Read Maltese Bible with DC – IL-BIBBJA IL-KOTBA MQADDSA MATTEW 4 Bible Online

MATTEW 4 - Maltese Bible with DC – IL-BIBBJA IL-KOTBA MQADDSA bible

MATTEW 4

¹Imbagħad l-Ispirtu ħa lil Ġesù fid-deżert biex ix-Xitan iġarrbu.

²U Ġesù baqa’ sajjem għal erbgħin jum u erbgħin lejl, u fl-aħħar ħadu l-ġuħ.

³U resaq it-tentatur u qallu: “Jekk inti Bin Alla, ordna li dan il-ġebel isir ħobż.”

⁴Iżda Ġesù wieġbu: “Hemm miktub, ‘Il-bniedem mhux bil-ħobż biss jgħix, iżda b’kull kelma li toħroġ minn fomm Alla.’ ”

⁵Imbagħad ix-Xitan ħadu miegħu fil-Belt imqaddsa[18], qiegħdu fuq il-quċċata tat-tempju,

⁶u qallu: “Jekk inti Bin Alla, inxteħet għal isfel; għax hemm miktub li, ‘Lill-anġli tiegħu jordnalhom jieħdu ħsiebek,’ u li ‘Fuq idejhom jerfgħuk, ħalli ma taħbatx riġlek ma’ xi ġebla.’ ”

⁷Qallu Ġesù: “Hemm miktub ukoll, ‘Iġġarrabx lill-Mulej, Alla tiegħek.’ ”

⁸Għal darb’oħra x-xitan ħadu miegħu fuq muntanja għolja ħafna, urieh is-saltniet kollha tad-dinja u l-glorja tagħhom,

⁹u qallu: “Dawn kollha nagħtihom lilek jekk tinxteħet tadurani.”

¹⁰Imbagħad qallu Ġesù: “Itlaq, Xitan! Għax hemm miktub, ‘Lill-Mulej, Alla tiegħek, għandek tadura, u lilu biss taqdi.’ ”

¹¹Imbagħad ix-Xitan ħallieh. U minnufih ġew xi anġli u kienu jaqduh.

¹²Meta Ġesù sama’ li kienu arrestaw lil Ġwanni, warrab lejn il-Galilija[19].

¹³Telaq minn Nazaret u mar joqgħod Kafarnahum[20], qrib il-baħar, fl-inħawi ta’ Żebulun u Naftali[21],

¹⁴biex hekk iseħħ dak li kien ingħad permezz tal-profeta Isaija, meta qal,

¹⁵‘Art ta’ Żebulun, u art ta’ Naftali, it-triq tal-baħar, art ’il hemm mill-Ġordan, Galilija tal-ġnus!

¹⁶Il-poplu li kien qiegħed fid-dlam ra dawl kbir; dawk li kienu f’art u dell il-mewt idda dawl għalihom.’

¹⁷Minn dak iż-żmien Ġesù beda jxandar u jgħid: “Indmu għax is-Saltna tas-Smewwiet waslet.”

¹⁸Huwa u jdur ma’ xatt il-baħar tal-Galilija[22] lemaħ żewġt aħwa, Xmun jgħidulu Pietru, u ħuh Indrì, qegħdin jixħtu x-xbiek fil-baħar, għax kienu sajjieda.

¹⁹U qalilhom: “Ejjew warajja, u nagħmilkom sajjieda tal-bnedmin.”

²⁰U minnufih telqu x-xbiek, u marru warajh.

²¹Wara li mexa minn hemm ra żewġt aħwa oħra, Ġakbu ta’ Żebedew u ħuh Ġwanni, qegħdin fid-dgħajsa ma’ missierhom Żebedew isewwu x-xbiek tagħhom, u sejħilhom.

²²Minnufih telqu d-dgħajsa u lil missierhom, u marru warajh.

²³U dar il-Galilija kollha jgħallem fis-sinagogi tagħhom, ixandar l-Evanġelju tas-Saltna[23] u jfejjaq kull xorta ta’ mard u dgħufija fost il-poplu.

²⁴Il-fama tiegħu xterdet mas-Sirja[24] kollha, u bdew iġibulu lil kull min kellu xi hemm fuqu, dawk li kienu jbatu b’xi mard jew uġigħ, il-maħkumin mix-xitan, il-morda b’tal-qamar, il-mifluġin, u kien ifejjaqhom.

²⁵U bdew imorru warajh folol kbar mill-Galilija, mid-Dekapoli[25], minn Ġerusalemm u mil-Lhudija, u mill-inħawi ’l hemm mill-Ġordan.