Read Maltese Bible with DC – IL-BIBBJA IL-KOTBA MQADDSA MATTEW 26 Bible Online

MATTEW 26 - Maltese Bible with DC – IL-BIBBJA IL-KOTBA MQADDSA bible

MATTEW 26

¹Meta temm dawn id-diskorsi kollha, Ġesù qal lid-dixxipli tiegħu:

²“Tafu li jumejn oħra jkun il-Għid, u Bin il-bniedem se jingħata biex isallbuh.”

³Imbagħad il-qassisin il-kbar u x-xjuħ tal-poplu nġabru fil-palazz tal-qassis il-kbir, li kien jismu Kajfa,

⁴u bdew jiftiehmu kif jaqbdu lil Ġesù bil-qerq ta’ moħħhom u jagħtuh il-mewt.

⁵Iżda qalu: “Mhux fil-festa, li ma tinqalax xi rewwixta fil-poplu.”

⁶Ġesù kien Betanja[92], għand Xmun il-lebbruż.

⁷U resqet lejh mara, b’vażett tal-alabastru biż-żejt ifuħ, jiswa ħafna, u ferrgħethulu fuq rasu xħin hu kien għadu fuq il-mejda.

⁸Id-dixxipli, kif raw dan, bdew jitmasħnu u jgħidu: “Dan il-ħala kollu għalfejn?

⁹Dan sata’ jġib prezz tajjeb u jingħata karità lill-foqra.”

¹⁰Ġesù induna u qalilhom: “Għaliex qegħdin iddejquha lil din il-mara? Ħaġa tajba għamlet miegħi.

¹¹Il-foqra ssibuhom dejjem magħkom, imma lili m’hux se ssibuni dejjem magħkom.

¹²Jekk hija xerrdet din il-fwieħa fuq ġismi, dan għamlitu bi tħejjija għad-difna tiegħi.

¹³Tassew, ngħidilkom, li kull fejn jixxandar dan l-Evanġelju fid-dinja kollha, li għamlet din jingħad ukoll, b’tifkira tagħha.”

¹⁴Imbagħad wieħed mit-Tnax, jismu Ġuda l-Iskarjota, mar għand il-qassisin il-kbar

¹⁵u qalilhom: “Xi tridu tagħtuni u jiena nagħtikom lil Ġesù f’idejkom?” U huma tawh tletin biċċa tal-fidda bħala ħlas.

¹⁶Minn dak il-ħin beda jfittex okkażjoni tajba biex jagħtihom lil Ġesù f’idejhom.

¹⁷Fl-ewwel jum tal-Ażżmi d-dixxipli resqu lejn Ġesù u qalulu: “Fejn tridna nħejjulek l-ikla tal-Għid?”

¹⁸U hu qalilhom: “Morru l-belt għand it-tali, u għidulu, ‘Qallek l-Imgħallem: Is-siegħa tiegħi waslet; jien se nagħmel l-ikla tal-Għid għandek mad-dixxipli tiegħi.’ ”

¹⁹Id-dixxipli għamlu kif ordnalhom Ġesù u ħejjew l-ikla tal-Għid.

²⁰Għall-ħin ta’ filgħaxija qagħad fuq il-mejda flimkien mat-Tnax,

²¹u waqt l-ikel qal: “Tassew ngħidilkom, li wieħed minnkom se jittradini.”

²²Huma bdew isewdu qalbhom ħafna u kull wieħed minnhom beda jsaqsih: “Jaqaw jien, Mulej?”

²³U Ġesù weġibhom: “Dak li jmidd idu u jbill il-ħobż fi platt wieħed miegħi, dak li se jittradini.

²⁴Bin il-bniedem imur kif hemm miktub fuqu imma ħażin għalih dak il-bniedem li permezz tiegħu Bin il-bniedem ikun mogħti f’idejn l-għedewwa! Kien ikun aħjar għalih dak il-bniedem li kieku ma twieled xejn!”

²⁵Qabeż Ġuda, dak li ttradieh, u qallu: “Jaqaw jien, Rabbi[93]?” Wieġbu Ġesù: “Int qiegħed tgħidu.”

²⁶Huma u jieklu, Ġesù ħa l-ħobż f’idejh, qal il-barka, qasmu, newlu lid-dixxipli u qal: “Ħudu, kulu, dan hu ġismi.”

²⁷Imbagħad ħa l-kalċi f’idejh, radd il-ħajr, newlilhom il-kalċi u qal: “Ixorbu lkoll minnu,

²⁸għax dan huwa demmi, id-demm tal-Patt[94], li jixxerred għall-kotra għall-maħfra tad-dnubiet.

²⁹Ngħidilkom, li ma nerġax nixrob iżjed minn dan il-frott tad-dielja sa dak inhar li nixrob inbid ġdid magħkom fis-Saltna ta’ Missieri.”

³⁰Kantaw is-salmi[95] u ħarġu lejn l-Għolja taż-Żebbuġ.

³¹Imbagħad Ġesù qalilhom: “Ilkoll kemm intom se titħawdu minħabba fija f’dan il-lejl; għax hemm miktub, ‘Nidrob ir-ragħaj, u n-nagħaġ tal-merħla jitferrxu.’

³²Imma wara li nqum mill-mewt, immur il-Galilija qabilkom.”

³³Qabeż Pietru u qallu: “Jekk kulħadd jitħawwad minħabba fik, jiena ma nitħawwad qatt.”

³⁴Qallu Ġesù: “Tassew, ngħidlek, li dal-lejl, qabel ma jidden is-serduk, int tkun ġa ċħadtni tliet darbiet.”

³⁵Qallu Pietru: “Le, ma niċħdekx, anqas jekk ikolli mmut miegħek!” U d-dixxipli l-oħra wkoll, kulħadd qal l-istess.

³⁶Imbagħad Ġesù flimkien mad-dixxipli tiegħu wasal f’qasam, jgħidulu l-Ġetsemani[96], u qal lid-dixxipli: “Oqogħdu bilqiegħda hawn sakemm immur hemmhekk nitlob.”

³⁷U ħa miegħu lil Pietru u ż-żewġ ulied ta’ Żebedew, u beda jsewwed qalbu u jiddejjaq.

³⁸Imbagħad qalilhom: “Għandi ruħi mnikkta għall-mewt; ibqgħu hawn u ishru miegħi.”

³⁹Mexa kemmxejn ’il quddiem, inxteħet wiċċu fl-art jitlob u jgħid: “Missier, jekk jista’ jkun, biegħed minni dan il-kalċi! Imma mhux kif irrid jien, iżda kif trid int.”

⁴⁰Ġie ħdejn id-dixxipli u sabhom reqdin; u qal lil Pietru: “Mela ma flaħtux tishru siegħa waħda miegħi?

⁴¹Ishru u itolbu biex ma tidħlux fit-tiġrib. L-ispirtu, iva, irid; imma l-ġisem dgħajjef.”

⁴²Għat-tieni darba raġa’ mar jitlob u qal: “Missieri, jekk dan il-kalċi ma jistax jgħaddi mingħajr ma nixorbu, tkun magħmula r-rieda tiegħek.”

⁴³Mill-ġdid ġie u sabhom reqdin, għax għajnejhom kienu tqal bin-ngħas.

⁴⁴Ħalliehom, u raġa’ mar jitlob għat-tielet darba, u qal l-istess kliem.

⁴⁵Imbagħad ġie ħdejn id-dixxipli u qalilhom: “Issa se torqdu u tistrieħu? Ara, is-siegħa waslet, u Bin il-bniedem se jkun mogħti f’idejn il-midinbin.

⁴⁶Qumu! Ejjew immorru! Araw, dak li se jittradini huwa fil-qrib!”

⁴⁷Kif kien għadu jitkellem, ġie Ġuda, wieħed mit-Tnax, b’ġemgħa kbira ta’ nies miegħu, armati bis-sjuf u l-bsaten, mibgħuta mill-qassisin il-kbar u x-xjuħ tal-poplu.

⁴⁸Issa dak li kien se jittradih kien tahom sinjal u qalilhom: “Lil dak li nbus, dak hu: aqbduh.”

⁴⁹U minnufih resaq fuq Ġesù u qallu: “Is-sliem għalik, Rabbi!” U biesu.

⁵⁰U Ġesù qallu: “Ħabib, għalhekk ġejt int!” Huma resqu lejh, meddew idejhom fuq Ġesù u qabduh.

⁵¹Wieħed minn dawk li kienu ma’ Ġesù ħareġ idu u silet is-sejf, darab lill-qaddej tal-qassis il-kbir u qatagħlu widintu.

⁵²Imbagħad Ġesù qallu: “Erġa’ daħħal sejfek f’postu għax kull min jaqbad is-sejf, bis-sejf jinqered.

⁵³Taħseb int li ma nistax nitlob lil Missieri u jibgħatli issa stess aktar minn tnax-il leġjun[97] ta’ anġli?

⁵⁴Iżda mbagħad kif isseħħ l-Iskrittura li tgħid li hekk għandu jsir?”

⁵⁵Fl-istess waqt Ġesù qal: “Qiskom ħriġtu għal xi ħalliel, armati bis-sjuf u l-bsaten biex taqbdu lili! Jien kuljum kont inkun bilqiegħda fit-tempju ngħallem, u ma żammejtunix.”

⁵⁶Iżda dan kollu ġara biex isseħħ il-kitba tal-profeti. Imbagħad id-dixxipli kollha telquh u ħarbu.

⁵⁷Dawk li qabdu lil Ġesù ħaduh quddiem Kajfa, il-qassis il-kbir, fejn ġa kienu nġabru l-kittieba u x-xjuħ.

⁵⁸Pietru kien baqa’ miexi warajh mill-bogħod sal-palazz tal-qassis il-kbir; daħal ġewwa u qagħad bilqiegħda mal-qaddejja biex jara kif kienet se tintemm il-biċċa.

⁵⁹Il-qassisin il-kbar u s-Sinedriju kollha bdew ifittxu xhieda foloz kontra Ġesù bil-ħsieb li jagħtuh il-mewt,

⁶⁰iżda għalkemm resqu bosta xhieda foloz, ma sabux fuqiex jixluh. Fl-aħħar resqu tnejn

⁶¹u qalu: “Dan qal, ‘Nista’ nħott it-tempju ta’ Alla u nerġa’ nibnih fi tlitt ijiem.’ ”

⁶²Il-qassis il-kbir qam u qallu: “Xejn ma twieġeb? X’inhuma jixhdu dawn kontra tiegħek?”

⁶³Imma Ġesù baqa’ sieket. Imbagħad il-qassis il-kbir qabad u qallu: “Aħlifli fuq Alla l-ħaj u għidilna jekk intix il-Messija, Bin Alla.”

⁶⁴Qallu Ġesù: “Inti qiegħed tgħidu. U ngħidilkom ukoll: Minn issa ’l quddiem għad taraw lil Bin il-bniedem bilqiegħda n-naħa tal-lemin ta’ dak li jista’ kollox u ġej fuq is-sħab tas-sema.”

⁶⁵Imbagħad il-qassis il-kbir ċarrat ilbiesu[98] u qal: “Din dagħwa! Xi ħtieġa għandna iżjed ta’ xhieda? Ara, smajtuha issa d-dagħwa!

⁶⁶X’jidhrilkom?” Huma weġbuh u qalu: “Ħaqqu l-mewt!”

⁶⁷Imbagħad beżqulu f’wiċċu u tawh bil-ponn, u xi wħud tawh bil-ħarta

⁶⁸u qalulu: “Aqta’ min tahielek, Messija, din id-daqqa!”

⁶⁹Intant Pietru kien hemm barra bilqiegħda, fil-bitħa tal-palazz. U resqet fuqu waħda qaddejja u qaltlu: “Int ukoll kont ma’ Ġesù tal-Galilija.”

⁷⁰Imma hu ċaħad quddiem kulħadd u qal: “Anqas naf xi trid tgħid.”

⁷¹Imbagħad warrab lejn il-bieb, lemħitu qaddejja oħra u qalet lil dawk li kienu hemm: “Dan kien ma’ Ġesù ta’ Nazaret[99].”

⁷²U raġa’ ċaħad u ħalef: “Jien ma nafux lil dan il-bniedem!”

⁷³Wara ftit dawk l-istess nies resqu lejn Pietru u qalulu: “Tassew, int ukoll wieħed minnhom, għax għandek il-kisra ta’ kliemek tikxfek.”

⁷⁴Imbagħad qabad jisħet lilu nnifsu u jaħlef: “Le, ma nafux lil dan il-bniedem!” U minnufih is-serduk idden.

⁷⁵U Pietru ftakar fil-kliem ta’ Ġesù meta qallu li ‘Qabel ma s-serduk jidden, int tkun ġa ċħadtni tliet darbiet.’ U ħareġ ’il barra jibki biki ta’ qsim il-qalb.