Read Maltese Bible with DC – IL-BIBBJA IL-KOTBA MQADDSA MARK 7 Bible Online

MARK 7 - Maltese Bible with DC – IL-BIBBJA IL-KOTBA MQADDSA bible

MARK 7

¹Il-Fariżej u xi wħud mill-kittieba li ġew minn Ġerusalemm inġabru ħdejh,

²u raw li xi wħud mid-dixxipli tiegħu kienu qegħdin jieklu b’idejhom mhumiex indaf, jiġifieri mhumiex maħsulin.

³Għax il-Fariżej, u l-Lhud kollha, biex iħarsu t-tradizzjoni ta’ missirijiethom, ma jmissux ikel qabel ma jkunu ħaslu idejhom sewwa;

⁴hekk ukoll wara li jerġgħu lura mis-suq, ma jiklux jekk ma jinħaslux; u għandhom bosta drawwiet oħra li baqgħu marbutin magħhom minn żmien għal ieħor, bħalma huma l-ħasil tat-tazzi u tal-buqari u tal-ktieli tal-bronż.

⁵Mela, il-Fariżej u l-kittieba staqsewh: “Dan l-għala d-dixxipli tiegħek ma jġibux ruħhom skont it-tradizzjoni ta’ missirijiethom, imma jieklu b’idejhom mhumiex indaf?”

⁶Iżda hu weġibhom: “Sewwa ħabbar Isaija fuqkom, ja nies ta’ wiċċ b’ieħor, bħalma hu miktub, ‘Dan il-poplu [35] bix-xufftejn biss jagħtini ġieħ, imma qalbhom hija ’l bogħod minni.

⁷Fiergħa hi l-qima li jagħtuni; jgħallmu duttrina li mhijiex għajr preċetti tal-bnedmin.’

⁸Hekk intom, twarrbu l-kmandamenti ta’ Alla biex tħaddnu t-tradizzjoni tal-bnedmin.”

⁹U qalilhom: “Ħelu ħelu ġġibu fix-xejn il-kmandamenti ta’ Alla biex tħarsu t-tradizzjoni tagħkom.

¹⁰Mosè qal, ‘Weġġaħ lil missierek u ’l ommok’ u ‘min iżeblaħ lil missieru jew ’l ommu għandu jieħu l-mewt’.

¹¹Imma intom tgħidu: Jekk wieħed jgħid lil missieru jew ’l ommu, ‘Il-ġid li għandi, li jista’ jkun ta’ għajnuna għalik, huwa Qorban[36]’ (jiġifieri, offerta)’

¹²intom mbagħad ma tħalluh jagħmel xejn iżjed għal missieru jew ommu,

¹³u hekk iġġibu fix-xejn il-kelma ta’ Alla bit-tradizzjoni li tgħaddu minn ġenerazzjoni għal oħra. U bosta ħwejjeġ oħra bħal dawn tagħmlu.”

¹⁴Raġa’ sejjaħ in-nies lejh u qalilhom: “Isimgħuni, intom ilkoll, u ifhmuni!

¹⁵Ma hemm xejn[37] minn barra li meta jidħol fi bniedem itebbgħu; imma dak li joħroġ minn ġol-bniedem, dak hu li jtabba’ lill-bniedem.”

¹⁷Meta ħalla n-nies u daħal id-dar, id-dixxipli tiegħu staqsewh fuq il-parabbola.

¹⁸U hu qalilhom: “Intom ukoll daqshekk bla moħħ? Ma tifhmux li xejn ma jista’ jtabba’ lill-bniedem minn dak li jidħol ġo fih minn barra,

¹⁹la darba dan mhux fil-qalb imur, iżda fl-istonku, biex imbagħad jintrema fil-ħofra?” B’hekk wera li l-ikel kollu hu safi.

²⁰U qalilhom: “Dak li joħroġ minn ġol-bniedem, dak hu li jtabba’ lill-bniedem.

²¹Għax hu minn ġewwa, mill-qalb tal-bniedem, li joħorġu l-ħsibijiet il-ħżiena, żina, serq, qtil,

²²adulterju, regħba, ħażen, qerq, libertinaġġ, għira, malafama, suppervja u bluha.

²³Dal-ħażen kollu minn ġewwa joħroġ u jtabba’ lill-bniedem.”

²⁴Minn hemmhekk telaq u mar fl-inħawi tal-belt ta’ Tir[38]. Daħal joqgħod f’dar, u ried li ħadd ma jsir jaf. Iżda ma setax ikun li jinħeba,

²⁵għax malajr semgħet bih waħda mara li kellha lil bintha maħkuma minn spirtu ħażin, u marret tinxteħet f’riġlejh.

²⁶Issa din il-mara kienet Griega, Sirofeniċja[39] min-nisel tagħha. Bdiet mela titolbu biex ikeċċi x-xitan minn ġo bintha.

²⁷U hu qalilha: “L-ewwel ħa jixbgħu l-ulied, għax mhux sewwa tieħu l-ħobż tal-ulied u tixħtu lill-ġriewi.”

²⁸Iżda hi weġbitu u qaltlu: “Hekk hu, Mulej; imma taħt il-mejda l-ġriewi wkoll jieklu l-frak mill-ħobż tat-tfal.”

²⁹Imbagħad qalilha: “Għal din il-kelma li għedt, mur, ix-xitan ħareġ minn bintek.”

³⁰U xħin marret id-dar, sabet it-tifla mimduda, u x-xitan kien ħareġ minnha.

³¹Raġa’ telaq mill-inħawi tal-belt ta’ Tir, għadda minn Sidon lejn il-baħar tal-Galilija, fl-inħawi tad-Dekapoli[40].

³²U ġabulu wieħed, trux u mbikkem, u talbuh iqegħedlu idu fuqu.

³³Ġesù ħarġu għalih waħdu minn qalb in-nies, daħħal subgħajh f’widnejh u messlu lsienu bir-riq tiegħu.

³⁴Imbagħad refa’ għajnejh lejn is-sema, tniehed tnehida, u qallu: “Effata[41],” jiġifieri, “Infetaħ!”

³⁵U minnufih widnejh infetħulu, l-irbit ta’ lsienu nħallu u qabad jitkellem sewwa.

³⁶Ġesù wissiehom biex ma jgħidu lil ħadd; iżda aktar ma wissiehom, aktar bdew ixandruh.

³⁷U mimlijin bil-għaġeb, bdew jgħidu: “Kollox għamel tajjeb: jagħti s-smigħ lit-torox u l-kliem lill-imbikkmin.”