Read Maltese Bible with DC – IL-BIBBJA IL-KOTBA MQADDSA DEWTERONOMJU 10 Bible Online

DEWTERONOMJU 10 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 10

¹“Imbagħad dakinhar qalli l-Mulej: ‘Aqta’ żewġ twavel tal-ġebel bħal ta’ qabel, u itla’ ħdejja fuq il-muntanja, u agħmel ukoll arka tal-injam.

²U jien nikteb fuq it-twavel il-kliem, li kien fuq it-twavel ta’ qabel, li int kissirt, u qegħedhom fl-arka.’

³“U jien għamilt arka tal-injam tal-gażżi u fassalt żewġ twavel tal-ġebel bħal ta’ qabel, u tlajt fuq il-muntanja biż-żewġ twavel f’idejja.

⁴U l-Mulej kiteb fuq iż-żewġ twavel, bħalma kien kiteb qabel, l-għaxar kelmiet li l-Mulej kien qalilkom fuq il-muntanja minn ġon-nar f’jum il-ġemgħa, u l-Mulej tahom lili.

⁵U dort u nżilt minn fuq il-muntanja, u qegħedt it-twavel fl-arka li kont għamilt fejn baqgħu hemm sal-lum, skont ma ordna l-Mulej.

⁶“Ulied Iżrael telqu minn Berot-bene-ġagħkan għal Mosera; hemm miet Aron u difnuh; u sar qassis floku ibnu Elgħażar.

⁷Minn hemm telqu għal Gudgoda u minn Gudgoda għal Ġotbata, art tal-ilma ġieri.

⁸“F’dan iż-żmien il-Mulej għażel lit-tribù ta’ Levi biex iġorru l-arka tal-patt tal-Mulej, joqogħdu quddiem il-Mulej u jaqduh, u jbierku b’ismu, kif għadhom sal-lum.

⁹Għalhekk it-tribù ta’ Levi ma kellux sehem fil-wirt ma’ ħutu; il-Mulej hu l-wirt tiegħu, bħalma qallu l-Mulej Alla tiegħek.

¹⁰U jien bqajt fuq il-muntanja bħal qabel, erbgħin jum u erbgħin lejl; u l-Mulej semagħni dik id-darba wkoll, u ma ġiex il-Mulej biex jeqridkom.

¹¹U l-Mulej qalli: ‘Qum u mur, u imxi quddiem il-poplu ħa jidħlu u jieħdu l-art f’idejhom, li jien ħlift li nagħtiha lilhom.’

¹²“U issa, Iżrael, x’inhu jitlob Alla minnek, jekk mhux li tibża’ mill-Mulej, Alla tiegħek; li timxi fi triqatu kollha; li tħobbu u li sservi lill-Mulej, Alla tiegħek, b’qalbek kollha u b’ruħek kollha;

¹³li tħares il-kmandamenti tal-Mulej u l-liġijiet tiegħu, li jien illum qiegħed nordnalek għall-ġid tiegħek?

¹⁴“Ara! Tal-Mulej, Alla tiegħek, huma s-sema u s-sema tas-smewwiet, u l-art u kulma fiha.

¹⁵Imma lejn missirijietek inġibed il-Mulej, u ħabbhom u għażel lil nisilhom warajhom, lilkom minn fost il-popli kollha, bħalma intom illum.

¹⁶Aħtnu mela qlubkom, u la twebbsux raskom aktar.

¹⁷Għax il-Mulej, Alla tagħkom, hu Alla fuq l-allat, u sid fuq is-sidien, Alla kbir, qawwi u tal-biża’, li ma jħarisx lejn l-uċuħ u ma jiħux rigali.

¹⁸Jagħmel il-ġustizzja mal-iltim u mal-armla, u jħobb il-barrani u jagħtih ħobż u lbies.

¹⁹Ħobbu l-barrani, għax intom barranin kontu fl-art tal-Eġittu.

²⁰Mill-Mulej, Alla tiegħek, għandek tibża’, lilu għandek isservi, miegħu għandek torbot qalbek, u b’ismu għandek taħlef.

²¹Hu l-foħrija tiegħek; hu Alla tiegħek, li għamel miegħek dawk l-opri kbar u tal-biża’, li rajt b’għajnejk.

²²Sebgħin ruħ kienu missirijietek meta niżlu l-Eġittu, u issa l-Mulej, Alla tiegħek, kattrek bħall-kwiekeb tas-sema.