sal-aħħar, dan isalva.

¹⁴Dan l-Evanġelju tas-Saltna jixxandar fid-dinja kollha, biex il-ġnus kollha jkollhom xhieda. Imbagħad jiġi t-tmiem.

¹⁵“Meta mbagħad taraw il-profanazzjoni u l-ħerba fit-tempju[89] li fuqhom tkellem il-profeta Danjel - ħa jifhem min jaqra! -

¹⁶ħa jaħarbu mbagħad lejn l-għoljiet dawk li jkunu fil-Lhudija;

¹⁷u min ikun fuq il-bejt, ara li ma jinżilx jieħu xi ħaġa mid-dar,

¹⁸anqas min ikun fir-raba’ ma għandu jerġa’ lura biex jieħu l-mantar tiegħu.

¹⁹Jaħasra għalihom in-nisa li f’dawk il-jiem ikunu tqal jew ireddgħu!

²⁰Itolbu li l-ħarba tagħkom ma tiġrix fix-xitwa jew nhar ta’ Sibt.

²¹Għax imbagħad ikun hawn diqa kbira li mill-bidu tad-dinja sa issa għadu qatt ma kien hawn bħalha u anqas ikun hawn.

²²U kieku dawk il-jiem ma tqassrux, l-ebda bniedem ma kien isalva. Iżda minħabba l-maħturin dawk il-jiem tqassru.

²³Imbagħad, jekk xi ħadd jgħidilkom, ‘Ara, hawn hu l-Messija,’ jew, ‘Hemm,’ la temmnuhx.

²⁴Għax għad iqumu ħafna messijiet foloz u profeti foloz, u jibdew jagħmlu sinjali kbar u għeġubijiet biex iqarrqu, jekk jista’ jkun, imqar bil-maħturin.

²⁵Ara, għedtulkom minn qabel.

²⁶Jekk mela jgħidulkom, ‘Ara, qiegħed barra fid-deżert,’ tmorrux; ‘Ara, qiegħed ġewwa fid-dar,’ temmnux.

²⁷Għax bħalma l-berqa tleħħ mil-Lvant u tixħet id-dija tagħha sal-Punent, hekk tkun il-miġja ta’ Bin il-bniedem.

²⁸Fejn hemm il-ġisem mejjet, hemm l-isqra jinġabru!

²⁹“Minnufih, wara d-diqa ta’ dawk il-jiem, ix-xemx tiddallam, il-qamar jitlef id-dija tiegħu, il-kwiekeb jaqgħu mis-sema, u l-qawwiet tas-sema jitheżżu.

³⁰Imbagħad jidher fis-sema s-sinjal ta’ Bin il-bniedem, il-popli kollha tal-art jibdew jagħtu fuq sidirhom, u jaraw lil Bin il-bniedem ġej fuq is-sħab tas-sema b’qawwa u glorja kbira.

³¹U hu jibgħat l-anġli tiegħu, li b’leħen qawwi ta’ tromba jiġbru l-maħturin tiegħu mill-erbat irjieħ, minn tarf sa tarf tas-sema.

³²“Tgħallmu din il-parabbola mis-siġra tat-tin. Meta l-fergħa tirtab u tarmi l-weraq, intom tintebħu li s-sajf fil-qrib.

³³Hekk ukoll meta taraw dan kollu, kunu afu li hu fil-qrib, fil-bieb.

³⁴Tassew, ngħidilkom, li ma jgħaddix dan in-nisel sa ma jiġri dan kollu.

³⁵Is-sema u l-art jgħaddu, imma kliemi ma jgħaddix.

³⁶“Dwar dak il-jum u s-siegħa ħadd ma jaf xejn meta se jaslu, la l-anġli tas-sema u lanqas l-Iben; ħadd ħlief il-Missier waħdu.

³⁷Bħal fi żmien Noè, hekk tkun il-miġja ta’ Bin il-bniedem.

³⁸Għax kif fiż-żmien ta’ qabel id-dilluvju kienu jieklu u jixorbu, jiżżewġu u jżewġu sa dak inhar li Noè daħal fl-arka,

³⁹u b’xejn ma ntebħu sa ma wasal id-dilluvju u ġarr lil kulħadd, hekk tkun il-miġja ta’ Bin il-bniedem.

⁴⁰Imbagħad tnejn ikunu fl-għalqa: wieħed jittieħed u l-ieħor jitħalla;

⁴¹żewġ nisa jkunu jitħnu flimkien: waħda tittieħed u l-oħra titħalla.

⁴²Ishru, mela, għax ma tafuhx il-jum li fih jiġi Sidkom.

⁴³Kunu afu dan, li kieku sid id-dar kellu jkun jaf f’liema sahra tal-lejl[90] se jiġi l-ħalliel, kien jishar u ma jħallix min jinfidlu l-ħitan ta’ daru[91].

⁴⁴Mela kunu lesti intom ukoll, għax qatt ma tistgħu tobsru s-siegħa li fiha jiġi Bin il-bniedem.

⁴⁵“Intom min tgħidu li hu l-qaddej fidil u għaqli? Min hu dak li s-sid iqiegħdu fuq niesu biex jagħtihom jieklu fil-ħin?

⁴⁶Hieni dak il-qaddej li sidu jiġi u jsibu jaqdi dmiru.

⁴⁷Tassew, ngħidilkom, li jafdalu ġidu kollu f’idejh.

⁴⁸Iżda jekk dak il-qaddej ħażin jibda jgħid f’qalbu, ‘Sidi jiddawwar ma jiġi,’

⁴⁹u jaqbad isawwat lil sħabu l-oħra, u jiekol u jixrob mas-sakranazzi,

⁵⁰sid dak il-qaddej jasal f’jum li hu ma jkunx jistennieh, f’siegħa li fiha jieħdu għal għarrieda,

⁵¹u jagħmlu bċejjeċ u jagħtih li ħaqqhom in-nies ta’ wiċċ b’ieħor: hemmhekk ikun hemm il-biki u t-tgħażżiż tas-snien.