Read Maltese Bible with DC – IL-BIBBJA IL-KOTBA MQADDSA MATTEW 27 Bible Online

MATTEW 27 - Maltese Bible with DC – IL-BIBBJA IL-KOTBA MQADDSA bible

MATTEW 27

¹L-għada filgħodu l-qassisin il-kbar u x-xjuħ tal-poplu ftiehmu lkoll bejniethom biex lil Ġesù jaqtgħuhielu għall-mewt.

²Rabtuh u ħaduh magħhom biex jagħtuh f’idejn Pilatu[100], il-gvernatur.

³Imbagħad Ġuda, it-traditur, meta ra li Ġesù kien ikkundannat, nidem u mar bit-tletin biċċa tal-fidda għand il-qassisin il-kbar u x-xjuħ biex jerġa’ jagħtihomlhom lura;

⁴u qalilhom: “Dnibt, għax ittradejt demm bla ħtija[101]!” Iżda huma qalulu: ‘Aħna din x’inhi affari tagħna? Dak arah int!”

⁵Hu waddab il-flus fis-santwarju, telaq u mar tgħallaq.

⁶Imbagħad il-qassisin il-kbar ġabru l-flus minn hemm u qalu: “Dawn ma nistgħux inqegħduhom mal-offerti, għax huma prezz tad-demm[102].”

⁷Ftiehmu bejniethom, u b’dawk il-flus xtraw l-Għalqa ta’ Ħaddiem il-Fuħħar, biex fiha jidfnu l-barranin.

⁸Kien għalhekk li dik l-għalqa ssemmiet l-Għalqa tad-Demm, u hekk għadha magħrufa sal-lum.

⁹Imbagħad seħħ dak li kien ingħad permezz tal-profeta Ġeremija meta qal: ‘U ħadu t-tletin biċċa tal-fidda, il-prezz ta’ dak li kien stmat bil-prezz mogħti minn ulied Iżrael,

¹⁰u tawhom għall-għalqa ta’ ħaddiem il-fuħħar, kif ikkmandani l-Mulej.’

¹¹Ġesù waqaf quddiem il-gvernatur; u dan staqsieh: “Int is-sultan tal-Lhud?” U Ġesù wieġbu: “Inti qiegħed tgħidu.”

¹²Iżda meta l-qassisin il-kbar u x-xjuħ bdew jakkużawh, hu ma wieġeb xejn.

¹³Għalhekk Pilatu qallu: “M’intix tisma’ kemm ħwejjeġ qegħdin jixhdu kontra tiegħek!”

¹⁴Iżda hu anqas għal akkuża waħda ma wieġeb, hekk li l-gvernatur baqa’ mistagħġeb ħafna.

¹⁵Nhar ta’ festa l-gvernatur kien soltu jitlaq wieħed ħabsi, lil min iridu huma.

¹⁶Dik il-ħabta kellhom wieħed ħabsi magħruf, jismu Barabba[103].

¹⁷Mela kif kienu miġbura, Pilatu qalilhom: “Lil min triduni nitilqilkom, lil Barabba jew lil Ġesù li jgħidulu l-Messija?”

¹⁸Għax hu kien jaf li kienet l-għira li ġagħlithom jagħtuh lil Ġesù f’idejh.

¹⁹Issa waqt li kien bilqiegħda fuq is-siġġu tat-tribunal, martu bagħtet tgħidlu: “Qis li ma jkollokx x’taqsam ma’ dan ir-raġel ġust, għax illum minħabba fih batejt ħafna fil-ħolm.”

²⁰Iżda l-qassisin il-kbar u x-xjuħ ġiegħlu l-poplu jitolbuh lil Barabba u jeqirdu ’l Ġesù.

²¹Il-gvernatur, mela, raġa’ staqsiehom: “Lil min triduni nitilqilkom minnhom it-tnejn?” “Lil Barabba.”

²²Qalilhom Pilatu: “U x’nagħmel b’Ġesù li jgħidulu l-Messija?” Weġbuh ilkoll: “Sallbu!’

²³Hu staqsiehom: “Imma x’għamel ħażin?” Huma aktar bdew jgħajtu u jgħidu: “Sallbu!”

²⁴Meta mbagħad Pilatu ra li kollox kien għal xejn, anzi li aktarx kienet se tinqala’ xi rewwixta, qabad, ħasel idejh fl-ilma quddiem il-poplu u qal: “Jien m’iniex ħati ta’ dan id-demm[104]: dan arawh intom!”

²⁵U l-poplu kollu qabeż u qal: “Demmu fuqna u fuq uliedna[105]!”

²⁶Imbagħad telqilhom lil Barabba, u lil Ġesù, wara li tah is-swat[106], tahulhom biex isallbuh.

²⁷Imbagħad is-suldati tal-gvernatur ħadu lil Ġesù fil-Pretorju, u ġabru quddiemu lil sħabhom kollha.

²⁸Neżżgħuh, u xeħtulu fuqu mantar aħmar skur[107];

²⁹qegħdulu fuq rasu kuruna minsuġa mix-xewk u qasba f’idu l-leminija, inxteħtu għarkupptejhom quddiemu, u qagħdu jiddieħku bih u jgħidulu: “Is-sliem għalik, sultan tal-Lhud!”

³⁰Beżqu fuqu, u ħadulu l-qasba minn idu u bdew jagħtuh biha fuq rasu.

³¹Imbagħad, wara li għaddewh biż-żufjett, neżżgħulu l-mantar u xeddewlu ħwejġu. U ħaduh magħhom biex isallbuh.

³²Huma u sejrin sabu raġel minn Ċireni[108], jismu Xmun, u ġagħluh jerfagħlu s-salib[109].

³³Meta waslu f’post jgħidulu Golgota, jiġifieri post il-Qorriegħa[110],

³⁴tawh jixrob inbid b’taħlita morra; hu daqu, imma ma riedx jixorbu.

³⁵Imbagħad sallbuh, u qassmu ħwejġu bejniethom billi tellgħuhom bix-xorti,

³⁶u nxteħtu bilqiegħda u qagħdu hemm għassa tiegħu.

³⁷U qegħdulu fuq rasu l-kawża tal-kundanna tiegħu, li kienet tgħid hekk, ‘Dan hu Ġesù, is-sultan tal-Lhud.’

³⁸Imbagħad miegħu sallbu żewġ ħallelin, wieħed fuq il-lemin u l-ieħor fuq ix-xellug.

³⁹Dawk li kienu għaddejjin bdew jgħajruh iċaqilqu rashom

⁴⁰u jgħidu: “Int li tħott it-tempju u fi tlitt ijiem terġa’ tibnih, salva lilek innifsek jekk int l-Iben ta’ Alla, u inżel minn fuq is-salib!”

⁴¹Hekk ukoll il-qassisin il-kbar bdew jiddieħku bih mal-kittieba u x-xjuħ u jgħidu:

⁴²“Salva oħrajn, lilu nnifsu ma jistax isalva! Hu s-sultan ta’ Iżrael! Ħa jinżel issa minn fuq is-salib u nemmnu fih!

⁴³Hu jafda f’Alla; ħa jeħilsu issa, jekk iħobbu! Għax hu qal, ‘Jiena Bin Alla.’ ”

⁴⁴U bl-istess mod bdew imaqdruh ukoll il-ħallelin li kienu msallbin miegħu.

⁴⁵Mis-sitt siegħa ’l quddiem waqgħet dalma kbira fuq il-pajjiż kollu sad-disa’ siegħa.

⁴⁶U madwar id-disa’ siegħa Ġesù għajjat b’leħen qawwi u qal: “Eli, Eli, lema sabaqtani?” Jiġifieri, ‘Alla tiegħi, Alla tiegħi, għaliex tlaqtni?’

⁴⁷Xi wħud minn dawk li kienu hemm, kif semgħuh, qalu: “Lil Elija qiegħed isejjaħ dan!”

⁴⁸U minnufih wieħed minnhom mar jiġri, qabad sponża mimlija bil-ħall, waħħalha f’tarf ta’ qasba u tah jixrob,

⁴⁹waqt li l-oħrajn qalu: “Stenna, ħa naraw jiġix Elija jsalvah!”

⁵⁰Imma Ġesù reġa’ għajjat għajta kbira u radd ruħu.

⁵¹U ara, il-purtiera tas-santwarju ċċarrtet fi tnejn minn fuq s’isfel; l-art theżżet, il-blat inqasam,

⁵²u l-oqbra nfetħu, u qamu ħafna iġsma ta’ qaddisin li kienu mietu,

⁵³li ħarġu mill-oqbra u wara l-qawmien tiegħu daħlu fil-Belt imqaddsa[111] u dehru lil bosta nies.

⁵⁴Iċ-ċenturjun u dawk li kienu miegħu għassa ta’ Ġesù, kif raw l-art titheżżeż u jiġri dak kollu, imtlew b’biża’ liema bħalu u qalu: “Dan kien tassew Bin Alla!”

⁵⁵Hemmhekk kien hemm ħafna nisa jħarsu mill-bogħod, dawk stess li kienu mxew wara Ġesù biex jaqduh sa minn meta kien għadu fil-Galilija[112]:

⁵⁶fosthom kien hemm Marija ta’ Magdala, Marija omm Ġakbu u Ġużeppi u omm ulied Żebedew.

⁵⁷Xħin sar filgħaxija, ġie raġel għani, minn Arimatija[113], jismu Ġużeppi, li hu wkoll kien sar dixxiplu ta’ Ġesù;

⁵⁸mar għand Pilatu u talbu l-ġisem ta’ Ġesù. Imbagħad Pilatu ordna li jingħatalu.

⁵⁹Ġużeppi ħa l-ġisem u keffnu f’liżar nadif,

⁶⁰qiegħdu fil-qabar ġdid tiegħu li kien ħaffer fil-blat, gerbeb ġebla kbira fid-daħla tal-qabar, u telaq.

⁶¹Iżda Marija ta’ Magdala u Marija l-oħra baqgħu hemm bilqiegħda biswit il-qabar.

⁶²L-għada, jiġifieri meta għadda Jum it-Tħejjija[114], il-qassisin il-kbar u l-Fariżej inġabru għand Pilatu

⁶³u qalulu: “Sinjur, aħna ftakarna li dan il-bniedem qarrieq, meta kien għadu ħaj, qal, ‘Wara tlitt ijiem inqum.’

⁶⁴Mela ordna li l-qabar ikun imħares tajjeb sat-tielet jum, li ma jmorrux jiġu d-dixxipli tiegħu jisirquh, u jgħidu lill-poplu, ‘Qam mill-imwiet,’ u hekk il-qerq tal-aħħar ikun agħar minn tal-ewwel.”

⁶⁵Qalilhom Pilatu: “Għandkom l-għassa; morru ħarsuh tajjeb kif tafu.”

⁶⁶U huma marru jissiġillaw il-ġebla biex il-qabar jibqa’ mħares sewwa, u ħallew ukoll l-għassa miegħu.