Read Maltese Bible with DC – IL-BIBBJA IL-KOTBA MQADDSA MARK 15 Bible Online

MARK 15 - Maltese Bible with DC – IL-BIBBJA IL-KOTBA MQADDSA bible

MARK 15

¹Filgħodu kmieni l-qassisin il-kbar iltaqgħu malajr max-xjuħ u mal-kittieba u mas-Sinedriju kollu biex jiftiehmu bejniethom. Imbagħad rabtu lil Ġesù, ħaduh u tawh f’idejn Pilatu[78].

²Pilatu staqsieh: “Inti s-sultan tal-Lhud?” U hu wieġeb u qallu: “Int qiegħed tgħidu.”

³Il-qassisin il-kbar bdew jaqilgħu ħafna akkużi kontra tiegħu.

⁴Iżda Pilatu raġa’ staqsieh: “Ma twieġeb xejn? Ara kemm akkużi qegħdin iġibu kontra tiegħek!”

⁵Imma Ġesù ma wieġeb xejn iżjed, hekk li Pilatu baqa’ mistagħġeb.

⁶F’nhar ta’ festa kien jitilqilhom wieħed ħabsi, lil dak li kienu jitolbu huma.

⁷Issa fil-ħabs kien hemm wieħed jismu Barabba, arrestat flimkien max-xewwiexa li fir-rewwixta kienu qatlu lil xi ħadd.

⁸In-nies telgħu u bdew jitolbuh jagħmel kif kien jagħmlilhom dejjem.

⁹Qabad Pilatu u qalilhom: “Tridux nitilqilkom is-sultan tal-Lhud?”

¹⁰Għax hu għaraf tajjeb li l-qassisin il-kbar kienu tawh lil Ġesù f’idejh minħabba l-għira.

¹¹Iżda l-qassisin il-kbar bdew ixewxu n-nies li aħjar jitilqilhom lil Barabba.

¹²Pilatu raġa’ staqsiehom u qalilhom: “U x’nagħmel imbagħad b’dak li intom issejħulu s-sultan tal-Lhud?”

¹³Iżda huma nfexxew jgħajtu mill-ġdid: “Sallbu!”

¹⁴Qalilhom Pilatu: “Imma x’għamel ħażin?” Huma aktar bdew jgħajtu: “Sallbu!”

¹⁵Pilatu mbagħad, biex jogħġob lin-nies, telqilhom lil Barabba[79], u lil Ġesù, wara li tah is-swat, tahulhom biex isallbuh.

¹⁶Is-suldati ħaduh magħhom ġewwa fil-palazz, jiġifieri l-Pretorju, u sejħu r-riġment kollu[80].

¹⁷Libbsuh ilbies aħmar skur[81], u qegħdulu fuq rasu kuruna minsuġa mix-xewk.

¹⁸U bdew isellmulu: “Is-sliem għalik, sultan tal-Lhud!”

¹⁹U qabdu jagħtuh b’qasba fuq rasu, jobżqulu fuqu, u jilwu rkupptejhom quddiemu biex jagħtuh qima.

²⁰Imbagħad, wara li għaddewh biż-żufjett, neżżgħulu l-ilbies aħmar u xeddewlu ħwejġu. U ħaduh ’il barra biex isallbuh.

²¹Kien għaddej wieħed, Xmun minn Ċireni, missier Xandru u Rufu, ġej lura mir-raba’, u ġagħluh jerfagħlu s-salib[82].

²²U wassluh f’post jismu Golgota, li jfisser post il-Qorriegħa[83].

²³U tawh jixrob inbid imħallat bil-mirra[84], imma hu ma riedx jieħu minnu.

²⁴Imbagħad sallbuh, u qassmu ħwejġu bejniethom billi tellgħuhom bix-xorti ħalli kull wieħed jieħu li jmissu.

²⁵Kienet it-tielet siegħa[85] xħin sallbuh.

²⁶Il-kitba li turi l-ħtija tal-kundanna tiegħu kienet tgħid hekk: “Is-sultan tal-Lhud.”

²⁷Miegħu sallbu wkoll żewġ ħallelin[86], wieħed fuq il-lemin u l-ieħor fuq ix-xellug.

²⁸

²⁹Dawk li kienu għaddejjin bdew jgħajruh, iċaqilqu rashom u jgħidu: “Għajb għalik, int li tħott it-tempju u tfittex terġa’ tibnih fi tlitt ijiem!

³⁰Inżel minn fuq is-salib u salva lilek innifsek!”

³¹Hekk ukoll il-qassisin il-kbar bdew jiddieħku bih bejniethom u mal-kittieba u jgħidu: “Salva oħrajn, lilu nnifsu ma jistax isalva!

³²Ħa jinżel issa l-Messija, is-sultan ta’ Iżrael, minn fuq is-salib biex aħna naraw u nemmnu!” U dawk li kienu msallbin miegħu bdew imaqdruh huma wkoll.

³³Xħin saret is-sitt siegħa waqgħet dalma kbira fuq il-pajjiż kollu sad-disa’ siegħa.

³⁴U fid-disa’ siegħa Ġesù għajjat b’leħen qawwi: “Eloî, Eloî, lema sabaqtani!”, li jfisser: “Alla tiegħi, Alla tiegħi, għaliex tlaqtni!”

³⁵Xi wħud minn dawk li kienu hemm, kif semgħuh, qalu: “Ara, qiegħed isejjaħ lil Elija!”

³⁶U mar wieħed jiġri jxappap sponża bl-inbid qares[87], waħħalha f’tarf ta’ qasba u tah jixrob filwaqt li qal: “Stennew, ħa naraw jiġix Elija jniżżlu!”

³⁷Imma Ġesù għajjat għajta kbira u radd ruħu.

³⁸U l-purtiera tas-santwarju ċċarrtet fi tnejn minn fuq s’isfel.

³⁹Iċ-ċenturjun[88] li kien wieqaf biswitu, meta rah jgħajjat u jmut hekk, qal: “Dan il-bniedem kien tassew Bin Alla!”

⁴⁰Kien hemm ukoll xi nisa jħarsu mill-bogħod, fosthom Marija ta’ Magdala, Marija omm Ġakbu ż-żgħir u Ġosè, u Salomi;

⁴¹dawn, meta Ġesù kien fil-Galilija, kienu jmorru miegħu u jaqduh. U kien hemm ukoll bosta oħrajn li kienu telgħu Ġerusalemm miegħu.

⁴²Kien ġa sar filgħaxija, u billi kien Jum it-Tħejjija, jiġifieri lejlet is-Sibt,

⁴³Ġużeppi minn Arimatija, membru magħruf tal-Kunsill, li hu wkoll kien jistenna s-Saltna ta’ Alla, għamel il-ħila, daħal quddiem Pilatu u talbu l-ġisem ta’ Ġesù.

⁴⁴Pilatu stagħġeb li kien ġa miet; bagħat għaċ-ċenturjun u staqsieh jekk kienx ilu li miet.

⁴⁵Meta mbagħad sar jaf mingħand iċ-ċenturjun, ta l-ġisem ta’ Ġesù lil Ġużeppi,

⁴⁶u dan xtara liżar tal-għażel, niżżel lil Ġesù mis-salib, keffnu fil-liżar u qiegħdu f’qabar imħaffer fil-blat; imbagħad gerbeb ġebla fid-daħla tal-qabar.

⁴⁷Marija ta’ Magdala u Marija omm Ġosè qagħdu jaraw fejn tqiegħed.