Read Maltese Bible with DC – IL-BIBBJA IL-KOTBA MQADDSA DEWTERONOMJU 11 Bible Online

DEWTERONOMJU 11 - Maltese Bible with DC – IL-BIBBJA IL-KOTBA MQADDSA bible

DEWTERONOMJU 11

¹“Ħobb lill-Mulej, Alla tiegħek, u ħares l-ordnijiet tiegħu, il-liġijiet tiegħu, id-digrieti tiegħu u l-preċetti tiegħu għal dejjem.

²U intom tagħrfu llum - mhux uliedkom li la jafu u lanqas raw it-twiddib tal-Mulej, Alla tiegħek - il-kobor tiegħu, il-qawwa ta’ idu, u driegħu merfugħ;

³u s-sinjali tiegħu, l-opri tiegħu li għamel f’nofs l-Eġittu lill-Fargħun, is-sultan tal-Eġittu, u lil artu kollha;

⁴u li għamel lill-eżerċtu tal-Eġittu, liż-żwiemel u l-karrijiet tiegħu, kif il-Mulej qaleb għal fuqhom l-ilma tal-Baħar tal-Qasab, huma u kienu jiġru warajk, u qeridhom il-Mulej sal-lum.

⁵U x’għamel magħkom fid-deżert sakemm wasaltu hawnhekk.

⁶U tagħrfu x’għamel lil Datan u lil Abiram, ulied Elijab bin Ruben; kif infetħet l-art u belgħethom, lilhom u l-familji bit-tined tagħhom, u b’dawk kollha li żammew magħhom minn fost Iżrael kollu.

⁷Intom rajtu b’għajnejkom l-opri kbar kollha li għamel il-Mulej.

⁸“Ħarsu kulma nordnalkom jien illum, sabiex titqawwew, u tidħlu u tieħdu f’idejkom l-art li se tgħaddu għaliha biex tirbħuha.

⁹Biex iddumu żmien twil fl-art li l-Mulej ħalef li jagħti lil missirijietkom u ’l nisilhom, art tnixxi ħalib u għasel.

¹⁰L-art li dieħel fiha biex teħodha f’idejk mhijiex bħall-art tal-Eġittu, mnejn ħriġtu, fejn kont tiżra’ ż-żerriegħa u ssaqqiha b’riġlek, bħal ġnien tal-ħxejjex;

¹¹l-art li int se tgħaddi għaliha biex teħodha f’idejk hi art miżgħuda bil-muntanji u l-widien; art li tixrob l-ilma tax-xita mis-smewwiet;

¹²art li jieħu ħsiebha l-Mulej, Alla tiegħek, b’għajnejh dejjem fuqha mill-ewwel sal-aħħar tas-sena.

¹³“Jekk intom tisimgħu sewwa l-ordnijiet tiegħi, li qiegħed nagħtikom illum, u tħobbu lill-Mulej, Alla tagħkom, u sservuh b’qalbkom kollha u b’ruħkom kollha,

¹⁴jien nagħtikom fi żmienha x-xita għal artkom, ix-xita bikrija u x-xita mwaħħra[14] u tiġbor il-qmuħ tiegħek, l-inbid tiegħek u ż-żejt tiegħek.

¹⁵Nagħtik il-ħdura tar-raba’ għall-bhejjem tiegħek, u tiekol u tixba’.

¹⁶“Qis li qalbek ma titqarraqx, u tmorru sservu allat oħra u tinxteħtu wiċċkom fl-art quddiemhom,

¹⁷inkella tixgħel il-qilla tal-Mulej kontrikom, u jagħlaq is-smewwiet, u ma jkunx hemm xita, u l-art ma tagħtix il-frott tagħha, u tinqerdu f’qasir żmien minn wiċċ din l-art għammiela li l-Mulej se jagħtikom.

¹⁸“Qiegħdu dawn il-kelmiet tiegħi f’qalbkom u f’moħħkom; orbtuhom b’sinjali ma’ idejkom u dendluhom bejn għajnejkom.

¹⁹Għallmuhom lil uliedkom u tkellmu fuqhom meta tkun mistrieħ f’darek u miexi fit-triq; meta timtedd u meta tqum.

²⁰Iktibhom fuq il-ġnub ta’ bwieb darek u fuq il-bibien.

²¹U hekk jitkattru jiemek u jiem uliedek fuq l-art, li l-Mulej ħalef li jagħti lil missirijietek; jitkattru bħal jiem is-sema fuq l-art.

²²“Jekk tħarsu sewwa dawn il-kmandamenti kollha li qiegħed nagħtikom illum u tagħmluhom, u tħobbu lill-Mulej, Alla tagħkom, u timxu fi triqatu kollha, u torbtu qalbkom miegħu,

²³ikeċċi l-Mulej dawn il-ġnus kollha minn quddiemkom u tegħlbu ġnus ikbar u aqwa minnkom.

²⁴Kull fejn jirfes qiegħ riġlejkom, tagħkom ikun, mid-deżert sal-Libanu, mix-xmara l-kbira, ix-xmara tal-Ewfrat, sal-Baħar tal-Punent[15] tinfirex il-fruntiera tiegħek.

²⁵Ebda bniedem ma jiqaflek. Il-Mulej, Alla tagħkom, jitfa’ l-biża’ u t-twerwir tagħkom fuq wiċċ l-art kollha, li fuqha tirfsu, bħalma wegħedkom.

²⁶“Araw, jiena llum inqiegħed quddiemkom barka u saħta;

²⁷il-barka, jekk tħarsu l-kmandamenti tal-Mulej, Alla tagħkom, li jiena llum qiegħed nordnalkom;

²⁸u s-saħta, jekk ma tħarsux il-kmandamenti tal-Mulej, Alla tagħkom, imma toħorġu mit-triq li jiena llum qiegħed nordnalkom, biex timxu wara allat oħra li ma kontux tafu bihom.

²⁹Malli l-Mulej, Alla tiegħek, idaħħlek fl-art li inti sejjer fiha biex teħodha f’idejk, int tagħti l-barka minn fuq il-muntanja Gariżim, u s-saħta minn fuq il-muntanja Għebal[16].

³⁰- Dawn jinsabu n-naħa l-oħra tal-Ġordan mat-triq ta’ nżul ix-xemx, fl-art tal-Kangħanin, li jgħammru fl-Għaraba, biswit Gilgal, ħdejn il-ballut ta’ Mori. -

³¹“U issa intom se taqsmu l-Ġordan biex tmorru tieħdu f’idejkom l-art li l-Mulej, Alla tagħkom, se jagħtikom, u tirbħuha u tgħammru fiha.

³²Qisu li tagħmlu l-liġijiet, u d-digrieti li jien qiegħed inqegħdilkom illum quddiemkom.